افغان حکومت وایي هند په افغانستان کې خپلې پروژې بېرته پيلولی شي. د قطر دفتر غړي او ملګرو ملتونو کې د افغانستان استازولۍ ته نومول شوي دایمي استازي سهیل شاهین په تازه مرکه کې ویلي چې دوی له هند سره د ښو اړیکو غوښتونکي دي.
دده په خبره هند هم کولی شي د نورو هېوادونو په څېر په افغانستان کې ديپلوماتیک ماموریت ولري او له افغانستان سره په بېلو برخو کې د مرستو لپاره خپلې پروژې پيل کړي. شاهین دغه راز وایي چې هند کولی شي دلته خپلې نابشپړې پروژې بشپړې کړي او تر څنګ یې نوې پروژې هم پيلولی شي.
دده په خبره د افغان حکومت مسوولیت دی چې د هند د ديپلوماتیک ماموریت امنیت تامین کړي او دوی ته د ديپلوماتیک ماموریت بشري مرستو زمینه برابره کړي.
