د چين دولت رئيس شي جين پينګ د مې په ۲۲مه نېټه د فرانسې د ولسمشر ايمانويل ماکرون په بلنې له نوموړي سره ټېليفوني خبرې وکړې.
شي جين پينګ په ټېليفونې خبرو کې د تېر کال په مې کې له فرانسې څخه د ده په ليدنې کې لاسته راوړنې يادې کړې او ويلي يې دي، چې له دې سفر وروسته د دواړو هېوادونو ترمنځ همکارۍ پرمختګ موندلې دي. هغه زياته کړې، چې دواړه خواوې بايد د پانګونې، هوانوردۍ او اټومي انرژۍ په شمول پر عنعنوي برخو بر سېره د ډيجيټلي چارو، زرغونتوب، بيولوژيکي طب او درملو او د زاړو اقتصاد په شمول په نوي ټوکېدونکو برخو کې همکارۍ پياوړې کړي او کلتوري تبادلې دې زياتې کړي.
روان کال د فاشيزم ضد نړيوالې جګړې د برياليتوب او د ملګرو ملتونو د جوړېدو له ۸۰مې کليزې سره برابر دی. شي جين پينګ پر دې ټينګار کړی، چې چين او فرانسې د ملګرو ملتونو د امنيت شورا د دايمي غړو او خپلواکو هېوادونو په توګه له دغې جګړې وروسته د نړيوال نظام بنسټګر او ابادوونکي دي او بايد يووالی او همکاري پياوړې کړي، د ملګرو ملتونو صلاخيت او مقام د خونديتوب لپاره دې ګډې هڅې وکړي، نړيوال سوداګريز اصول او نړيوال اقتصادي سيسټم دې وساتي او رښتينی څواړخيزم دې عملي کړي.
شي جين پينګ اروپا د نړۍ له څو قطبيو څخه يوه قطبي بللې او ويلي يې دي، چې چين په نړيوالو چارو کې د اروپا د رول د پياوړتيا ملاتړ کوي او غواړي له اروپا سره د نړيوالو ننګونو د ليري کولو همکارۍ.
ماکرون د فرانسې او چين، اروپا او چين ترمنځ اړيکې د نړۍ لپاره مهمې بللي او په ټېليفوني خبرو کې يې ويلي، چې د بدلېدونکو نړيوالو حالاتو پر وړاندې به د فرانسې هغه دريځ بدل نه شي، چې له چين سره اړيکو ته په درنه سترګه ګوري او د يو چين پېژندنې پر اصل ټينګار کوي.
دواړو مشرانو په ټېليفوني خبرو کې د اوکراين مسئلې، د فلسطين او اسرائيلو ترمنځ د شخړې او د ايران د اټومي مسئلې په شمول د نړيوالو او سيمه ييزو چارو په اړه د نظريو تبادلې کړې دي.
