ډونالډ ټرمپ؛ له ۶۶ نړۍوالو سازمانونو د امریکا د وتلو فرمان لاسلیک کړ

سپینې ماڼۍ په خپره کړې خبرپاڼه کې ویلي چې ډونالډ ټرمپ یو یادښت لاسلیک کړی چې له مخې یې امریکا له هغو ۶۶ نړۍوالو سازمانونو وځي چې نور د امریکا ګټې نه تامینوي. د سپینې ماڼۍ په خبرپاڼه کې راغلي چې په دغه یادښت کې ټولو اجرایي وزارتونو او ادارو ته لارښوونه شوې چې له ۳۵ هغو سازمانونو سره چې په ملګرو ملتونو پورې تړاو نه لري او دغه راز د ملګرو ملتونو له ۳۱ ادارو سره ګډون او مالي ملاتړ بند کړي چې د امریکا د ملي ګټو، امنیت، اقتصادي سوکالۍ او یا ملي حاکمیت پر ضد فعالیت کوي. سرچینې زیاته کړې، چې دا پرېکړه د هغې ارزونې په تعقیب شوې چې د روان کال په پیل کې د ولسمشر په امر د ټولو نړۍوالو بین‌الحکومتي سازمانونو، کنوانسیونونو او تړونونو په اړه ترسره شوې وه چې امریکا په‌کې غړیتوب لري او یا یې مالي ملاتړ کوي.