که غواړی چې هغه کس جوړ شی چې تاسې یې غواړی او هغه موخې چې تاسې یې څښتنان یاستی، په خپل ذهن کې ښې تصور کړی، لاندې کړنې تر سره کړئ:
۱ـ له ځان سره مو ژمنه وکړئ
ممکن یو کس هم پر تاسې باور ونه کړي او تاسې بریا ته ونه رسېږی، خو که پر ځان باور ونه لری، هېڅکله به بریالي نه شی. که پر ځان باور نه لری، بیا دا هم نه شی کولای چې په ارامۍ سره پر نورو شیانو باور وکړی او یا هېڅ دا انګېزه نه لری چې یو قدم پرمخ واخلی. خو هغه کسان چې د خپلو موخو مسوولیت مني او پر ځان باور لري، په ډېرې راحتۍ او ډاډ سره له ځان سره ژمنه کولای شي.
«حتی که پر تاسې یو کس هم باور ونه لري، بیا هم کولای شی بریا ته ورسېږی؛ خو که پر ځان باور ونه لری، هېڅکله به بریالي نه شی.»
د خپلو موخو څښتن اوسېدل په دې مانا چې پر ځان باور ولرئ او ټولې وېرې مو له زړه وباسئ. د «اکیلا او سیالي» فیلم ډېرې صحنې پر ځان او وړتیاوو باور لرلو ته اشاره کوي.
د دې فیلم کیسه د اکیلا په نوم د یوې نجلۍ پر ژوند راڅرخي، چې په لاس انجلیس کې ژوند کوي. هغه پر ډېرو ستونزو او مشکلاتو برلاسې کېږي او د دې لپاره هڅه کوي چې د هجي په نړیوالو سیالیو کې ګډون وکړي. کله یې چې استاد ډاکټر لارابي له هغې وپوښتل: «ایا په ژوند کې کوم هدف لرې؟ کله چې لویه شې، څه غواړې؟ ډاکټره، وکیله او یا هم کمېډنه؟ اکیلا ځواب ورکړ: «نه پوهېږم، خو یوازې دومره پوهېږم چې په هجي کولو کې پیاوړې یم.»
استاد یې هغه ته یوه تابلو وښوده او وویل: «لاړه شه هلته او هغه مطلب چې پر هغه تابلو لیکل شوی، په لوړ اواز یې ولوله!»
اکیلا وویل: «زموږ لویه وېره له دې نه ده چې موږ نالایق او بې کفایته یاستو، بلکې وېره مو له دې ده چې موږ له اندازې زیات پياوړي یاستو. موږ له ځانه پوښتو، زه څوک یم چې پياوړی او بااستعداده و اوسم؟ په اصل کې دا پوښتنه داسې مطرح شوې ده چې دا ډول شی؟ موږ دې دنیا ته د دې لپاره رالېږل شوي یو، څو د خدای ج هغه وړتیا چې موږ ته یې راکړې ده، په مټ یې د دې دنیا هستۍ ته ښکلا ور وبښو. کله چې د خپلې دروني وړتیا څرګندولو ته چانس ورکړو، نورو ته هم دا فرصت ورکوو چې هغوی هم دا کار وکړي.»
لارابي پوښتي: «ایا همدا څه تاسې ته کومه مانا لري؟ دا یانې څه؟»
هغه بېرته ځواب ورکوي: «دا یانې موږ باید ونه وېرېږو.»
لارابي: «له څه وېره؟»
اکیلا: «وېره له …. .»
تاسې تر هغې چې پر خپل ځان باور ونه کړی، پر خپلو موخو باور نه شی کولای. په همدې اړه تاسې ته یو مطلب وایم: زه په زړه کې لویې لویې موخې لرم، ځکه فکر کوم چې ورته رسېدلی شم، نه په دې دلیل چې زه خلاق او نوښتګر یم. هر څوک دا وړتیا لري چې هرڅه خلق کړي او هرڅه ته په ارزښت قایل شي. زما وده او پرمختګ کول له ماشوموالي پيل شوي وو. مور، پلار او ښوونکي مې راسره مرسته کړې وه. له هغه وروسته مې هم ښوونکو، د ژوند ملګري او هم اولادونو راسره مرسته کړې ده. دې ټولو زما حوصله او وړتیاوې لوړې کړې دي.»
که غواړی چې بریالي اوسی، باید باوري اوسئ چې کوم کار به کوی. که غواړی چې خپلې موخې پر حقیقت بدلې کړی، باید له ځان سره ژمنه وکړئ.
۲ـ د دې پر ځای چې ژوند مو څنګه دی او هغسې چې دی هماسې یې ومنئ؛ پر ځای یې هغه رهبري کړئ
د انتخاب او ټاکنې وړتیا تر ټولو پیاوړې ځانګړنه ده چې یو څوک یې لري. له بده مرغه ډېری کسان پرته له څنګې او ولې ژوند هغسې چې دی، مني یې او هېڅکله نه شي کولای چې رهبري یې کړي. بالاخره هغه کسان خپله ځان ته پر یوه ستونزه بدلېږي او نه شي کولای چې پر هغو ستونزو برلاسي شي چې د دوی د پرمختګ مخه نیسي.
