د ننګرهار ولایت د ملي امنیت ریاست د ځانګړې قطعې ځواکونو د دغه ولایت په سرحدي ښارګوټي تورخم کې څلور کسان د ټاکنو د جعلي سټېکرونو د لېږد په تړاو نيولي دي.
د دغه ریاست د خبرپاڼې له مخې؛ نیول شویو کسانو هر یو د لارۍ چلوونکی بادام ګل د خانه ګل، محمد فهیم د محمد سلیم، عطاالله د حضرت محمد او عمران د رحمان ګل زامنو منلې، چې د ټاکنو ياد جعلي سټېکرونه یې په پېښور کې جوړ کړي او غوښتل یې د خانه ګل د زوی بادام ګل په لارۍ کې یې کابل ته ولېږدوي چې موخې ته له رسېدو وړاندې ونیول شول.
خبرپاڼې دا هم په ډاګه کړي چې یادو کسانو غوښتل ياد جعلي سټېکرونه د تلې د ۲۸ مې نېټې په ټاکنو کې وکاروي او په دې توګه پراخو درغلیو ته زمینه برابره کړي.
دا په داسې حال کې ده چې شاوخوا يوه مياشت مخکې د افغانستان لوی ملي ائتلاف لسګونه زره داسې جعلي تذکرې رسنيو ته وښودې چې ويل کېدل جعلي سټېکرونه هم پرې لګېدلي دي.
د ټاکنو خپلواک کمېسيون د سياسي ګوندونو او جريانونو تر سخت فشار وروسته هوکړه کړې چې په راتلونکو ټاکنو کې به د درغليو د مخنيوي لپاره بايومېټريک ټکنالوژي کاروي چې وسايل يې پرون کابل ته را ورسېدل.
