د چين د وارداتو او صادراتو ۱۴۰م نندارتون ( کانټون نندارتون) په ګوانګجو ښار کې ترسره کېږي، چې د خدمتي روبوټ په نندارځيو کې يې ځای ځای بهرني سوداګر تر سترګو کېږي.
وينزویلايي سوداګر رافایل د کانټون نندارتون په يوې عرفې کې له انسان شکله روبوټ سره د بېډمنټون لوبه وکړه، چې د ډېرو نندارچيانو پاملرنه يې راجلب کړه.
رافایل له رسنيو سره په خبرو کې ويلي، چې خلک اوس هغه ټېکنالوژي کاروي، چې پخوا به یې يوازې په تصور کې تجربه کوله.
نوموړی پلان لري، چې دغه محصول وينزويلا ته ورسوي او هلته یې خپلو هېوادوالو ته وړاندې کړي.
د کانټون نندارتون يوه مسئول رسنيو ته ويلي، د مرکزي او جنوبي امریکا ډېری پېرودونکي د لویو معاملو لپاره کانټون نندارتون ته راغلي دي.
سږ کال د کانټون نندارتون د جوړېدو له ۷۰مې کلیزې سره برابر دی.
د کانټون د لومړي نندارتون پراخوالی یوازې ۹۶۰۰ مربع متره و او ۱۲۰۰ بهرني پیرودونکي یې درلودل، خو د روان نندراتون پراخوالی يې ۱ میلیون او ۵۵۰ زره مربع متره ښودل شوی، چې تر دې دمه یې ۳۲ زره نندارچیان او نږدې ۳۴۰ زره بهرني پېرودونکي راجلب کړي دي.
د چین د سوداګرۍ وزارت او د دولتي شورا د مطبوعاتي دفتر په دې وروستيو کې يو لړ شمېرې خپرې کړي، چې له مخې يې په روان نندارتون کې د نويو محصولاتو انډول ۲۳ اعشاریه ۲ سلنې او د زرغونو توکو انډول يې ۲۶ سلنې ته رسېدلی او دواړو برخو يې ريکارډونه جوړ کړي دي.
د چين د مصنوعي ځیرکتیا څېړنیزو انسټیټیوټونو په روان نندارتون کې خپل داسې محصولات نندارې ته ايښي، چې مخکې بازار ته نه وو وړاندې شوي، خو اوس به دغه محصولات بهرنیو بازارونو ته هم وړاندې شي.
د نړۍ د شاوخوا ۲۰۰ هېوادونو او سیمو پېرودونکي د چین ګوانجو ښار ته تللي او په کانټون نندارتون کې يې ګډون کړی دی.
دوی په نندارتون کې د محصولاتو د مشخصاتو په اړه پوښتنې کوي، نمونې ټاکي او له چیني تصدیو سره پر اوږدمهالو همکاريو بحثونه کوي.
کانټون نندارتون له ۷۰ کلونو راهیسې بې له ځنډه او خنډه ترسره کېږي او د څو اړخیز سوداګریز سیسټم د ژوندي پاتې کېدو شاهد پاتې شوی دی.
په کانټون نندارتون کې له تېرو ۷۰ کالونو راهيسې نه یوازې معاملې کېږي، بلکې دغه نندراتون د چین د نړیوال کېدو او له بېلا بېلو هېوادونو سره د نوښت د شریکولو سرچېنه هم ګرځېدلې ده.
د چین دولت رئیس شي جین پینګ کانټون نندارتون ته د مبارکۍ په پیغام کې لیکلي، چې دغه نندارتون له ۷۰ کلونو راهیسې د چین او بهرنیو هېوادونو ترمنځ د سوداګریز تګ راتګ په برخه کې مهم رول لوبولی او د چین لپاره د لوړې کچې پرانیستې او د پرانیستي نړیوال اقتصاد د پرمختګ لپاره یو اغیزمن ډګر ګرځېدلی دی. چین به د نړۍ له ټولو هېوادونو سره لاس یو کړي، د څو اړخیز سوداګریز سیسټم ساتنه به وکړي، د نړیوال صنعتي او اکمالاتي زنځیرونو ثبات او اسان جریان به ډاډمن کړي، د متقابلو ګټورو اقتصادي او سوداګریزو همکاريو لپاره به پراخه فضا برابره کړي، د پراخو ګټو پر بنسټ به د اقتصاد نړیوال کېدل وهڅوي او په دوامداره توګه به نړیوال پرمختګ او سوکالۍ ته نوی حیاتي ځواک برابر کړي.
کانټون نندارتون نړۍ ته دا پيغام ورکوي، چې د چین د نوي کیفیت تولیدي ځواک د تړلو دروازو تر شا ښودل کېږي، بلکې دا د چين یو نوښتګر ځواک دی چې په لمنه کې يې په نړیواله کچه متقابلې ګټې رانغاړل شوې دي.
ټول هېوادونه د نړۍ په اوسنيو متزلزلو حالاتو کې کولی شي، چې د کانټون نندارتون له لارې د ټېکنالوژیکي پرمختګ ګټې شریکې کړي او په ګډه د پرمختګ فرصتونه ومومي.
site-verification-ok
