د سولې عالي شورا ترڅنګ د سولې د مشورتي بورډ او له طالبانو سره د خبرو لپاره د یو پلاوي ټاکل هغه څه دي چې حکومتي چارواکي یې پر اساس ښيي، د سولې په هڅو کې ښکېل دي. ځینې کسان بیا حکومت څنګ ته شوی او منزوي شوی ګڼي او ان نور یې بیا پر همدې اساس تورنوي چې د سولې پروسې پر وړاندې خنډونه جوړوي. له دې سره لا هم دا پوښتنه بې ځوابه ده چې حکومت په دې پروسه کې چېرته دی او باید چېرته وي؟
حکومت کلونه کلونه د افغانانو په مالکیت او مشرۍ د سولې د پروسې خبره کوله او دا هغه څه دي چې امریکايي چارواکو او ملګرو یې هم تکرارول. امریکايي چارواکي په خبرو کې لا هم وايي چې د افغانانو په مشرۍ او مالکیت د سولې د خبرو ملاتړ کوي، خو ښکاري چې دا خبره په عملي ډول تر پښو لاندې شوې ده. امریکايي استازی په قطر کې له طالبانو سره مخامخ، پټې او ژورې خبرې کوي، خو حکومت پکې نشته. نه یوازې دا چې حکومت په دې خبرو کې نشته، بلکې ویل کېږي چې امریکايي استازی زلمی خلیلزاد په دې تړاو حکومت ته معلومات هم نه ورکوي. اوس کیسه هماغه ښکاري چې په لومړي پړاو کې به امریکا او طالبان خبرې او جوړجاړی کوي او بیا به طالبان له افغانانو سره خبرې کوي. که څه هم طالبان په دویم پړاو کې له حکومت سره خبرو ته حاضر نه دي، خو د امریکا هڅه دا ده چې په دویم پړاو کې حکومت د دې خبرو برخه وګرځوي.
دا چې حکومت د سولې په خبرو کې خنډونه جوړوي، یو څه د تامل وړ خبره ده. دا سمه ده چې حکومت منزوي شوی، په قطر کې د خبرو په اړه معلومات نه لري، د افغانانو په مشرۍ او مالکیت د سولې د خبرو بحث بې مانا شوی، خو داسې نه ښکاري چې حکومت به د دې لویې پروسې پر وړاندې خنډ پیدا کړي. حکومت به ناراضه وي، د ځینو کړنو له لارې به خپل ناراضیتوب ښکاره کوي، اساسي قانون به یادوي، خو دوی د امریکايي تصمیم پر وړاندې نه د درېدو اراده لري او نه هم توان. اوس دا چې د سولې مشورتي بورډ جوړوي او یا هم پلاوی ټاکي، غواړي وښيي چې دوی هم د سولې په چارو کې دخیل دي او کیسه لا هم د افغانانو په مشرۍ او مالکيت روانه ده. که څه هم بورډ او پلاوی یې ناکاره ښکاري او ان که هغه پلاوی رښتیا وي چې رسنیو یې نومونه خپاره کړي، بېخي مسخره دی، خو بیا هم حکومت غواړي وښيي چې دوی د لوبې برخه دي.
د امریکا او طالبانو ترمنځ باید ستونزې حل شي، خو د افغانانو خپلمنځي ستونزې هم باید حل شي. طالبان باید له حکومت، سیاسي ګوندونو، اشخاصو او خلکو سره خبرې وکړي. ټول اړخونه باید یو ګډ توافق ته ورسېږي. که په دې چاره کې حکومت، کوم سیاسي اړخ او یا قشر هېرېږي، دا د تلپاتې سولې پر وړاندې خنډ پیدا کوي. له همدې امله د حکومت په ګډون ټول اړخونه باید د سولې په پروسه کې را ګډ شي، هېڅوک هم باید د سولې د تخریب هڅه ونه کړي او ټول باید د سولې لپاره له خپله اړخه قربانۍ ته تیار وي.
