د امریکا نوي حکومت په دې وروستیو کې ګڼو هېوادونو ته د تعرفو ګواښونه کړي او په لومړي ګام کې يې پر ټولو وارداتي فولادو او المونیمو ۲۵ سلنه تعرفې لګولي او له خپلو اړوندو ادارو څخه یې غوښتي، چې د هر بهرني سوداګریز همکار پر وړاندې “متقابلې تعرفې” ته چمتوالی ونیسي. واشنګټن اوس تازه اعلان کړی، چې پر وارداتي موټرو، چپسو، درملو، لرګیو او د ځنګلونو پر تولیداتو به ۲۵ سلنه تعرفې ولګوي.
د امريکې دغه اعلان د اروپايي ټولنې او ډېرو اروپایي هېوادونو سخت غبرګونونه راپارولي دي.
شنونکي وايي، د امریکا دغه کړنې به د اروپا کلیدي صنايعو ته سخت زیانونه ورسوي، بازار به یې ورګډوډ کړي، د سوداګرۍ او پانګونې باور به یې له منځه یوسي او د اقتصادي ودې ستونزې به يې لا پسې زیاتې کړي. د امریکا د “تعرفې ګواښ” به د ډېرو اروپایي هیوادونو اقتصادي حالات لا سخت کړي او په عمده توګه به يې د فولادو او موټرو په څېر مهمې چارې ورزیانمنې کړي.
د امریکا لخوا پر فولادو او المونیمو ۲۵ سلنې تعرفې به د اروپایي هېوادونو د تولیداتو پر صادراتو ډېره اغېزه ولري او د اروپا د فولادو د چارو وضعیت به نور هم خراب کړي.
د اروپا د فولادو د چارو ټولنې معلومات ښیې، چې امریکا د اروپایي ټولنې د فولادو تولیدوونکو لپاره دوهم لوی صادراتي بازار دی او دغه هېواد ته د اروپایي ټولنې د فولادو صادرات په تېر ۲۰۲۴م کال کې د دغې ټولنې د فولادو د عمومي صادراتو ۱۶ سلنه برخه جوړوي.
د اروپا د فولادو ټولنې مشر هنریک ادم رسنيو ته ويلي، چې اروپایي ټولنه به د امریکا د لوړو تعرفو له امله هر کال دغه هېواد ته د ۷/۳ میلیونو ټنو فولادو صادرات له لاسه ورکړي او دا به د اروپا د فولادو چارې نه يوازې ټکنۍ، بلکې ویجاړونکې اغېزه به پرې ولري.
د اروپا د موټرو چارې هم له لويو ننګونو سره مخ دي. که امریکا په وارداتي موټرو ۲۵ سلنه تعرفې وضع کړي، نو د دغه هېواد په بازار کې به د اروپایي موټرو سیالي د پام وړ کمه او د موټرو چارو د پرمختګ پر وړاندې به یې اوږدمهاله ګواښونه رامنځته شي.
د اروپايي کمیسیون د سوداګرۍ کمېټې غړي والدیس دومبروفسکیس په دې وروستیو کې د یورو ګروپ یوې مطبوعاتي غونډې ته ويلي، چې د امریکا د سوداګريزې تګلارې له امله رامنځته شويو ناڅرګندتیاوو د پام وړ زیاتوالی موندلی او د اروپایي ټولنې په ګډون پر نړیوال اقتصاد به هم بد اغېز ولري.
