د چين د دولت رئيس شي جين پینګ د اکتوبر په ۱۳مه نېټه د بېجينګ د خلکو په لوی تالار کې د بوتسوانا له ولسمشر بوکو سره خبرې اترې وکړې. دواړو مشرانو د چين او بوتسوانا د هراړخيز ستراتيژيک مشارکت د جوړولو اعلان کړی دی.
شي جين پینګ په خپلو خبرو کې ويلي چې بوتسوانا د تېرې پېړۍ په اوومه لسيزه کې له چين سره د ديپلوماتيکو اړيکو له ټينګېدو مخکې په ملګرو ملتونو کې د چين د قانوني څوکۍ اعاده کېدو ته موافقه رایه ورکړې ده. اوس دواړو خواوو د عصريتوب په لار کې لاسونه يو کړي او د خپلمنځي دوستۍ د پياوړتيا په ګده هڅه کې دي. چين د خپلو شرايطو له مخې د ځانګړې پرمختيايي لارې د غوره کولو په پار له بوتسوانا ملاتړ کوي. دواړه خواوې دې د اقتصادي او سوداګريزو همکاريو چوکاټ بشپړ کړي او د چين د صفر ګمرکي تعرفې له تګلارې څخه دې ګټې پورته کړي. چين غواړي چې د ديجيلي اقتصاد، کرنې او مالدارۍ په شمول چارو کې له بوتسوانا سره همکارۍ زياتې وکړي، ځيرکې تعليمي پروژې پلې کړي او د بوتسوانا اقتصادي او ټولنيز پرمختګ ته مرستې برابرې کړي.
د بوتسوانا ولسمشر بوکو ويلي چې هېواد يې له چين سره اړيکو ته په درنه سترګه ګوري او د يوه چين د پېژندلو پر اصولو ټينګار لري، د تايوان د بېلتون غوښتونکو له دسيسې او د چين په کورنيو چارو کې له هر ډول لاسوهنې سره مخالفت کوي. بوتسوانا د هېواد د پرمختګ لپاره د چين له اوږدمهاله مرستو او ملاتړ څخه مننه کوي او غواړي چې د چين له پرمختیايي ستراتيژۍ سره وصل کړي. د دې ترڅنګ هېواد يې د چينايي تصديو د پانګونو هرکلی کوي. هغه هيله ښودلې چې د کمربند او لارې د ابادۍ، صنایعو، کرنې، کانونو، نوښت او ډيجټلي کېدو په برخو کې له چين سره پراخې همکارۍ وکړي، څو په دوه اړخيزو اړيکو کې لا زياتې واقعي لاسته راوړنې ولري.
