نه پوهېږم هغه فلم به مو کتلی وي او که نه، چې «ووډي هارلسون» پکې د پوهنتون د استاد رول لوبولی و؟ د دې فلم په یوه برخه کې نوموړی د زده کړیالانو په مخ کې درېدلی دی، یوه خښته یې په لاس کې نیولې ده او له هغوی نه پوښتي: «دا څه دي؟» هر یو دا فکر کوي چې د دې پوښتنې ځواب ډېر ساده دی او په یوه اواز سره وایي: «دا خښته ده!» خو هغوی په دې نه پوهېږي چې له دې پوښتنې څخه د استاد موخه څه ده. استاد خپلو زده کړیالانو ته سم ځواب وایي او دا هغه ځواب و چې د هېچا ذهن ته نه و رسېدلی. هغه وایي: «ان یوه خښته هم غواړي چې یو څه شی شي.»
ولې نه! د باور وړ خبره ده. یوه خښته په یوازې ځان هېڅ هم نه ده، خو که همدغه خښته په هند کې د تاج محل او په پاریس کې د نوتردام په څېر ښکلو ودانیو کې وکارول شي، هرومرو به په یو څه بدله شي. دغه خښته اوسمهال د یوې ښکلې او ځانګړې ودانۍ یوه برخه ده.
غواړم وپوښتم چې کېدای شي د ځمکې په سر داسې یو موجود پیدا کړو چې ونه غواړي د یو لوی شي یوه برخه و اوسي؟ ان یوه خښته هم! حتا یوه خښته هم هیلې او خوبونه لري.
د ناپیلیون هېل په فلسفه کې لکه څنګه چې د «فکر وکړئ او شتمن شئ» په کتاب کې د شتمن کېدو لپاره اړین ګام، علاقه، لېوالتیا او هیله درلودل ښودل شوي دي، همدارنګه شوق، علاقه او لېوالتیا د ټولو لاسته راوړنو د پیل ټکی ګڼل کېږي. همدغه هیله او لېوالتیا درلودل دي چې په خپل ځان کې یو نغښتی ځواک او قدرت لري. دغه ځواک او وړتیا په هغه تخم کې لیدلی شی چې غواړی پر یوه پیاوړې او لویه ونه یې بدل کړی. هېل د دې لپاره چې د دې هیلې او لېوالتیا مفهوم یې په ښه توګه واضح کړی وي، ډېرې بېلګې راوړې دي. هغه د یوې ساده تګلارې له مخې خپل طرز او کړنلاره په شپږو عملي ګامونو کې خلاصه کوي.
لومړی ګام:
د هغو پیسو مبلغ چې د درلودلو هیله یې لری، په خپل ذهن کې یې تصور کړئ او د پیسو مقدار په سمه توګه وټاکئ.
دویم ګام:
په پوره غور سره مشخص کړئ چې د دغو پیسو د لاسته راوړلو لپاره د کومو کارونو د کولو او کومو شیانو د له لاسه ورکولو لپاره تیار یئ. «نابرده رنج، ګنج میسر نمی شود.»
درېیم ګام:
هغه ټاکلې نېټه مشخصه کړئ چې غواړی دغه پیسې لاسته راوړی؟
څلورم ګام:
خپلو هیلو ته د رسېدو لپاره ټاکلی پروګرام او طرحه جوړه کړئ او له ځنډ پرته یې د عملي کولو لپاره لاس پکار شئ.
پنځم ګام:
د پام وړ پیسو لپاره یوه ټاکلې وینا ولیکئ، په دې وینا کې د پیسو پر مبالغو سربېره، ټاکلی او محدود وخت، د همدغو پیسو د لاسته راوړلو لپاره کېدونکې هڅې او خپل پروګرام او طرحه د یو لیکلړ په توګه ولیکئ.
شپږم ګام:
دغه لیکلې وینا په ورځ کې دوه ځله په لوړ غږ ولولئ. غوره ده چې دغه وینا له ویده کېدو مخکې او له ویښېدو وروسته هم یو ځل ولولئ. کله چې وینا لولی، خپل ځان داسې تصور کړئ چې ګواکې پیسې مو لاسته راوړې دي او د هغه حالت هره شېبه په ځانګړې توګه تصویر او مجسمه کړئ.
دغه مرحلې له تاسو سره مرسته کوي چې په یوه خوا کې لوېدلې خښته ونه اوسی، بلکې لږ تر لږه هغه منځنۍ خښته و اوسئ چې د ځان لپاره خپلې ځانګړې هیلې او خوبونه لري. ستاسو غوښتنه که هر څه وي، هغه که یوې لوړې موخې ته رسېدل وي، د شتمنۍ لاسته راوړل وي، د یو نوي کار او کسب پیلول وي، اړینه ده چې په ټوله مانا یې غوښتونکي و اوسئ او د درلودلو او غوښتلو هیلې ته یې هماغسې چې هېل واضح کړې ده، په زړه کې وده ورکړئ. تل په یاد ولرئ چې: «ان یوه بې روحه خښته هم غواړي چې یو څه شی شي!»
د نورو لپاره هم یو څه وکړئ!
کېدای شي تاسو راتلونکی ګاندي، مېرمن ترزا او یا فرانک شانکویتز ونه اوسی، دا چې تاسو یو مشهور کس نه یاست، اړینه نه ده. که چېرې تاسو د یوې خیریه موسسې لپاره مالي سرچینې او لېوالتیا نه لری، هېڅ د اندېښنې او خپګان خبره نه ده. اړینه ده چې له هغوی سره مرسته وکړئ چې لوړې هیلې او موخې لري. څه ډول کولای شو چې د ژوند لپاره پر یو غوره مکان د نړۍ پر بدلولو کې ونډه واخلو؟ همدا نن د نورو د مرستې او لاسنیوي لپاره کوم کوچنی کار ترسه کولای شی؟
