د چين ولسي جمهوريت د جوړېدو د ۷۵مې کليزې د رارسېدو په درشل کې، د چين ميډيا ګروپ او د چين ژنمين پوهنتون په ګډه د دغه هېواد په اړه د ښه احساس په اړه دويمه نړيواله سروې خپره کړې، چې لومړۍ سروې يې تېر کال تر سره شوې. د دغه سروې نتيجه ښيي، چې د چين په اړه د نړيوالو ښه احساس د زیاتیدو په حال کې دی، ګډونوالو د چين اقتصاد، علمي ټېکنالوژي، کلتور او نړيواله اغېزه ستايلې، په تېره بيا د پرمختيايي هېوادونو وګړي او له ۳۴ کلنۍ د ټيټ عمر ځوانانو د چيني شکله عصري کېدو د مفکورې او لاسته راوړنو لوړه ارزونه کړې ده.
په دغه سروې کې د چين د ملي بڼې په اړه د ګډونوالو د ښه احساس او ستاينې کچه د تېر کال د سروې د پايلې په پرتله لوړه شوې ده. ۹۲٪ ګډونوالو چين يو مهم هېواد بللی، چې دغه ونډه د تېر کال په پرتله ۱،۴٪ زياتوالی ښيي. ٪۸۹ ګډونوالو چين بريالی هېواد بللی، چې د تېر کال په پرتله ۴،۸٪ زياتوالی ښيي. ۷۷،۸٪ ګډونوالو چين د درناوي وړ هېواد بللی، چې د تېر کال د پايلې په پرتله يې د زياتوالي انډول ۱،۳٪ دی.
د سروې ګډونوالو چين ته د سفر څرګنده هيله هم ښودلې. د سروې د هغو ګډونوالو انډوال، چې چين يې جذاب هېواد بللی، د تېرې سروې د پايلې په پرتله ۱۴،۸٪ لوړ شوی او ۷۲،۲٪ ته رسېدلی دی. ۷۹،۵٪ ګډونوالو د سيلانۍ، رسمي سفر او يا زده کړو لپاره چين ته د راتللو هيله څرګنده کړې ده.
چين د نړۍ دوهم لوی اقتصادي ځواک او لومړی لوی پرمختيايي هېواد دی او د چيني شکله عصري کېدو لار د بېلا بېلو هېوادونو په تېره بيا پرمختيايي هېوادونو لپاره خورا نوې بېلګه بلل کيږي. د سروې ګډونوالو د چيني شکله عصري کېدو د مفکورې او لاسته راوړنو لوړه ارزونه کړې او د دې ستاينه يې کړې، چې چين د نړيوالې ادارې په بهير کې مثبت خدمتونه کړي او ستره اغېزه يې کړې ده.
د سروې ۹۲،۳٪ ګډونوالو د چين ځواکمن اقتصادي قوت ستايلی، چې دغه انډول د د تېر کال له پايلې سره برابر دی. په منځني ختيځ، افريقايي هېوادونو او د جنوبي امريکې په هېوادونو کې د ياد نظر لرونکو خاوندانو کچه په جلا جلا توګه ۹۸،۴٪ ، ۹۷،۷٪ او ۹۵،۵٪ ده.
د سروې ۹۲،۳٪ ګډونوالو د چين علمي او ټېکنالوژيک ظرفيت د ستاينې او حيرانتيا وړ بللی. ۸۷٪ ګډونوالو د نړيوال پرمختګ لپاره د چين د ساينس او ټېکنالوژۍ خدمتونه ستايلي، چې دغه رقم د تېر کال په پرتله ۲،۱٪ زياتوالی ښيي.
د سروې زياتره ګډونوال د چين د ملي بڼې په اړه ښه احساس لري، چې له دې جملې څخه ۷۰٪ وګړو د (( ډېر ښه )) کچه انتخاب کړې. له تېرو څو کلونو راهيسې چين ته د راغلو بهرنيو ځوانانو شمېر مخ په زياتېدو دی او د دغه هېواد د اقتصاد او ټولنې رښتينی وضعيت يې کتلی او احساس کړی دی. بر سېره پر دې، د سروې ځوانو ګډونوالو د چين د حکومتوالۍ ستاينه کړې.
د هغو ګډونوالو ۹۲،۸٪ چې عمرونه يې له ۱۸کلنۍ نه تر ۲۴کلنۍ پورې دي او د هغو ګډونوالو ۹۱،۱٪ چې عمرونه يې له ۲۵ کلنۍ نه تر ۳۴ کلنۍ پورې دي، د چين نړيواله اغېزه ستايلې ده. په هغو ګډونوالو کې، چې عمرونه يې له ۱۸کلنۍ څخه تر ۲۴کلنۍ پورې دي، ۸۲،۵٪ ځوانان د چين په نړيوالو همکاريزو پروژو کې د خپلو هېوادونو د ګډون ملاتړ کوي. له ۱۸کلنۍ څخه تر ۲۴کلنۍ پورې عمر لرونکي وګړي ۷۲،۴٪ برخه او له ۲۵ کلنۍ څخه تر ۳۴ کلنۍ پورې د عمر لرونکو وګړو ۷۱،۶٪ په دې نظر دي، چې د چين د سوله ييز پرمختګ لار د نړيوالې سولې او ثبات او د لا عادلانه او مناسب نړيوال نظم د جوړونې لپاره مهم ارزښت لري.
دغه سروې د شمالي امريکې، اروپا، افريقا، اوقيانوس، جنوب ختيځې اسيا، ختيځې اسيا، جنوبي اسيا، منځنۍ اسيا او منځني ختيځ په ۴۱ پرمختللو او پرمختيايي هېوادونو کې تر سره شوې او ۱۶۴۰۰وګړو پکې ګډون کړی و.
