په ننګرهار کې د ولسي جرګې د غړي حضرت علي په مشرۍ د لوی ملي ائتلاف پلويانو پرون د جلال اباد ښار لويې لارې تړلې وې او په پلان شوې بڼه د ولسي جرګې د ټاکنو له ترسره کېدو سره يې مخالفت وکړ.
لاریون کوونکي په لسګونو موټرو کې سپاره د حضرت علي له کوره د ټاکنو کمېسيون د ولايتي دفتر تر مخې ولاړل او هلته يې خپل اعتراضات وړاندې کړل.
دوی پر افغان حکومت، د ټاکنو پر خپلواک کمېسيون او نړيوالې ټولنې غږ وکړ چې په ټاکنو کې د بايومېټريک ټکنالوژۍ کارونې ته دې لاره هواره کړي.
د ولسي جرګې او لوی ملي ائتلاف د رهبرۍ شورا غړي حضرت علي وويل: «زموږ غوښتنه د شفافيت رامنځته کول دي، په انتخاباتو کې او د کمپيوټري انتخاباتو غوښتونکي يو، که مو غوښتنه ونه منل شي، خپلو اعتراضونو ته دوام ورکوو».
دی وايي، د افغانستان لوی ملي ائتلاف پرېکړه کړې چې که په ټاکنو کې د شفافيت د رامنځته کېدو غوښتنه ونه منل شوه؛ نو د ټاکنو دفترونه به تړل کېږي او دغه راز به له کابل سره د ټولو ولايتونو او د ولايتونو له مرکزونو سره د ټولو ولسواليو لارې د دوی د پلويانو له لوري وتړل شي.
هغه په جلال اباد کې د ډېر وخت لپاره د خلکو پر وړاندې د لويو لارو تړل کېدو په اړه وويل، موخه يې عامو خلکو ته د ټاکنو شفافيت رامنځته کېدو په تړاو د خپلو غوښتنو رسول دي.
دغه راز د لاريون نورو ګډونوالو هم په را روانو ټاکنو کې د شفافيت د رامنځته کېدو غوښتنه کوله او ټينګار يې کاوه چې دا ځل بيا به د تېرو ولسمشريزو ټاکنو په څېر د ولس پر رايه معامله ونه شي.
د لاريون کوونکو له ډلې سپين ږيري شېرولي وويل، که يې په ټاکنو کې د شفافيت د رامنځته کېدو په اړه غوښتنې ونه منل شي؛ نو دوی به په را روانو ټاکنو کې برخه هم وانخلي.
دغه راز د حبيب الله حنيفي په نوم يو بل لاريون کوونکي وويل، تېر ځل ولس په ډېرو سختو شرايطو کې په ټاکنو کې برخه واخيسته، ګوټې غوڅې شوې؛ خو اخره کې يې پر رايه معامله وشوه، چې دا ځل تر ټاکنو وړاندې بايد حکومت د دغه ډول کړنو نه تر سره کولو ډاډ ورکړي.
د يادونې ده چې تېره اونۍ دغو کسانو د ټاکنو د خپلواک کمېسيون د ولايتي دفتر دروازه تړلې وه چې د شپې له خوا پوليسو پرې عمليات وکړل، دروازه يې پرانيسته او ١٥ تنه يې ونيول.
افغان حکومت او د ټاکنو کمېسيون که څه هم د لوی ملي ائتلاف له لوري د لاريونونو ترسره کول د هغوی مدني حق ګڼي، خو وايي، د ټاکنو د دفترونو دروازې تړل د راتلونکو ټاکنو پر وړاندې خنډونه رامنځته کوي.
