د نړۍ ۹ هېوادونه (اندونيزيا، ماليزيا، تايلنډ، بېلاروس، بوليويا، کيوبا، قزاقستان، ازبکستان او يوګانډا) د ۲۰۲۵م کال د جنورۍ له لومړۍ نېټې څخه د بريکس د همکارو هېوادونو په توګه ټاکل شوي، چې دا د بریکس ميکانيزم د پرمختيایي جريان يو بل مهم پرمختګ دی او هم په ۲۰۱۷ کال کې د شا من ښار د بریکس په سرمشريزې کې د چين د دولت رئيس شي جين پينګ له خوا د وړاندې شوي بریکس ميکانيزم بل بريالی ستراتيژيک عمل دی.
د بريکس په لویې کورنۍ کې د نورو هېوادونو برخه اخيستنه ددې ښکارندويي کوي، چې د دغه سازمان همکارۍ نوي پړاو ته داخلې شوې دي.
په بريکس کې د نهو همکارو هېوادونو ګډون، چې بېلا بېل جغرافيايي مقامونه، کلتورونه او تاريخونه لري، د دغه سازمان د استازيتوب د لاپياوړتيا لپاره ګټور ګام بلل کېږي. د بريکس د همکاريو ميکانيزم، چې د لوېديځو هېوادونو له ايډيولوژيکي مقاومت او د ډلو له طبقه بندۍ سره ستر توپیر لري، له څو اړخیز همکاريز موډل څخه ملاتړ کوي او ځانګړنه يې پرانيستې او انعطاف منونکې ده او همدا لامل دی، چې ډېری هېوادونه غواړي د دغې لويې کورنۍ برخه شي او د نړيوالې ادارې د اصلاحاتو لپاره ګډې هڅې وکړي.
په وروستيو کلونو کې د نړۍ د سراسري جنوب قوت ډېر پياوړي شوي او اقتصادي پرمختګ ته په کتو، په نړيوال اقتصاد کې د دغو هېوادونو برخه په سلو کې له څلوېښتو څخه زياته شوې ده.
د ملګرو ملتونو د سوداګرۍ او پرمختګ د غونډې سرمنشي ګرينسپان اټکل کړی، چې په راتلونکو پنځو کلونو کې به د نړۍ د کورني توليد عمومي ارزښت ۵۵ ټريليونو امريکايي ډالرو ته ورسېږي، چې په دې جملې کې به اويا سلنه سراسري جنوب پسې تړاو ولري. د نړۍ د سراسري جنوب د لومړۍ ډلې په توګه، د بريکس هېوادونو عمومي اقتصادي اندازه، د جي ۷ یا د اوو سترو هېوادونو له ورته اندازې اوښتې او د نړيوال اقتصادي پرمختګ لپاره يې خدمتي انډول له ۵۰ سلنې څخه ډېر شوی دی. نو همدغو ټکو ته په کتو، د نړۍ سراسري جنوب هېوادونه د نړيوال اقتصاد د بيا سمسورتيا او دواملرونکي پرمختګ لپاره مهم ځواک ګرځېدلی دی.
د بريکس هېوادونه نه يوازې په نړۍ کې له حياتي ځواک څخه ډک نوی سمسور اقتصادونه، تر ټولو پراخ بازارونه او د سوداګرۍ تر ټولو غوره شرايط لري، بلکې تر ټولو غني سرچینې هم لري او د نويو سمسورو بازارونو د سرچینو او پرمختګ د غوره والي استازيتوب کوي. د بريکس د همکارو هېوادونو پراخوالي د نړۍ د څو قطبيز کېدو لپاره ګټوره زمينه برابره کړې او په تېره بيا دغو هېوادونو د لوېديځ د بنديزونو او فشارونو پر وړاندې د سوداګرۍ، انرژۍ او پولي چارو په برخو کې غږونه پورته کړي او د نړۍ پاملرنه یې راجلب کړې ده.
په بريکس کې د نويو همکارو هېوادونو له شاملېدو سره هممهاله، په جيوپوليټيکي او اقتصادي چارو کې د دغه سازمان استازيتوب لوړ شوی او دغې چارې د څو قطبيزې نړۍ ابادي په خوځښت راوستلې ده. بريکس همکارۍ یوازې په خبرو کې نه، بلکې هر څه په عمل کې ثابتوي. د بېلګې په توګه د بريکس هېوادونو پرمختيايي بانک د ۲۰۲۳م کال تر پايه پورې په غړو هېوادونو کې ۱۰۵ پروژې منظورې کړي، چې عمومي پانګه يې ۳۵ ميليارډه امريکايي ډالره ښودل شوې ده. ياد بانک د موجود پولي سيسټم لپاره ګټور بلل شوی او هم د نړيوال پولي سيسټم ژور اصلاحات پرمخبیولی شي.
چين د بريکس هېوادونو د بنسټګر او د نړۍ د سراسري جنوب د يوه مهم غړي په توګه د پرمختيايي هېوادونو باوري او اوږدمهاله همکار دی او د نړيوالو پرمختيايي چارو د ترسره کولو لپاره عملي ګامونه پورته کوي. چين به د بريکس هېوادونو له غړو او همکاريزو هېوادونو سره يو ځای د ورخلاصون، ټولشموليت او د همکاريو له لارې د ګډو برياليتوبونو د ترلاسه کولو د روحيې په رڼا کې په بېلا بېلو برخو کې واقعي همکارۍ وکړي، د بريکس هېوادونو د همکارۍ ميکانيزم د باکيفيته پرمختګ د موندلو او د انسانانو د ګډ برخلیک د ټولنې د ابادۍ لپاره به ګډې هڅې وکړي.
