د بريټانيا چانسلرې يا د ماليې وزيرې ريچل ريويز چين ته سفر پيل کړی، ځکه د دې تر سرپرستۍ لاندې د بريټانيا د ماليې وزارت له توپاني څپو سره مخ دی.
د سوداګريزو سفرونو د برياليتوب يوه کيلي وخت دی. د ريويز لپاره چې تازه یې د بريټانيا په کابينه کې د يوې مهمې اقتصادي څوکۍ چارو ته اوږه ورکړې ده، بيجينګ او شانګهای ته د سفر ښه وخت نه دی.
له دې هر څه سره سره، د ريويز لپاره لا يوه هيله ژوندۍ ده، ځکه ښايي سپينې ماڼۍ ته د ټرمپ د بېرته ګرځيدو د نړيوالو اندېښنو په ترڅ کې له چين سره د همکاريو روحيه پيدا شي. د نړۍ په ګوټ ګوټ کې د پورونو پاڼې د تقويه کېدو او اتحادونه د نوي کېدو په حال کې دي او هېوادونه د تعرفو د جګړې په تړاو، چې هېڅ هېواد تر خوندي نه دی، محتاطانه عمل کوي. ريويز وويل :«موږ کولی شو چې له چين سره داسې اوږدمهالي اقتصادي روابط جوړ کړو چې د دواړو لورو له ملي ګټو سره برابر وي».
د بريټانيا په سوداګريز پلاوي کې د انګلستان د بانګ مشر انډرو بيلي او د بريټانيا د مالي اقدام ادارې رييس هم شامل دي.
د بريټانوي پلاوي ترکيب ته په کتو، داسې ښکاري چې دغه هېواد له چين سره د لندن او شانګهای تر منځ د مالي خدمتونو په برخه کې د اړيکو پراختيا ته لېواله دی.
پر دې سربېره، د چين – بريټانيا اقتصادي او مالي ډيالوګ يا د دواړو هېوادونو تر منځ د کلنيو ناستو ټولګه، تر شپږ کلن ځنډ وروسته بيا فعال شوی دی. په حقيقت کې چين ته د ريويز سفر په ۲۰۱۷م کال کې د فلېپ هاموند تر سفر وروسته د بريټانيا د وزيرانو لومړی سفر دی.
هاموند په خپله د وزيرې ريويز د سفر د وخت په اړه څرګنده کړې او بي بي سي ته یې ويلي: «زه وزيرې ريويز ته وړانديز نه کوم چې چين ته خپل سفر لغوه کړي. زه فکر کوم چې چين ته سفر مهم دی او زه فکر کوم چې موږ بايد د هغې تر بېرته را ستنېدو پورې منتظر شو، خو په ورته مهال زما فکر دا دی چې نوموړې بايد له بېرته را ستنېدو وروسته پارلمان ته د روان وضعيت په تړاو ډاډ ورکړي».
د دغه اطمينان د يوې برخې په توګه به، د ماليې وزارت دې ته لېواله وي چې د چين په ګډون له خپلو پور ورکوونکو سره اړيکې پياوړې کړي. د انګلستان د پورونو د اضافي لګښتونو د ډيريدو يو سبب له بدلون موندونکو نړيوالو اقتصادي ځواکونو سره د هغه مخامخ کېدل دي. د ډويچه بانک ستراتيژېست جورج ساراويلوس ټايمز ته ويلي: «څومره چې يو هېواد په کور د ننه د پورونو د ورکړې لپاره پر بهرنيو پورونو تکيه کوي هغومره یې نړيوال چاپېريال ته ډير پام کوي. بريټانيا د جي لس په غړو کې تر ټولو ډيره اسيب پذيره ده.
د انګلستان بانک پخواني مشر په ۲۰۱۶ کال کې د بريکزيټ تر ټولپوښتنې وروسته خبرداری ورکړی و چې د بريټانيا اقتصاد د پرديو پر هوساينې تکيه دی. وزيره ريوز هيله منه ده چې چين ته تر نهه کلن ځنډ وروسته د بريټانوي وزير په توګه د هغې سفر يو خاص «پردی» پر خاص شريک بدل کړي.
