شېرپاو: تر هغه چې افغانستان ته ثبات را نه شي پاکستان هم نه شي امن کېدلی

د افغانستان ثبات د ټولې سیمې د امنیت او سولې لپاره ارزښتمن دی. په پاکستان کې د وطن قومي ګوند مشر آفتاب احمد خان شېرپاو ویلي که پاکستان غواړي چې هېواد یې امن او با ثباته شي نو د افغانستان په ثبات او سوله کې دې مرسته وکړي. دده په خبره د افغانستان ثبات د ټولې سیمې، د امنیت، سولې او ثبات لپاره کیلي ده او تر هغه چې په دغه هېواد کې امنیت نه وي راغلی د سیمې امنیت ناممکن دی. نوموړي د پاکستان پر حکومت او د سیمې پر هېوادونو غږ کړی چې د افغانستان په امنیت او ثبات کې ونډه واخلي او په دې توګه په دغه هېواد کې د اوږدې جګړې د پای ته رسولو تر څنګ ټولې سیمې ته سکون راولي. د شېرپاو په خبره که افغانستان امن شو، نو په ټوله سیمه کې به د امنیت تر څنګ ستر اقتصادي او سوداګریز پرمختګونه هم رامنځ ته شي. نوموړي همدا راز پر پاکستاني حکومت هم غږ کړی چې په پښتونخوا او نورو قبایلي سیمو کې دې د خلکو حقوقو ته درناوی وکړي او له زور زیاتي دې لاس په سر شي.