د ولسمشر د فرمان له مخې د سولې پروسې د عالي مشورتي بورډ او د سولې خبرو اترو د ټيم غړي وټاکل شول. په فرمان کې راغلي چې د سولې بهیر د عالي مشورتي بورډ او د دولت د خبرو اترو ټیم، د تل پاتې سولې د ټینګښت لپاره د ملي هوکړې رامنځته کېدو په هدف له جهادي، سیاسي او ټولنیزو مشرانو او د ټولنې له بېلابېلو اقشارو سره له مشورو او بحثونو وروسته جوړ شوى دى. دغه بورډ به د سولې په برخه کې ولسمشر ته مشورې ورکوي او د سولې په نورو برخو کې به هم مرسته کوي. په دغه بورډ کې چې مشري یې ولسمشر کوي، د ولسمشر مرستیالان، اجرایه رییس او مرستیالان یې، د سترې محکمې، لویې څارنوالۍ، ولسي جرګې او مشرانو جرګې رییسان، ځیني نور دولتي مشران، د سیاسي ګوندونو مشران او غړي شامل دي.
لا معلومه نه ده چې دغه بورډ به څومره په یوه غږ او د یوه هدف لپاره ګډ کار وکړي، خو شدیده اړتیا ده چې افغانان د سولې په چاره کې واحد غږ ولري. د افغانستان د سولې په تړاو بحثونه په قطر کې وو، اوس خبره په اسلام اباد کې ګرمه ده. په روسیه او د سیمې په نورو هېوادونو کې به هم دا بحثونه ګرم شي. په دې ټولو بحثونو کې خبره د افغانستان د سولې او برخلیک ده، خو له بده مرغه د افغان ولس استازي پکې نشته. دا سمه ده چې طالبان د افغانستان او د افغان ولس د یوې برخې په توګه په قطر کې د دې خبرو برخه دي، خو هغوی د خپلو مجبوریتونو او تمایلاتو پر اساس ټول هغه څه نه شي غوښتلی چې خلک یې غواړي. دا رښتیا ده چې حکومت څنګ ته شوی دی او همداسې ورسره سیاسیون هم څنګ ته شوي دي. له همدې امله د سولې په هڅو کې افغان لوري پیکه دي. موږ منو چې دا حکومت او سیاستوال د ولس استازیتوب نه شي کولی، خو که حکومت او مخالف سیاستوال یې ټول په یوه غږ د سولې دغو خبرو ته ور ګډ شي، له شک پرته چې په دغو خبرو کې د افغاني غوښتونو او ګټو د ځای پر ځای کېدو شونتیا زیاتېږي.
سیاسي اختلافات پر خپل ځای، خو په اوسنیو شرایطو کې اړتیا ده چې موږ د سولې په تړاو واحد غږ ولرو. له بده مرغه لا هم ځینې کسان د اساسي قانون په بهانه او یا هم د تېرو اوولسو کلونو د لاسته راوړنو په بهانه هڅه کوي چې د سولې د هڅو پر وړاندې ودرېږي. دا چاره له اساسي قانون او لاسته راوړنو سره د مینې په خاطر نه کېږي، بلکې دا کار د سولې پر وړاندې د خنډ جوړولو او د جګړې د دوام لپاره کېږي. هغوی چې په حکومت کې دي او یا له حکومت څخه د باندې دي، پکار ده چې نور له ولس سره دښمني پرېږدي او له سولې سره مرسته وکړي. حکومت دې هم هڅه نه کوي چې دا ډول هڅې د سولې د هڅو د شنډولو او یا هم د خپل ټاکنیز کمپاین لپاره وکاروي، بلکې پکار ده چې د سولې لپاره یې وکاروي.
