د چين د دولت رئيس شي جين پينګ د مې په ۹مه نېټه د روسيې په پلازمېنه مسکو کې د پخواني شوروي اتحاد لخوا د وطن د دفاع جګړې د برياليتوب ۸۰مې کليزې د يادونې په پار جوړ شوي رسم ګذشت کې د ګډون په ترڅ کې د کيوبا د دولت رئيس ميګوېل دياز کانېل بېرمودېز سره لیدنه کړې.
شي جين پينګ په ياده لیدنه کې ويلي، چې په دې وروستيو کلونو کې مې له رئيس دياز سره څو څو ځله ليدنې کړې او په ګډه سره مو د چين او کيوبا متقابل سياسي اعتماد لا نور ژور کړی، خپلمنځي ستراتيژيکې همکارۍ مو لا نورې زياتې کړې او د دواړو هېوادونو د خلکو ترمنځ دوستي مو لا ټينګه کړې. د هغه په وينا، چې سږکال د چين او کيوبا ترمنځ د رسمي اړيکو د ټينګېدو له ۶۵مې کليزې سره برابر دی او هيله يې ښودلې، چې د دواړو هېوادونو دوستي لا ټينګې کړي او د چين او کيوبا د ګډ برخليک ټولنه نوره هم اباده کړي. هغه زياته کړې، چې هېواد يې له کيوبا څخه کلک ملاتړ کوي، چې خپل ملي حاکميت خوندي وساتي، له بهرنۍ لاسوهنې او بنديز سره مخالفت وکړي او اقتصادي او ټولنيز پرمختګ ومومي.
ميګوېل دياز کانېل بېرمودېز ويلي، چې چین د کيوبا ښه ورور او ملګری دی او له چين څخه يې مننه څرګنده کړې، چې په تېر اوږد مهال کې يې د کيوبا له اقتصادي او ټولنيز پرمختګ څخه لوی ملاتړ کړی دی. هېواد يې د يو چين پېژندنې پر اصل ټینګار لري او غواړي له چین سره متقابله ګټه لرونکې همکارۍ پياوړې کړي، د خلکو ترمنځ دوستانه تګ راتګ زيات کړي، په نړیوالو او سيمه ييزو چارو کې همغږي او همکارۍ ټينګې کړي، د ګډ برخليک د ټولنې ابادۍ پياوړې کړي او د دواړو هېوادونو ترمنځ اړيکو ته لوی پرمختګ ورکړي.
