د مسکو له غونډې د افغانستان حکومت ناراضه ښکاري او فکر کوي چې له دې غونډې وسله والو طالبانو ګټه پورته کړې ده. بهرنیو چارو وزارت ویلي چې طالبانو ته باید اجازه ورنه کړل شي چې له دې ناستې د وسيلې يا ابزار په توګه ګټه پورته کړي. د بهرنیو چارو وزارت که څه هم ویلي چې دوی د هر هغه هېواد ستاینه کوي چې سولې ته د رسېدو په برخه کې له افغانستان سره مرسته کوي، خو ښکاري چې حکومت فکر کوي د مسکو غونډه د وسله والو طالبانو په ګټه تمامه شوې ده.
د مسکو په غونډه کې د وسله والو طالبانو ګډون او د حکومت نه ګډون رښتیا هم حکومت کمرنګه کړی او دا لومړی ځل دی چې وسله وال طالبان په یوه داسې غونډه کې را څرګندیږي او خپل دریځ پیاوړی کوي. حکومت چې د هر دلیل له مخې په دې غونډه کې ګډون ونه کړ، خو تاوان یې وکړ او په کور د ننه او په نړیواله کچه د پړې ګوته ورته نیول کیږي. په کابل کې چارواکي بیا بیا د افغان حکومت په مالکیت او مشرۍ د سولې په خبرو ټینګار کوي، خو طالبان چې له حکومت سره خبرې نه کوي، نو د دوی په مشرۍ غونډو او خبرو ته خو کله هم نه حاضریږي. اوس چې طالبان له حکومت سره خبرې نه کوي او حکومت هم د مسکو په شان غونډې پرېږدي او نه ورځي، ددې معنا که له یوه اړخه د جګړې دوام دی، له بله اړخه وسله وال طالبان په سیمه ییزه او نړیواله کچه پیاوړي کیږي، خو حکومت د سیمه ییزې انزوا لوري ته ځي. له بله اړخه امریکايي استازي مخامخ له طالبانو سره خبرې کوي او په دې تړاو ان حکومت ته معلومات هم نه ورکوي. دلته بیا حکومت د افغانانو په مشرۍ او مالکیت د سولې د خبرو بحث نه را پورته کوي، خو که روسان طالبان او حکومت یوې غونډې ته را بولي، بیا نو حکومت د افغانانو د مشرۍ او مالکیت خبره را مخکې کوي. له دې ښکاري چې امریکا نه غواړي چې د افغانستان د جګړې او سولې بحث د دوی له انحصار څخه ووځي او بل څوک پکې رول ولوبوي. د همدې په سیوري کې حکومت د مسکو غونډې ته نه دی ورغلی او امریکا هم یوازې د څارونکي په توګه پکې ګډون کړی دی.
د افغانستان حکومت غواړي دا جګړه ختمه شي او سوله راشي. دا سوله که د امریکا او طالبانو ترمنځ د مخامخ خبرو له لارې وي. که په مسکو کې د غونډې له لارې وي او که د افغان حکومت، وسله والو طالبانو او امریکانو د درې اړخیزې او یا هم څو اړخیزې غونډې له لارې وي. مهمه دا ده چې افغانستان ته سوله را وګرځي. له همدې امله افغان حکومت او طالبانو ته پکار ده چې له ضد او ځانغوښتنې تېر شي. د سولې په برخه کې انعطاف وښيي، قرباني ورکړي او د روانې جګړې په ختمولو کې یو له بل سره سیالي وکړي. همدا د افغانانو غوښتنه ده. له دې پرته خلک پوهیږي چې د سولې اصلي مخالفین څوک دي او خلک به اړ شي چې پر ضد یې ګام واخلي.
