ولسمشرۍ ماڼۍ وايي، د افغانستان په شمال کې د سرو زرو او مسو د کانونو د راسپړنې د تړونونو په اړه د روڼتیا د څار سازمان څرګندونې بې بنسټه او د عامه ذهنيتونو د ګډوډولو یوه هڅه ده، خو د روڼتيا د څار بنسټ مشر بيا وايي چې د ولسمشر له لوري ګواښل شوی دی.
په امریکا کې د افغانستان د دوو کانونو د تړونونو د لاسلیکېدلو په تړاو تر غبرګونونو وروسته، ولسمشرۍ ماڼۍ وايي چې د دغو تړونونو لاسلیکېدل هېڅ ډول ستونزه نه لري.
د ولسمشرۍ ماڼۍ ویاند شاه حسین مرتضوي وايي، د کانونو په ګډون ټول تړونونه د تدارکاتو د کمېسیون له هوکړې وروسته کېږي چې په دغه کمېسیون کې د روڼتیا د څار بنسټ مشر هم ګډون لري.
مرتضوي ازادي راډيو ته ويلي: «د تدارکاتو د کمېسیون ټول غړي د هرې فیصلې په اړه لاسلیک کوي او هلته یوازې د ولسمشر لاسلیک نه دی مطرح، بلکې د افضلي صاحب په ګډون، ټول غړي یې لاسلیک کوي، خو زه تعجب کوم، په داسې حال کې چې په خپله افضلي صاحب هلته موجود دی، د ناقصو او مغرضانه معلوماتو سره د خلکو ذهنونه ګډوډوي.»
د افغانستان د روړنټیا د څار بنسټ مشر اکرام افضلي بیا وايي چې ولسمشر د ښار جوړونې د پخواني وزیر د خوشحالولو لپاره په شمال کې د سرو زرو او مسو د کانونو د راسپړنې تړونونه هغو شرکتونو ته ورکړي چې ښاغلی سادات پکې شریک دی.
د بدخشان ولایت د طلا او د بلخاب د مسو کانونو تړونونه د اکټوبر په پنځمه د امریکا په متحده ایالاتو کې د افغانستان په سفارت کې د افغانستان د کانونو او پټرولیم وزارت د سرپرستې او د (ترکش افغان ماینېنګ) او (افغان ګولډ اند منرالز) شرکتونو ترمنځ لاسلیک شول.
د یادو دواړو تړونونو د راسپړنې کار، چې د افغانستان د کانونو وزارت په خبره ارزښت یې څه باندې ۷۰ میلیونه ډالرو ته رسېږي، ډېر ژر پيل کېږي.
د روڼتيا د څار بنسټ رييس سيد اکرام افضلي وايي چې د تړون تر لاسلیکېدو وړاندې يې خپله اندېښنه له ولسمشر سره مطرح کړه، خو هغه تهدید کړی دی.
افضلي ازادي راډيو ته ويلي: «په دې اړه موږ خپله اندېښنه د تدارکاتو په کمېسیون کې هم له ولسمشر سره شریکه کړه، د قانون خلاف چې کوم کار کېږي، موږ یې پر وړاندې غږ پورته کړ، خو ولسمشر په دې اړه ډېر جدي غبرګون وښود او موږ یې په دې وګواښلو چې که خپله ادعا ثابته نه کړو، تر عدلي تعقیت لاندې نیول کېږو».
د اقتصادي چارو کارپوه سید قیاس سعیدي وايي، هېڅوک حق نه لري چې د افغانستان له کانونو سره چې د دغه هېواد ملي شتمني ده، غیر مسوولانه چلند وکړي.
د یادونې ده چې د افغانستان د کانونو په تړونونو کې د شفافیت د نه موجودیت په اړه مخکې تر دې هم وخت په وخت انتقادونه مطرح شوي دي.
