د حکومت یو منتقد او د حراست او ثبات شورا د سیاسي برخې مشر عمر داودزي د ملي یووالي حکومت په وروستیو کې حکومتي دنده اخیستې ده. نوموړی د سولې عالي شورا د دارالانشاء رییس او د سولې د اجماع لپاره په سیمه ییزو چارو کې د ولسمشر ځانګړی استازی ټاکل شوی دی. ویل کېږي چې رحمت الله نبیل ته د ملي دفاع وزارت او ځینو نورو سیاستوالو ته هم چې له حکومته بهر فعال دي، د حکومتي څوکیو وړاندیزونه شوي دي.
ډېری کسان فکر کوي چې حکومت دا کار د راتلونکو ټاکنو په موخه کوي، خو اصلي لوبه بل څه ده. حکومت ته ور ګډېدونکي کسان پوهېږي چې د دغه حکومت کمه موده پاتې ده او که ټاکنې کېږي، نو اشرف غني د بیا ګټلو کم چانس لري. له دې سره سره بیا هم حکومتي دنده اخلي. دلته اصلي بحث د موقت حکومت دی. ولسمشر غني به ښايي د ټاکنو لپاره دا ګامونه اخلي، خو اصلي هڅه یې دا ده چې د حکومت د مخالفو سیاستوال پر ور ګډولو سره هڅه کوي، څو د راتلونکي ممکنه موقت حکومت مشرۍ ته هم ځان تیار کړي. حکومت ته ور ګډېدونکي کسان هم فکر کوي چې که بهر پاتې کېږي او ټاکنو ته انتظار کوي، نو ښايي همداسې بهر پاتې شي او ټاکنې ونه شي. اوس په سیاسي کړیو کې دا بحث ګرم دی چې ښايي ټاکنې ونه شي او موقت حکومت جوړ شي. همدې چارې د عمر داودزي په شان د سیاستوالو، چې ان ولسمشرۍ ته د کاندیدۍ خبرې یې کولې، پښې سستې کړې دي او غواړي حکومت ته ننوځي، څو په راتلونکې موقت حکومت کې هم ځای ولري. عمر داودزي نوې دنده ځکه قبوله کړې چې کار یې په سوله پورې اړوندېږي او سوله هغه لاره ده چې که وشي، په دې برخه کې فعال کسان به کرېډېټ اخلي او په راتلونکي حکومت کې یې د پاتې کېدو شونتیا زیاتېږي.
دا چې ټاکنې په رښتیا ځنډېږي او موقت حکومت جوړېږي، که نه، جلا بحث دی، خو له وروستیو بدلونونو ښکاري چې ځینو سیاستوالو ته ښايي له سفارتونو دا پیغامونه رسېدلي وي چې پر ټاکنو د تمرکز پر ځای ښه ده چې په موقت حکومت کې ځان ته ځای پیدا کړي او ان اوس حکومت ته ننوځي، څو په راتلونکي کې ونډه ولري. که له ځینو سرچینو قوي پیغامونه نه وي، د عمر داودزي په شان د حکومت مخالفینو ته به سخته وي چې د حکومت په دې وروستیو کې سترګې خړې کړي او پر حکومت ور ننوځي. له بله اړخه لکه څنګه چې مو یادونه وکړه ولسمشر د مخالفو سیاستوالو په حکومتي کولو سره په دوو اړخونو کې د ګټې تمه لري. که ټاکنې کېږي، تمه لري چې دا کسان به ورسره مرسته وکړي او ځان به بیا د پنځو کلونو لپاره ولسمشر کړي. که ټاکنې نه کېږي، نو حکومت ته د بېلابېلو ډلو او کړیو د سیاستوالو په راوستلو سره ښيي چې هغه د مخالفینو د یو ځای کولو وړتیا لري او په دې ډول کولی شي د موقت حکومت مشري هم وکړي.
که موقت حکومت جوړېږي او هدف یې د سولې په چاره کې مرسته وي، نو داسې نه ښکاري چې په هغه حکومت که به ولسمشر غني او د عمر داودزي په شان سیاستوال ځای ولري. که خبره د معاملو، کمپاینونو او پټو شخصي جوړجاړیو وي، نو بیا شونتیا شته چې یو ځل بیا دې پر افغانستان د ملي یووالي حکومت په شان یو عذاب واکمن شي.
