دا د انسان طبيعي خاصيت دی چې بې وزلي نه خوښوي، خو پوښتنه دا ده چې له دې بلا څخه څنګه ځان وژغورل شي؟
د دې پوښتنې لپاره مختلفو پوهانو طرحې وړاندې کړې او خپل ځوابونه بيان کړي چې هره طرحه په خپل ځای د قدر وړ ده؛ خو کېدای شي دغه طرحې يوازې د اقتصادپوهانو لپاره د درک وړ وي، نو ځکه لازمه ګڼم چې خلکو ته بايد له بې وزلۍ څخه د خلاصون په پار ساده بېلګې وړاندې شي، څو دوی په اسانۍ سره وکولای شي چې له دې بېلګو څخه د بې وزلۍ په برخه کې د خپلو ستونزو د حل لپاره ګټه واخلي. په همدې هيله مې د “شاجو“ په نوم د چين د يوه کلي يادونه کړې، چې خلک يې تر شل کاله په کم وخت کې له بې وزلۍ څخه وتلي. دا چې دې کليوالو د بې وزلۍ له منځه وړلو لپاره څه کړي؟ په دې ليکنه کې يې لوستلای شئ.
شاجو سیمه
“شا جو” يو چيني نوم دی چې ځانګړې مانا نه لري، د چين په تقريباً مرکزي سيمه، هونان ولايت کې موقعيت لري، تر شاوخوا لس کاله مخکې پورې يې خلک ډېر بې وزله وو، شل کاله مخکې يې هېڅ پوخ سړک نه درلود، خو اوس له بې وزلۍ څخه وتلي او په دې برخه کې يې د چين د نمونه کلي لقب ګټلی.
له بې وزلۍ څخه د ياد کلي د وتلو راز زراعت او سياحت ته په پاملرنه کې دی. اقتصادپوهان په دې اند دي چې زراعت او سياحت د يوه هېواد او يا يوې سيمې د اقتصاد د ملا تېر جوړوي. هر هېواد او هره سيمه که غواړي چې اقتصاد يې قوي شي، نو بايد زراعت او سياحت ته پاملرنه وکړي.
د چين په تاريخي کيسيو کې راغلي چې د “شاجو“ سيمې خلک شاوخوا سل کاله وړاندې دومره بې وزله وو، چې آن د خوب لپاره يې بړستنې هم نه درلودې. وايي، يوه ورځ درې عسکر چېرته په سفر روان وو او په ياده سيمه کې يې شپه شوې وه او دا چې په هغه وخت کې هوټلونه نه وو، نو مسافرو به د خلکو په کورونو کې شپه تېروله. په دې کيسه کې راغلي، يادو عسکرو چې په کوم کور کې شپه تېره کړه، د کوربه اقتصادي وضعيت دومره خراب و چې د مېلمنو لپاره يې بړستن هم نه درلوده، نو يادو عسکرو خپله سفري بستره په منځ پرې کړه او نيمايي يې کوربه ته ورکړه.
د نيمايي بړستنې کيسه اوس په چين کې ډېره مشهوره ده. دومره مشهوره ده چې د چين دولت رييس له بې وزلۍ څخه د وتلو په برخه کې د ياد کلي د نمونې لقب يادونې پر مهال هم د نيمايي بړستنې تاريخي افسانې يادونه کړې.
تاسو پوهېږئ چې چين ډېره لويه جغرافيه او شاوخوا ۱۴۰۰ميليارده نفوس لري، نو په دومره لوی هېواد کې چې يو وړوکی کلی د نمونې لقب تر لاسه کوي، دا د دې ښودنه کوي چې کليوالو يې سخت زحمت ايستلی او بالاخره خپل هدف ته رسېدلي.
اوس د ياد کلي خلکو په خپله سيمه کې ښکلي پارکونه، شنې سيمې او تاريخي ځايونه جوړ کړي چې د ليدو لپاره يې هر کال ډېر خلک ورځي او له دې امله يې استوګن ډېر عايد تر لاسه کوي.
په زراعت برخه کې اوس ډېر مشهور کيوي، ژېړ ادرک، سپين چای او نور محصولات لري چې هر يو د دوی په اقتصاد کې مهم رول لري.
د معلوماتو له مخې، اوس په ياد کلي کې د کيوي شاوخوا ۱۶۰هکټاره باغونه زرغون دي. د يادونې وړ ده چې د چين دولت په خپل هېواد کې د بې وزلۍ د بشپړ ختمولو لپاره سږ کال یو ټاکلی هدف لري او وړاندوينه يې کړې چې د ياد کال تر پايه به خپل دغه هدف ته ځان ورسوي؛ خو دا چې په دې برخه کې به بريالی شي او که نه؟ هماغه وخت به معلومه شي.
