د شتمنۍ د ثبت او څېړنې اداره وايي، چې په تېرو شپږو میاشتو کې یې د افغان دولت د ۱۵زره لوړپوړو او په شرایطو برابرو مامورینو شتمنۍ ثبت کړې دي.
د شتمنۍ د ثبت او څېړنې ادارې ريیسې ناهید ایثار پرون د دې ادارې د شپږ میاشتني رپوټ د خپرولو پر مهال خبریالانو ته وویل، چې د حکومتي چارواکو شتمنۍ لومړی ثبت، ورپسې نشر او بیا څېړل کېږي.
آغلې ایثار زیاته کړه: «موږ له نېکه مرغه د لومړي ځل لپاره په شپږو میاشتو کې شاوخوا ۱۵زره فورمې ثبت کړې دي، د ټولو عالي رتبه چارواکو فورمې ثبت شوې دي او د یو شمېر کارکوونکو فورمې پاتې دي، کابل په ټوله کې پای ته رسیدلی دی، په کابل کې په شرایطو د برابرو کارکوونکو د شتمنیو ثبتول پای ته رسېدلي دي، د ولایتونو په کچه او له هېواد څخه بهر لکه سفیران او یا په شرایطو برابر کسان د غړیتوب او ځینو امنیتي ستونزو له امله، موږ ته یو اندازه کم رسېدلي دي، خو په ټوله کې د ثبت پړاو پای ته رسېدلی دی».
د هغې په وینا، تر اوسه د ۳۵۰ دولتي چارواکو د شتمنیو فورمې نشر شوې دي.
د چارو ادارې په خپله وېبپاڼه کې د یو شمېر لوړپوړو دولتي چارواکو د شتمنیو په اړه معلومات نشر کړي چې د ولسمشر محمداشرف غني او د جمهوري ریاست د دویم مرستیال سرور دانش په ګډون، د چارو ادارې د ټولو کارکوونکو، د اجرائیه ریاست د مرستیالانو، ۱۲ والیانو، د کابینې د غړو او د وزارتونو د مرستیالانو، د خپلواکو ادارو او کمېسیونونو د ريیسانو او د یو شمېر نورو چارواکو نومونه پکې شامل دي.
په دغه نوملړ کې د ولسمشر غني نقدي شتمنۍ ۳۲۰ میلیونه افغانۍ او د هغه د دويم مرستيال سرور دانش ۶۰ زره امریکايي ډالره ثبت شوې دي.
د اجرائیه ريیس عبدالله عبدالله او د ولسمشر د لومړي مرستيال عبدالرشید دوستم د شتمنیو په اړه پکې معلومات نه دي نشر شوي.
د شتمنۍ د ثبت او څېړنې اداره ۹ کاله مخکې له فساد سره د مبارزې د عالي ادارې په چوکاټ کې جوړه شوې، خو دغه اداره شاوخوا شپږ میاشتې وړاندې د ولسمشرۍ د چارو د ادارې په تشکيلاتو کې ور ګډه شوه.
د قانون له مخې دا اداره مکلفه ده چې د ټولو لوړپوړو دولتي کارکوونکو شتمنۍ، د هغوی د کار له پیله بيا د خدمت د دورې تر پایه پورې ثبت او نشر کړي.
حکومت وايي چې دغه اقدام د فساد او د عامه شتمنیو د لوټولو د مخنیوي، د خلکو، مدني ټولنې او دولت ترمنځ د نظارتي جوړښتونو د رامنځ ته کولو او د باور فضا د جوړولو په موخه ترسره کېږي.