د یوې موخې د لرلو لپاره باید د خپل ژوند کنټرول په خپل لاس کې ولری او ژوند مو څنګه چې دی، هغسې یې ومنئ. الي ویسل د دویمې نړیوالې جګړي سرتېری لیکي: «کله چې مړ شې او له خپل خالق سره ملاقات وکړې، هلته له تا څوک نه پوښتي چې ولې دې د سرطان لپاره درمل کشف نه کړل، هلته له تا پوښتي چې ولې پر هغه کس چې توانايي او وړتیا یې مو درلوده، بدل نه شوې؟»
خپلو خدای راکړل شوو وړتیاوو ته رسېدنه یا له هغه ګټنه، په دې پورې تړلې چې د خپل ځان او ژوند مسوولیت مو خپله ومنئ، مانا دا چې د یو فعال رهبر نقش ولوبوئ.
څنګه کولای شی دا کار وکړی؟ ځان ته په هو ویلو، هیلې او موخو لرلو سره دا کار کولای شو. که له نه ویلو سره عادت یاستی، کېدای شي له ځینو ستونزو سره مخ شی. که همدا خبره ستاسې په اړه صدق کوي، لږ تر لږه ځان په هو ویلو هم عادت کړئ. دا له یاده مه باسئ چې تاسې خپله د خپل ځان لپاره یوه معجزه یاستی. مانا دا چې هرڅوک په هغه پورې د تړلو وړتیاوو، تجربو او مناسبو فرصتونو لرونکي دي، چې ممکن نور له هغه محروم وي. دا ستاسې مسوولیت دی چې پر هغه څه بدل شی، چې ستاسې په وجود کې د هغه وړتیا او توانايي شته. دا نه یوازې ستاسې په ګټه دي، بلکې د ټولو په ګټه دي.
۳ـ له خپل کار سره مو مینه وکړئ او هغه کار وکړئ چې مینه ورسره لری
ایرونیک برلین د امریکا له پیاوړو موسیقي پوهانو څخه دی، چې ډېرې سندرې او ترانې یې ویلې دي او لا اوس یې هم ترانې د نړۍ د ډېرو پلورل شوو ترانو په کتار کې راځي. له ساندیګو یونیون سره د مصاحبې پر مهال دان فردي له هغه پوښتي: «ایا داسې کومه پوښتنه شته چې تر اوسه له تا نه وي پوښتل شوې او ته غواړې چې هغه له تا وپوښتل شي؟»
برلین ځواب ورکړ: «هو، هغه پوښتنه چې تاسې د هغو بې شمېره سندرو په اړه چې ویلې مو دي او تاسې تر ډېره په همدې کار کې بریالي یاستی، څه فکر کوی؟ او زه ځواب ورکوم چې زه اوس هم داسې فکر کوم چې هغه هرڅه فوق العاده دي.»
بریالي انسانان هغوی دي، چې موخې لري او هغه تعقیبوي. هغوی له خپل کار سره مینه لري او هغه کار کوي چې مینه ورسره لري. هغوی پر دې برلاسي دي چې د خپلو غوښتنو او وړتیاوو رهبر و اوسي. ولې؟ ځکه استعداد، موخې او بالقوه وړتیاوې هر وخت یو پر بل پسې پر حرکت راځي. زه پر دې باوري یم چې خدای پاک هېڅوک داسې نه دي پيدا کړي چې له یوې برخې سره د مینه ولري او په بله برخه کې دې وړتیا ولري. هر وخت د وړتیا او مینې تر منځ مستقیمه رابطه شته.
د «له ژوند سره باید څه وکړم؟» کتاب لیکوال پو برونسون لیکي: «زه دې پایلې ته رسېدلی یم چې تلپاتې بریا په کسب او کار کې هغه وخت پیلېږي، کله چې له ځانه دا پوښتنه وکړو چې له ژوند سره باید څه وکړو؟ هو، رښتیا چې همداسې ده. یو څوک یو فوق العاده صنعت ته په داخلېدو سره نه بریالی کېږي او نه هم د یو مشخص کار په ټاکلو سره بریا ته رسېدای شي؛ بلکې هغه وخت بریا ته رسېدای شي چې له ځانه وپوښتي، دی/دا په اصل کې څوک دی/ده او له دې وروسته د هغه کسب او کار په لټه کې شي، چې مینه ورسره لري.
ډېری بریالي کسان هغسې چې برونسون وايي، عمل کوي. کارلي فیورنیا وايي: «یا ښه په مینه یو کار وکړئ او یا هغه ښکل کړئ او ترې تېر شئ. د نورو د خوښ ساتلو لپاره کار مه کوئ، هغه کار وکړئ چې زړه او ذهن مو یې غواړي. داسې انتخاب وکړئ چې ټول وجود مو پر حرکت راولي». د نورو د موخو لاس ته راوړونکي مه اوسئ، ولې؟ ځکه کله چې موخو ته رسېدل غواړی، موخې مو هم تاسې ته رسېدل غواړي؛ نو پر دې اساس، د نورو د موخو پالل پر یو وحشتناک غوایه له بدلېدو پرته بل څه نه دي.
