په کابل کې د شوو ټاکنو د برخلیک په تړاو لا هم معلومات نشته. د ټاکنیزو شکایتونو کمېسیون د کابل د ټاکنو د لغوه کولو پرېکړه وکړه، خو اوس پر خپله پرېکړه له سره غور کوي. معلومه نه ده چې په دغه بیاځلي کتنه کې به پخوانۍ پرېکړه تایید شي او که به کمېسیون له خپلې پرېکړې وګرځي. یوازې په کابل کې نه، بلکې په نورو ولایتونو کې هم د درغلۍ پراخ رپوټونه دي او لا معلومه نه ده چې د ټاکنیزو شکایتونو کمېسیون به یې په اړه څه پرېکړه کوي.
د ټاکنو او ټاکنیزو شکایتونو کمېسیونو ترمنځ ستونزو، په خپله په ټاکنو کمېسیون کې ستونزو او اختلافاتو، له درغلیو او فساده ډکو ټاکنو، د کمېسیون کمزوري مدیریت، فساد او تر سیاسي فشارونو لاندې تصمیمونو په افغانستان کې د ټاکنو په تړاو تصویر لا زیات خراب کړی دی. زموږ هر ځل ټاکنې تر پخوانیو هغو خرابې وي. په ۲۰۱۴ که څه هم په ټاکنو کې ستونزې وې، خو د بهرنیانو لاسوهنې او د ولسمشر معاملې ټاکنې به ارزښته کړې. اوس د ملي یووالي حکومت او د دوی له خوا جوړ شوي کمېسیونونو ټاکنې دومره مسخره کړې چې نه په کور دننه خلک پرې باور کوي او نه هم بهرنیان. د ۲۰۱۴ کال د ټاکنو معاملو خلک ناهیلي کړل. له همدې امله له پراخو هڅو سره سره خورا کمو خلکو په ټاکنو کې برخه واخیسته. اوس چې یو ځل بیا ټاکنې مسخره کېږي، نو ستونزمنه به وي چې خلک بیا ولسمشریزو ټاکنو ته را ووځي. له ۲۰۱۴ کال څخه تر ۲۰۱۸ پورې ډېر وخت و، بدلونونه هم راغلي وو، خو اوس چې د ولسمشرۍ ټاکنو ته کم وخت پاتې دی، نو سر له اوسه ښکاري چې ډېر کم خلک به په ټاکنو کې برخه واخلي. یوازې په کور دننه د ټاکنو بدنامول هم نه دي، بلکې په نړیواله کچه هم زموږ ټاکنې بدنامې شوې دي. په دغو مسخره ټاکنو سره د ملي یووالي حکومت او د دوی له خوا جوړو شوو ناخپلواکو کمېسیونو نړۍ ته داسې تصویر ورکړ چې په افغانستان کې رڼې ټاکنې ناشونې دي، دلته خلک پر ټاکنو باور نه لري او په دې برخه کې هر هڅه بې ځایه ده. دا تصویر به په سیاسي او نورو برخو کې د ستونزو ترڅنګ به ددې لامل شي چې مرستندویان نور د ټاکنو بودجه ور نه کړي، ځکه چې هغوی ته په افغانستان کې ټاکنې مسخره ښکاري او فکر کوي چې د ټاکنو په نامه د فساد، درغلۍ او انتصاب له یوې پروسې سره مرسته کوي.
له بده مرغه د ملي یووالي حکومت مشرانو د خپلو شخصي ګټو او د واک د دوام لپاره نه یوازې په ۲۰۱۴ کال کې د خلکو په رایو معامله وکړه، بلکې لا هم همغسې چټلې معاملې کوي. دوی د ټاکنیزو اصلاحاتو په نامه خپل کسان کمېسیونو ته داخل کړل او کمېسیونونه یې خورا فاسد کړل. کمېشنران او د ټاکنو مدیران به کمزوري او مفسد وي، خو ددې هر څه اصلي پړه پر ارګ او اجرایه ریاست ده. همدوی وو چې د اصلاحاتو په نوم یې کمېسیونونه چټل کړل او همدوی دي چې لا هم د خلکو له ارادو سره لوبې کوي.
