ټرمپ: دنیا په افغانستان کې زموږ حماقتونه ښه سم ولیدل

ټرمپ یو ځل بیا ویلي چې افغانستان کې د امریکا له شرمه ډکې ماتې، ایران، چین، شمالي کوریا او روسیه زړور کړل. د امریکا پخواني ولسمشر ډونالډ ټرمپ په خپله دې مرکه کې ویلي، ټولې نړۍ موږ ته کتل چې په افغانستان کې مو څه حماقتونه وکړل. دده په خبره هغه تېروتنې چې امریکا په افغانستان کې وکړې ټولې نړۍ ولیدلې او دا خو واضح خبره ده چې زموږ کمزوري او تېښته یې ولیدله. ټرمپ وایي نن چې په اوکراین کې کوم وضعیت رامنځ ته شوی زمینه یې میاشتې مخکې بایډن په افغانستان کې برابره کړه او روسیې ته یې روحیه ورکړه. نوموړي تمه ښوودلې چې روسیه له سختو بندیزونو سره مخ شي او دغه هېواد له اوکراین وتلو ته اړ کړل شي.