د طالبانو او امریکا تر منځ ډېر ژر د سولې هوکړې د لاسلیک احتمال شته. وال سټریټ ژورنال رپوټ ورکړی چې د ملا هیبت الله په مشرۍ د طالبانو رهبرۍ شورا د یوې اونۍ اوربند تایید کړی او ډېر ژر به عملي شي. د سولې تر هوکړې وړاندې د امریکا له خوا پر طالبانو د لس ورځني اوربند شرط اېښودل شوی و. که څه هم طالبانو د دې شرط د منلو یا نه منلو په اړه په رسمي ډول څه نه دي ویلي، خو له قطره د طالبانو یو پلاوی کوټې ته تللی و او هتله یې له طالب مشرانو سره په دې تړاو مشورې کولې.
اټکل دی چې په جنورۍ کې به د طالبانو او امریکا تر منځ د سولې هوکړه لاسلیک شي او په دې سره به د سولې د خبرو په برخه کې مهم پرمختګ وشي. له دې پرمختګ سره سره یوه اساسي ستونزه لا هم پر ځای ده، چې هغه د بین الافغاني خبرو لانجه ده. طالبان لا هم له حکومت سره مخامخ خبرې نه کوي او حکومت هم غواړي هر څه د دوی په مالکیت او مشرۍ وي. طالبانو په خپل دریځ کې یو بدلون راوستلی او منلې یې ده چې له داسې افغان پلاوي سره به خبرې کوي چې حکومت یې هم برخه وي. په دې پلاوي کې به د بېلابېلو سیاسي ډلو او قشرونو استازي وي. داسې ښکاري چې امریکا د طالبانو دا نرمښت منلی او هڅه کوي چې حکومت یې هم منلو ته تیار کړي. خلیلزاد د خپل ماموریت له پیل سره سم او بیا له هغه وروسته بیا بیا له افغان حکومت څخه غوښتي چې یو ټولمنلی پلاوی وټاکي چې پکې پر حکومتي استازو سربېره، د سیاسي ګوندونو، مدني ټولنو، ښځو او نورو برخو استازي هم وي. حکومت بیا بیا ژمنه کړې چې دا پلاوی به ټاکي، خو تر اوسه پورې یې نه دی ټاکلی. که څه هم د سولې لپاره د سولې پر عالي شورا سربېره د سولې وزارت، نورې شوراګانې او پلاوي هم جوړ شول، خو اصلي غوښتنه لا هم نه ده عملي شوې چې هغه د یو ټولمنلي افغان پلاوي ټاکل دي، چې د ولس په استازیتوب به له طالبانو سره خبرې کوي.
اوس تازه ارګ ویلي چې دوی به پلاوی هغه وخت اعلان کړي چې د طالبانو او امریکا تر منځ هوکړه لاسلیک شي. له بده مرغه دا ډېر ناسم دریځ دی چې د خنډ جوړولو بوی ترې راځي. رښتیا دا دي چې حکومت تر اوسه پورې پلاوی نه دی ټاکلی. د سیاستوالو، سیاسي ګوندونو او ارګ تر منځ د پلاوي پر سر اختلاف دی. ارګ غواړي هر څه په خپل کنټرول کې ولري او آن د سیاسي ګوندونو استازي هم پخپله خوښه وټاکي، خو سیاستوال بیا غواړي د ارګ واک او ځواک محدود کړي. له همدې امله ستونزه ده او دا ستونزه تر اوسه هم نه ده حل شوې.
ارګ ته پکار ده چې له سولې سره دومره سوړ چلند ونه کړي. د طالبانو او امریکا تر منځ له توافق وروسته د هیئت ټاکل، په واقعیت کې له سولې سره نه علاقه ښيي. حکومت ته پکار ده چې همدا اوس د پلاوي ټاکلو لپاره کوټلي ګامونه واخلي، له سیاستوالو، سیاسي ګوندونو او نورو برخو سره مشورې وکړې او ژر له خپله اړخه پلاوی وټاکي. له دې پرته به د امریکا او طالبانو تر منځ سوله وشي، خو د افغانانو تر منځ به جګړه دوام کوي. که خدای مه کړه داسې وشي، نو د دې هر څه مسوول به د ارګ اوسني واکمنان وي چې غواړي هر څه د خپل واک او ځواک د دوام قرباني کړي.
