مارک میلي: که افغانستان کې ترهګرې ډلې راپورته شي موږ به اقدام وکړو

د امریکا د وسله والو ځواکونو لوی درستیز جنرال مارک میلي وايي، که په افغانستان کې ترهګرې ډلې راپورته شي، امریکايي ځواکونه به یې پر وړاندې اقدام وکړي. نوموړي چې د امریکا سنا جرګې ته خبرې کولې وویل چې د داعش په ګډون ترهګرې ډلې په افغانستان کې د خپلو فعالیتونو د بیا تنظیمولو هڅې کوي، خو تر اوسه نه دي بریالي شوي. دغه امریکايي جنرال تر دې مخکې ویلي وو چې دغه ډلې به په راتلونکو دوو تر دریو کلونو کې د امریکا خاورې ته ګواښ پېښ کړي. هغه زیاته کړه ترهګرو ډلو تر اوسه د امریکا خاورې ته کوم ګواښ نه دی متوجه کړی، خو نوموړی وايي دوی یې له نږدې څاري. تر دې مخکې د افغانستان سرپرست حکومت ویلي وو چې داعش په فزیکي او عامه توګه په افغانستان کې هېڅ ځای شتون نه لري. د ا.ا مرستیال ویاند انعام الله سمنګاني په یوه ویډیويي پیغام کې ویلي و، چې داعش یوه پدیده چې پخوا په افغانستان کې یو ستر ګواښ بلل کېده خو اوس د هېواد په هرځای کې فزیکي یا عام حضور نه لري.