د چین صدراعظم لي چيانګ د مې د ۲۶مې نېټې په شپه په کوالالمپورکې د مالیزیا له صدراعظم انور بن ابراهیم سره وکتل.
د چین صدراعظم لي چيانګ په دې کتنه کې ویلي، چین غواړي چې له مالیزیا سره د لوړ پوړو چارواکو ترمنځ نږدې تماسونه وساتي، ستراتیژیکه همغږي پیاوړې کړي او د چین ـ مالیزیا د ګډ برخلیک ټولنې لپاره سیاسي باور نور هم ټینګ کړي. هغه زیاته کړې چې دواړه خواوې باید په سوداګرۍ، پانګونې او نورو برخو کې د همکارۍ کچې نورې هم پراخې کړي، د ډیجیټل اقتصاد، زرغون اقتصاد او مصنوعي ځیرکتیا په څېر نویو ساحو ته ډیر پام وکړي او د صنعت، اکمالاتو او ارزښت ځنځیرونو یو ځای پرمختګ ته وده ورکړي.
نوموړي دغه راز ویلي چې چين او ماليزيا بايد د ماليزيا-چين کوانتان صنعتي زون، د چين-ماليزيا د چينګژو صنعتي زون او د ختيځ ساحل د رېل پټلۍ په شمول لویې پروژې په ښه توکه بشپړې کړي، ترڅو د دواړو هیوادونو اقتصادي پرمختګ لپاره ځواک چمتو کړي.
د مالیزیا صدراعظم هم ویلي چې چین د مالیزیا ښه ګاونډی او ملګری دی. هغه زیاته کړې چې تیره میاشت مالیزیا ته د چین د ولسمشر شي جين پينګ تاریخي سفر ډېر بریالی و. دی وايي، مالیزیا له څو اړخیزتوب څخه کلک ملاتړ او په « هراړخیز او پرمختللي ترانس ـ پسیفیک ملګرتیا تړون» کې د چین له شتون څخه ملاتړ کوي. نوموړي زیاته کړې چې مالیزیا غواړي له چین سره یوځای کار وکړي ترڅو د اسیان-چین-د خليج همکارۍ شورا لومړۍ سرمشریزه ښې لاسته راوړنې ولري.
