په افغانستان کې د نقدو پیسو نشتوالي پراخې ستونزې رامنځ ته کړې دي. د افغانستان پر بیا رغونه د امریکا ځانګړې پلټونکې ادارې یا سیګار په تازه څرګندونو کې ویلي چې د نقدو پیسو نشتون په افغانستان کې یو بحران دی او پراخې مالي ستونزې یې رامنځ ته کړې دي.
سرچینه کاږي چې له افغانستان سره د مالي مرستو کمېدل، ددغه هېواد د پیسو کنګل کول او ورته نور عوامل ددې سبب شوي چې په افغانستان کې د نقدو پیسو د کمښت مسئله رامنځ ته شي چې له امله یې د زرګونه دولتي کارکوونکو، ښوونکو او روغتیايي کارکوونکو معاشونه ځنډېدلي او ګډوډي پکې راغلې ده.
سرچینه همدا راز وایي چې دې ستونزې د نړیوالو مرستندویه موسسو او بنسټونو چارې هم له خنډ او ځنډ سره مخ کړې دي.
