د ټاکنو خپلواک کمېسیون تېره ورځ د رایو جنجالي پایلې اعلان کړې. کمېسیون وویل چې په لومړنیو پایلو کې ولسمشر غني مخکښ دی او ۵۰،۶۴ سلنه رایې یې ګټلې دي. له دې سره هممهاله ټاکنیزې ډلې بیا دغه پایلې نه مني. کمېسیون وایي، دوی ټول کارونه د قانون او لایحو مطابق مخ ته وړي دي او اوس د ټاکنیزو شکایتونو کمېسیون د نوماندانو شکایتونه څېړي. دغه کمېسیون هم سر له سبا تر دریو ورځو پورې شکایتونه ثبتوي.
ولسمشریزې ټاکنې له لومړي سره جنجالي وې. کمېسیون د نوماندانو له لوري جوړ شو، نوي کمېسیون د ټاکنو لپاره تیاري ونیوله او ویې ویل چې نږدې لس میلیونه خلک ښایي رایې ورکړي. خو اوس پایلې ښيي چې د خلکو ګډون په ځلونو تر هغه کم و چې کمېسیون او نوماندانو به یاداوه. له دې سره کمېسیون ولسمشر غني د ټاکنو ګټونکی اعلان کړ، خو پاتې نوماندان په دې اعلان او پایلو قناعت نه لري. دوی ان دا ادعا هم کوي چې شکایتونه یې نه دي څېړل شوي او کمېسیون یې وړاندیزونو ته ارزښت نه دی ورکړی.
ټاکنې له ستونزو ډکې وې په دې کې شک نشته دی، خو بیا هم لومړنۍ پایلې اعلان شوې او دا پایلې په هېواد کې یو بل کړکېچ زېږولی شي. ټولې ټاکنیزې ډلې خپل پلویان لري، دوی د پایلو پر اعلان قناعت نه کوي، نو که د دوی قناعت حاصل نه شي، حکومت او د ټاکنو خپلواک کمېسیون په لوی لاس یوه بحران او کشمکش ته لاره هواره کړې ده. د ټاکنو خپلواک کمېسیون ته پکار وه چې د ټولو نوماندانو قناعت یې حاصل کړی وای. دوی ته یې ثابته کړې وای چې دوی د کومې ځانګړې ټاکنیزې ډلې ملاتړي نه دي او یوازې شفافیت ته ژمن دي. اوس یې چې دا کار نه دی کړی او ټاکنیزې ډلې یې د یوه ځانګړي ټاکنیز ټیم ملاتړی بولي؛ نو د دې احتمال شته چې په هېواد کې کشمکشونه، ناندرۍ او یا بل کړکېچ رامنځ ته شي.
د ټول ولس د ۲۰۱۴ ز کال ټاکنې په یاد دي. لاریونونه، اقتصادي مشکلات، امنیتي مشکلات او په سیاسي لحاظ چې کومې ستونزې په افغانستان کې رامنځ ته شوې، د ټول ولس په یاد دي. اوس هم که ټاکنیز کمېسیونونه ولس او یا ټاکنیزو ډلو ته قناعت ور نه کړي، د بحران د رامنځ ته کېدو وېره شته ده. ټاکنیزې ډلې ادعا کوي چې کمېسیون د یوه لوري ملاتړ کړی دی او د دې ادعا لپاره به هرو مرو دوی اسناد او شواهد لري. له همدې امله کمېسیونونو ته پکار ده چې هر ګام په پوره احتیاط او دقت واخلي.
اوس چې پایلې اعلان شوې دي او له یوه ټیم پرته نور پر دې پایلو قناعت نه لري، ټاکنیزو کمېسیونو ته پکار ده چې د قوانینو په رڼا کې د ولس قناعت خپل کړي. د ټاکنیزو شکایتونو کمېسیون دې ټول شکایتونه په بې طرفانه توګه وڅېړي او ولس ته دې خپلې پایلې وړاندې کړي. په دې منځ کې د نړیوالې ټولنې او همدا راز د ټاکنیزو پروسو د ملاتړو او همکارو هېوادونو مسوولیت هم دی، چې کمېسیونونه شفافیت ته اړ کړي، افغانانو ته قناعت ورکړي او د خلکو رایو ته درناوی وکړي.
