په ضمانت د نواز شریف د خوشې کېدو غوښتنه رد شوې

د پاکستان یوې محکمې له زندانه د دې هېواد د پخواني لومړي وزیر نوازشریف په ضمانت د خوشې کېدو غوښتنه رد کړې ده. دا خبره د هغه د ګوند مشر خواجه اصف کړې او ویلي یې دي چې د محکمې ددغې پرېکړې په وړاندې به بیا هم د استیناف غوښتنه وکړي. نواز شریف چې په مالي فساد تورن دی په اوو کلونو بند محکوم شوی دی. د نوموړي مدافع وکیلانو ویلي چې هغه ته دې د روغتیایي وضعیت د نه ښه والي له امله له زندانه د خوشې کېدو حق ورکړل شي. له دې مخکې هم په یوه روغتون کې د هغه درملنه شوې وه چې د پاکستان پخواني لومړي وزیر خاقان عباسي د محکمې یاده پرېکړه خواشینونکي بللې وه. دا په داسې حال کې ده چې نواز، درې دورې د لومړي وزیر پر څوکۍ پاتې شو چې په ۲۰۱۷ میلادي کال کې د مالي فساد په تور د سترې محکمې لخوا سلب صلاحیت او له دندې لرې کړل شو.