په ملي وحدت حکومت کې ځينې لوړپوړي چارواکي د ملي ګټو د خوندي کولو، د اوسني بد حالت د بهبود لپاره د ګډو هڅو او د سولې د بریالي کېدو په برخه کې د یوه همغږي حرکت د رامنځته کولو پر ځای دننه په حکومت کې خپلې شخصي عقدې پالي او په ډېرو وړو مسایلو باندې بوخت دي چې دا ډول کړنې نه یوازې د هېواد په زیان دي، بلکې د سولې پر وړاندې خنډ او یو بل بحران ته لار هواروي.
له تېرو څلوېښتو کلونو راهیسې په هېواد کې د نورو په اشاره او د پردیو ګټو د خوندي کولو لپاره یوه اوږده جګړه روانه ده چې د سون توکي یې افغان زلمي، ښځې، ماشومان، بوډاګان او نور دي، خو ګټه یې یوازې هغه چاته رسېږي چې ددې جګړې د غځېدو اصلي لوبغاړي دي او دلته خپلې شومې او ناوړه برنامې تطبیقوي.
سره له دې چې د همدې جګړو او یرغلونو له لاسه ګڼ افغانان مهاجر شول، زموږ خویندې او میندې لوڅ سرونه سوال ته مجبورې شوې او د نورو په ښارونو کې یې پردیو ته د سوال لمنې وغوړولې، زموږ افغاني غرور او ارزښتونه تر پښو لاندې شول، بنسټونه مو ونړېدل، بشري قوه مو پایمال شوه، علما مو بې عزته شول، د نوم خلک مو د دوو پیسو شول او داسې نورې ډېرې نادودې چې باید نه وای شوې، وشوې، خو بیا هم زموږ سیاسیون او چارواکي له دې څخه پند نه شي اخیستلی او لا ددې ظرفیت نه لري تر څو هېواد له اوسني بد حالت څخه را بهر کړي او د جګړې لمن ورټوله کړي.
اوسنی نظام له تېرو اوولسو کلونو راهیسې زموږ د هغو زلمیو په وینو پایېږي چې د امنيتي ځواکونو په لیکو کې جنګیږي او په دې ډول سره د افغانستان له ننګ، ناموس او غرور څخه دفاع کوي، خو ددې دفاع او د هېواد د بقا لپاره قوي مدیریت، د بنسټونو تقویه کولو، د سیمه ییزې او نړیوالې دیپلوماسۍ او سیاست لا غني کولو، قوي اقتصاد او دننه په هېواد د هر ډول توطیو د شنډولو لپاره یوه غښتلي او یو موټي حرکت ته هم اړتیا ده او ددې لپاره باید کار وشي.
دلته زموږ د بحث موضوع دا نه ده چې په هېواد کې کومې کړۍ له وسله والو طالبانو سره د سولې خنډ دي؟ طالبان د سولې په تړاو څه دریځ لري؟ نړیوال او سیمه ییز قدرتونه په دې برخه کې څومره رښتیني دي؟، بلکې هغه چارواکي مو هدف دي چې د حریف د کمزوري کولو لپاره د عقدوي چلند پر اساس د سولې پروسه ټکنۍ کوي او پر وړاندې یې یو عالم ستونزې ایجادوي.
که چېرې موږ او زموږ سیاسیون غواړي چې په هېواد کې د جنګ کرغېړنه څېره ورکه شي او پر ځای یې سوله حاکمه شي، همدا راز هېواد د چټکې ترقۍ پر لور قدمونه واخلي، نو په کار ده چې خپل منځي واړه اختلافات یوې خواته کړي او د ګډو ګټو د خوندي کولو لپاره یو او بل حمایه کړي تر څو زموږ راتلونکي نسل ته د هوسا ژوند کولو زمینه برابره شي. بیا هم یادونه کوم، که چېرې یو شمېر چارواکي له خپلو مقامونو او دولتي امکاناتو څخه په عقدو پاللو کې ګټه پورته کوي، نو دا لویه تېروتنه ده او دغه تېروتنه به ده ته هم یو ورځ بلا ګرځي او په هغه برخلیک به اخته کېږي چې عام افغانان ورسره لاس او ګرېوان دي.
