وسله والو طالبانو وړمه شپه د وردګو د سيداباد ولسوالۍ پر مرکز تر بريد وروسته د دې ولسوالۍ د امنيې قومندان او ګڼ شمېر پوليس سرتېري وژلي دي.
وسله والو طالبانو دغه راز د سيداباد ولسوالۍ مرکز هم نيولی و چې ويل کېږي د په شا تګ پر مهال يې په لويه کچه وسلې او مهمات له ځان سره وړي دي.
د وردګو والي محمدعارف شاه جهان وايي، په سيداباد ولسوالۍ کې د جګړې له کبله د کابل – کندهار لويه لاره هم تړل شوې وه، خو د کومکي ځواکونو په ور رسېدو سره نه يوازې دا چې د سيداباد ولسوالۍ مرکز بېرته نيول شوی، د کابل – کندهار لویه لاره هم پرانيستل شوې ده.
د وردګو د ولايتي شورا غړی شريف الله هوتک وايي، چې وسله والو طالبانو وړمه شپه د سيداباد ولسوالۍ د ملي امنيت مديريت او ځينو نورو ادارو ودانۍ سوځولې او دغه راز يې د کابل – کندهار لويې لارې ته هم زيان اړولی دی.
د سيداباد په جګړه کې د ۱۴ دولتي منسوبينو مړينه تاييد شوې، خو حکومت ادعا کړې چې ګڼ شمېر طالب وسله وال يې وژلي دي.
د طالبانو ویاند ذبیحالله مجاهد په یو بیان کې د سیداباد ولسوالۍ د مرکز، امنیه قومندانۍ او د امنیتي پوستو د نیولو ادعا کړې او ویلي یې دي چې په دغه برید کې یې دولتي ځواکونو ته درنه مرګ ژوبله اړولې ده.
هغه ویلي چې طالب جنګیالیو له افغان ځواکونو څخه وسلې او مهمات هم نیولي دي.
