د چین د وارداتو او صادراتو ۱۴۰م نندارتون اوسمهال په ګوانګ جو ښار کې روان دی، چې پکې په لوی شمېر مخکښ محصولات، لکه انسان شکله روبوټونه، د تګ لپاره مرستندوی روباټي وسایل، د ژباړې او عکس اخیستنې لپاره د مصنوعي ځیرکتیا عینکې او ځيني نور محصولات نندارې ته وړاندې شوي دي.
سږ کال د چین د وارداتو او صادراتو نندارتون د جوړېدو له ۷۰مه کلیزه سره برابر دی.
۷۰ کاله وړاندې د چین د وارداتو او صادراتو لومړي نندارتون مساحت ۹۶۰۰ مربع متره و، چې اوسنی مساحت يې ۱ اعشاريه ۵۵ میلیونو مربع مترو ته رسېږي او په لومړي نندارتون کې يې د پېرودونکو شمېر ۱۲۰۰ و، خو اوس یې پېرودونکي تر ۳۰۰ زرو هم زیات شوي دي.
دغه نندارتون په چين کې تر نورو نندارتونو ډېر اوږد تاریخ لري او تر ټولو لوی او ډېرو معاملو لرونکی نړیوال سوداګریز نندارتون ګرځېدلی، چې په نړۍ کې د “چین لومړی نندارتون” په نوم هم پېژندل کېږي.
د سږني نندارتون لومړی پړاو د پرمختللي تولید موضوع ته ځانګړی شوی، چې پکې د برېښنايي توکو او کورنيو برېښنايي ماشينونو، صنعتي تولیداتو، د رڼا او برېښنا تجهيزاتو، هارډوير وسايلو او موټرونو په شمول د پنځو لویو برخو وروستۍ لاسته راوړنې نندارې ته وړاندې شوې دي.
د بېلابېلو هېوادونو د تصدیو په اند، د چین د وارداتو او صادراتو نندارتون ریښتیني سوداګریز فرصتونه برابروي او په تېرو ۷۰ کلونو کې یې نړیوالو سوداګرو ته يو اغېزناک او اسانه سوداګريز پليټفارم برابر کړی، چې پکې بشپړ توليدت برابرېدلی شي.
د يادونې ده، د دې نندارتون د معاملو اندازه ۱ اعشاريه ۶ ټریلیونو ډالرو ته رسېدلې ده.
چین د “سوپر پلورونکي” او “سوپر پېرونکي” په توګه بېلابېلو خواوو ته ګټې رسوي او دغه هېواد د نړۍ د توکو په سوداګرۍ کې لومړی ځای او دویم لوی مصرفي بازار لري.
د سږ کال په تېرو درېو ربعو کې د چین د توکو د وارداتو او صادراتو عمومي اندازه ۳۹ اعشاريه ۹۴ ټریلیونو یوانو ته رسېدلې، چې د تېر کال د همدې مودې په پرتله ۱۸ اعشاریه ۸ سلنه زیاتوالی ښيي.
د چین د وارداتو او صادراتو نندارتون نه یوازې سوداګریز تګ راتګ هڅوي، بلکې چیني او بهرنۍ تصدۍ له سوداګریزو شریکانو سره د نوښت، پانګونې او تولیدي او اکمالاتي ځنځیرونو په شریکانو هم بدلوي.
امریکايي پېرونکی ګاوین تامسن له رسنيو سره په خبرو کې ويلي، چې په تېرو لسو کلونو کې د چین د اکمالاتي ځنځیر اغېزمنتیا او تولیدي وړتیا په پراخه کچه لوړه شوې ده. کلمبیايي پېرونکی خوان کامیلو باستو د دې نندارتون د خدماتي روبوټونو ځانګړې سیمې څخه د لیدنې پرمهال رسنيو ته ويلي، چې هغه په دغه نندارتون کې نه يوازې توليدات اخلي، بلکې غواړي د مسئلو د هواري پر لارو چارو هم وپوهېږي.
په اوسنۍ نړۍ کې د یواړخیزم او پروټېکشنيزم څپه پورته شوې، خو بیا هم د چین د وارداتو او صادراتو نندارتون هر کال په خپل وخت ترسره کېږي او د پرانیستي نړیوال اقتصاد د جوړولو لپاره ځواک برابروي.
په تېرو ۷۰ کلونو کې چې نړیوال حالات هر څنګه بدل شوي، دغه نندارتون خپله بڼه نه ده بدله کړې او هر وخت یې نړۍ ته ډاډ ورکړی دی.
د نړۍ د څه باندې ۲۲۰ هېوادونو او سیمو شاوخوا ۳۰۰ زره پېرونکي د کال په دوو پړاوونو (پسرلی، منی) کې په دغه نندارتون کې ګډون کوي او دا د دې ښکارندويي کوي، چې دوی پر چين پوره اعتماد او باور لري.
کریستوف بینارد فرانسې اوسیدونکی دی او شاوخوا ۵۰ ځله يې په دغه نندارتون کې ګډون کړی دی. هغه رسنيو ته ويلي، چې شرکت يې پر چیني بازار او محصولاتو باور لري او شاوخوا ۹۰ سلنه د اړتيا وړ توکي له چین څخه اخلي.
د چین د وارداتو او صادراتو نندارتون په تېرو ۷۰ کلونو کې د ورخلاصون او پرمختګ له لارې ډېره وده موندلې او د توکو ډولونه يې په دوامداره توګه زيات او نوي شوی، خو د دې نندارتون لومړنی هدف ” له نړۍ سره تګ راتګ، نړۍ ته ګډه ګټه رسول” يې نه دی بدل شوی.
site-verification-ok
