سیګار: امریکا تېر یوه کال کې افغانستان سره ۸۰۰ میلیونه ډالره مرسته کړې

د افغانستان د بیارغونې لپاره د امریکا د څار ځانګړې اداره یا سیګار وايي، چې له تېر یوه کال راهیسې یې هېواد له افغانستان سره د شاوخوا ۸۰۰ میلیونه ډالرو مرسته کړې ده. د سیګار مشر جان سوپکو په یوه مرکه کې ویلي، چې که څه هم تېر کال له افغانستان څخه ټول امریکايي ځواکونه وتلي، خو بیا هم دوی له افغانستان سره په بېلابېلو بشري برخو کې شاوخوا ۸۰۰ میلیونه ډالره مرسته کړې ده. د سیګار مشر ویلي، اوس هم امریکا په افغانستان کې خپلې ګټې لري او بله داچې اوس هم افغانان مرستو ته اړتیا لري. د سوپکو په وینا افغانستان سره شوې ډيرې مرستې له لوږې سره مخامخ شویو خلکو ته رسیدلي او یوه برخه یې پر روغتیايي چارو لګول شوي دي. سیګار دغه راز د امریکا کانګرس ته په یوه تازه استول شوي راپور کې ویلي چې د فغانستان د نفوس ۹۲ سلنه خلک د خوړو له کمښت سره مخامخ دي او مرستو ته اړتیا لري.