نن ورځ ( د اپريل پنځه نېټه) په چين کې له يوې مهمې دوديزې ورځې چينګ مينګ سره برابره ده.
چينايان په همدې ورځ خپلو اسلافو او نيکونو ته د عبادت او احترام او فقيدو کورنيو غړو او خپلوانو ته تعزيت او درناوی وړاندې کوي او په اړوندو يادغونډو او فعاليتونو کې برخه اخلي.
چينايان د هر کال په چينګ مينګ کې د خپلو اسلافو او مړه شويو مشرانو قبرونو ته ورځي او يا په همدې ورځ د عبادت مراسم او د خپلو اتلانو په يادغونډو او فعاليتونو کې ګډون کوي. دا د چينګ مينګ ورځې مهم دود او هم د چيني ملت لرغونې عنعنه ده.
د چين په کلتور کې دغه دود نه يوازې د کورنيو اړيکو او نظام د ټينګښت لپاره ګټور بلل کيږي، بلکې د کورنيو غړو حتی د ملت د يووالي د پياوړتيا او د ګډو ارزښتونو او روحاني ميراث په خونديتوب کې هم مهم رول لري.
څوک به په دغې ځانګړې ورځ تا یاد کړي؟
په چين کې ميليونو مامورينو او کارکوونکو د بېوزلۍ د له منځه وړلو په برخه کې خدمتونه کړي او په دغه اوږده مزل کې تر ۱۸۰۰ زياتو کسانو خپل خوږ ژوند بايللی دی. د چين د دولت رئيس شي جين پينګ څو څو ځلې په غونډو او يا فعاليتونو کې د اغلې هوانګ ون شيو په شمول د دغو مامورينو او کارکوونکو يادونه کړې او د دوی روحيې يې ستايلې دي.
هوانګ ون شيو په ۱۹۸۹م کال کې د ګوانګ شي په بای سه نومي ځای کې زيږېدلې وه.
نوموړې د بېجينګ د ښوونکو له پوهنتون څخه فارغه شوه او تر فارغېدو وروسته يې په لويو ښارونو کې کاري فرصتونه پرېښودل او د خدمت لپاره خپل ټاټوبي ته ستانه شوه.
نوموړې خپل ټاټوبي ته تر ستېدو وروسته، د چين کمونيست ګوند ته غوښتنليک وړاندې کړ، چې د له يې ولسوالۍ د شينهوا علاقه دارۍ د بای ني کلي د ګوندي چارو د لومړي ماموريت د مسؤلې په توګه يې پر دندې وګماري.
بای ني کلی په هغه وخت کې ډېر بېوزله او د بېوزلو کورنيو شمېر يې ۱۰۳ ښودل شوی و.
کله چې هوانګ ون شيود نوموړي کلي د لومړۍ مامورې په حېث دنده پر غاړه واخيسته، نو د دې کلي د معلوماتو د تر لاسه کولو لپاره يې پخپله د بېوزلو کورنيو نقشه جوړه کړه او هره مياشت به يې اوه او اته ځله له دغو کورنيو څخه ليدنې کولې. هوانګ ون شيو له کليوالو سره د اشنا کېدو لپاره سيمه ييزه لهجه زده کړې وه او کله کله به یې له کليوالو سره د کورنيو کارونو او کرهنيزو چارو کې مرسته هم کوله او په بهير کې به یې له هغوی سره خبرې کولې او غوښتل یې، چې له نژدې د دوی د زړه خبرې واوري.
ځايي کليوال د هوانګ ون شيو تر لارښوونې لاندې د ځانګړو کرهنيزو چارو په پرمختګ لګيا او عايدات يې ډېر شول. د هوانګ ون شيو د ماموريت په يو کال او ۸۲ ورځو کې د بای ني کلي د ۸۸ کورنيو ۴۱۸ تنه له بېوزلۍ څخه ووتل او د کلي د بېوزلۍ انډول له ٪۲۲.۸۸ څخه ۲.۷۱٪ ته راټيټ شو.
د ۲۰۱۹م کال د جون د ۱۷مې نېټې په سهار د بای ني کلي په شاوخوا سيمو کې سخت باران اورېده او هوانګ ون شيو د دغه کلي وضعيت ته سخته اندېښمنه شوې وه او سهاروختي يې له بای سه ښار څخه د یاد کلي په لور حرکت کړی و، خو په لاره کې ډېر سيلابونه راوتلي وو او د هغې ژوند يې هم واخیست او مړه شوه.
هغې په دېرش کلنۍ کې د خپلو خلکو د خدمت پر لاره ځان قرباني کړ.
د چين د کمونېست ګوند د جوړېدو د سلمې کليزې په درشل کې نوموړې ته د ګوند تر ټولو لوړ افتخاري نښان يعنې د جولای لومړۍ نښان هم ډالۍ شوی دی. د کمونېست ګوند د مرکزي کمېټې عمومي منشي شي جين پينګ د افتخاري نښانونو د ورکولو په مراسمو کې د هوانګ ون شيو په شمول ټول نښان ګټوونکي وستايل.
چين له بېوزلۍ سره مبارزې کې ستر برياليتوب تر لاسه کړی او په کور دننه يې د مطلقې بېوزلۍ د له منځه وړلو مهمه او ستونزمنه دنده تر سره کړې ده.
د اغلې هوانګ ون شيو په شمول ډېرو مامورينو، چې د دغې مبارزې په درشل کې يې خپل خوږ ژوند بايللی، تل به زموږ په ياد وي او د دوی روحيه به په نوې زمانې کې د چينايانو د کوښښونو لارې وځليږي.
