په بغلان کې يو شمېر کوچيان وايي چې د نامسوولو وسله والو له خوا ځورول کېږي او په زور ترې پيسې او څاروي اخيستل کېږي.
د بغلان د مرکز پلخمري اړوند د زمانخېلو سیمې يوه کوچي فیروزخان پژواک خبري اژانس ته ویلي چې په دې سيمه کې اتيا سلنه کوچيان اوسېږي چې هر يو په غره کې سلګونه پسونه لري.
د ده په وينا، د باج ګاه او کرکر په سيمو کې يې څړځايونه درلودل، خو اوس نامسوولو وسله والو ترې نيولي دي.
ده زياته کړې: «په دغه ځاى مو سره دعوه شوه، اوس دې کسانو زموږ پسونه هم وړي دي».
فيروز خان د يادو وسله والو په اړه نور معلومات نه دي وړاندې کړي، خو زياته کړې يې ده چې په دې اړه يې څو ځلې د ولايت مقام ته عريضه کړې مګر چا پرې غوږ نه دی ګرولی.
دغه راز په بغلان کې د ١٢ سوه کوچي کورنيو سرخېل سيد رحمان هم ويلي: «تنها زموږ قوم ١٥زره پسونه درلودل، خو د څړځايونو د بېرته ترلاسه کولو لپاره مو اووه زره پسونه نامسوولو وسله والو ته باج ورکړی دی».
د هغه په خبره، په پخوانيو حکومتونو کې دوى د دغه ولايت په حسن تال او تاله او برفک سيمو کې څړځايونه درلودل، خو چا ورته ستونزې نه جوړولې.
ده زياته کړه، دا مهال يو شمېر کوچيان د دهنه غوري ولسوالۍ د توغندرې او دېوان ګلچين په غرونو کې خپلې رمې پيايي او هغوى هم له ستونزو سره مخ دي.
هغه زياته کړې: «هغه بېچارګان مجبوره دي چې هلته همدې نامسوولو وسله والو ته باج کې پيسې يا پسونه ورکړي، څو يې په ارام پرېږدي».
د دغه ولايت يو شمېر نورو کوچيانو هم ورته څرګندونې کړې او له حکومته يې غوښتي چې هر څه ژر يې دا ستونزه هواره کړي.
په دې اړه د بغلان د کرنې او مالدارۍ ريیس عبدالوهاب خیرزاد پژواک ته ويلي چې د دغه ولايت په يو شمېر سيمو کې نامسوولو والو کوچيانو ته ستونزې جوړې کړې دي.
رييس وايي، تر دې مهاله چا ورته شکايت نه دی کړی، له همدې کبله دوی هم اقدامات نه دي کړي: «په دې اړه تر اوسه موږ ته چا رسمي شکايت نه دى کړى، که چېرې څوک شکايت وکړي، نو د ولايت له مقام سره يو ځاى به لاس په کار شو».
دغه راز د بغلان والي انجنیر عبدالحی نعمتي هم یاده ستونزه مني او تر څنګ يې وايي چې حکومت تر يوه بريده د دې ستونزې په حل کې ناتوانه دى.
ده ويلي: «د کوچیانو د څړځایونو په اړه موږ ته شکایتونه رسېدلي او تر یوه حده یې د هواري هڅې روانې دي، خو بسنه نه کوي او هغه د دې لپاره چې د کوچيانو ډېرى څړځايونه په هغو سيمو کې دي چې هلته وسله وال مخالفين مېشت دي».
د يادونې ده چې تر دې مخکې هم د بغلان د کوچیانو امریت ويلي وو چې د کوچیانو څړځایونه د زورواکو له خوا غصب شوي دي.
