د چین د دولت رئیس شي جين پینګ د اکتوبر په څوارلسمه نېټه د چين د صادراتو او وارداتو ۱۴۰م نندارتون ته د مبارکۍ پيغام لېږلی او پکې يې ويلي دي چې دغه نندارتون د جوړېدو له اوياوو کلونو راهيسې د کورنۍ او بهرنۍ سوداګرۍ په پرمخ بېولو کې مهم رول لوبولی او د چين لخوا د ورخلاصون د پراخوالي او د پرانيستي نړيوال اقتصاد د ابادۍ اغېزناک ډګر ګرځېدلی دی. هغه په خپل پیغام کې د دې نندارتون تاريخي لاسته راوړنې ستايلې او د لوړې کچې ورخلاصون د پراخوالي لپاره يې د چين ټينګه اراده بيا څرګنده کړې ده.
د چين د سوداګرۍ وزارت د بهرنۍ سوداګرۍ ادارې مشر يانګ تاو ويلي، د رئیس شي جين پینګ د مبارکۍ پيغام داسې ښکاري چې هغه دغه نندارتون ته په درنه سترګه ګوري او پکې يې د دې نندارتون مهم رول تائيد کړی دی. له دې څخه څرګندېږي چې چين د يوه لوی هېواد په توګه نړيوال پرمختګ او سمسورتيا ته د نوي حياتي ځواک برابرولو لپاره خپل مسؤليت پر غاړه لري. ښاغلي يانګ تاو زياته کړې چې وزارت به يې د دې پیغام روحيه پلې کړي، د دې نندارتون د تر سره کولو لپاره به له ګوانګ دونګ ولايت سره ښې همکارۍ ته دوام ورکړي او د بهرنۍ سوداګرۍ د نوښت او برابر پرمختګ هڅونه به وکړي، د سوداګرۍ او پانګونو د يو ځای کېدو او د ګټې- ګټې نړيوالو سوداګريزو او اقتصادي همکاريو د لا پياوړتيا لپاره هڅې وکړي څو چې د غښتلي سوداګريز هېواد د ابادۍ لپاره اړوند اقدامات چټک کړي او د انسانانو د ګډ برخليک د ټولنې د ابادۍ لپاره نوي خدمتونه وکړي.
د هسپانيې د انګليس سوداګريز شرکت له څه باندې دېرشو کلونو راهيسې د چين د صادراتو او وارداتو په نندارتون کې ګډون کړی دی. په چین کې د دې شرکت عمومي مدير فلير ويلي چې موږ د دې پیغام له کبله په چین کې پر پرمختګ او پانګونې باور لا ټينګ کړی او دې ته تمه لرو چې په دې نندارتون کې د ګډو ګټو پر بنسټ له لازياتو چينايي تصديو سره همکارۍ وکړو.
د دې نندارتون د وفادار ګډون کوونکي په توګه د اندونيزیا کاوان لاما ګروپ په دوامداره توګه د نوښت په برخه کې له چينايي تصدۍ سره همکاريو ته دوام ورکوي. د دې ګروپ عمومي مدير هونګ يي جون داسې ويلي چې چين تل په فعاله توګه د نړيوال نوښت او صنعتي ځنځيرونو په سيستم کې برخه اخیستې او له نورو هېوادونو سره يې په ګډه د نړيوال صنعتي او اکمالاتي ځنځيرونو د ثبات ساتلو لپاره ګډې هڅې کړې دي. موږ له دې نندارتون څخه په استفادې اندونيزيا ته د چيني ټېکنالوژۍ او عصري توليدي سيستم د واردولو هڅې کوو او د هېواد د صنعتي سويې د لوړوالي او په نړيوال صنعتي او اکمالاتي ځنځيرونو کې د شاملېدو لپاره زمينه برابروو.
د چين په لوېديځ کې د نوي نړيوال ځمکني او سمندري سوداګريز دهليز د لوژستيک او عملياتي مرکز مشر سون که ويلي، رئيس شي جين پینګ د مبارکۍ په پيغام کې دې ته شاره کړې چې بايد د نړيوال صنعتي او اکمالاتي ځنځيرونو ثبات تضمين شي. هغه څرګنده کړه، موږ به د مالونو د لېږد رالېږد لپاره یوه خوندي، ثابته او اغېزناکه شبکه جوړه کړو، د لارو په نښلولو اکمالاتي ځنځيرونو ته د حياتي ځواک ورکولو او د لارو په اوږدو کې د صنعتي همکاريو ، پیوستون او د بازار د ګډې ابادۍ لپاره هڅې وکړو څو د چين په جنوب لوېديځه سیمه کې د بهرنۍ سوداګرۍ د ثابت پرمختګ او د کورني او نړيوال دوران د روانېدو لپاره قوې زمينه برابره کړو.
که څه هم دغه نندارتون په نړيوال بدلون کې له ډېرو ننګونو سره مخ شوی، خو په پر له پسې توګه نوی حياتي ځواک او د چين د ورخلاصون پراخوالی پکې ښکاري او هم په پر له پسې توګه نړۍ ته نوي فرصتونه، انجين او ثابت عوامل برابروي.
