دفاع وزارت: داسې پوځ جوړو چې په سیمه کې یې ساری نه وي

د ملي دفاع وزارت سرمفتش او د صفوفو د تصفیې کمېسیون مشر وايي، چې د اسلامي امارت ځواکونو ته د مسلکي زده کړو ورکولو لړۍ په چتګۍ سره روانه ده. نوموړي له سپوږمۍ راډيو سره په یوه ځانګړې مرکه کې ویلي، چې ملي پولیس، ملي اردو او د استخباراتو ریاست زیات شمېر ځواکونو ته تر دې مهاله مسلکي زده کړې ورکړل شوې او لا هم دوام لري. حکیمي وايي، چې د اسلامي امارات د ځواکونو له خلکو سره د چلند په برخې کې اوس ډير مثبت ګامونه پورته شوي او ورځې تر بلې په دې برخه کې بدلون رامنځته کیږي. دی دغه راز زیاتوي، چې د ځواکونو د یونیفورم موضوع هم نهایي شوې او ډير ژر به په ټول هیواد کې سرتېرو ته ځانګړی یونیفورم ورکړل شي. د ده په خبره چې په نږدې راتلونکي کې به هیواد یو داسي ځواک ولري، چې په سیمه کې به یې ساری نه وي او دا پوځ به په نږدې راتلونکې بشپړشي.