پر اوکراین د روسیې له برید وروسته د روسیې او ناټو ترمنځ لانجې زیاتېږي. له هغه وروسته چې د ناټو ځینو غړو له اوکراین سره د وسلو د مرستو اعلان وکړ، د روسیې ولسمشر د خپل هېواد د اټومي برید ځواکونو ته د تیارسئ امر کړی دی. پوتین ویلي چې دا پرېکړه د ناټو مشرانو له دښمنانه څرګندونو وروسته کوي. د پوتین دغه ګام د اروپايي او امریکايي مشرانو له خوا غندل شوی او پرون په یوه بې ساري ګام کې د ملګرو ملتونو امنیت شورا پر اوکراین د روسیې د برید په تړاو د یوې ځانګړې غونډې جوړېدو ته رایه ورکړه. تر دې مخکې دا پرېکړه د روسیې له خوا ویتو شوې وه، خو دا ځل روسیې نشو کولای چې « د سولې لپاره اتحاد» تر عنوان لاندې ددې ځانګړې غونډې جوړېدل ویتو کړي.
د هرې ورځې په تېرېدو سره د اوکراین کړکېچ نوي اړخونه پیدا کوي او ناټو او روسیه سره ښکر په ښکر کېږي. داسې اندېښنې شته چې ښايي دا جګړه پراخه شي. له همدې کبله ناټو او روسیه دواړه هڅه کوي چې په دې لانجه کې خپل متحدین زیات کړي، څو پر مقابل لوري فشار راوړي. امریکا هڅه وکړه چې د امنیت شورا غیر دایمي غړی هېواد هند قانع کړي چې د روسیې پر ضد رایه ورکړي، خو ونه توانیده. د دواړو اړخونو له خوا دا هڅې لا هم روانې دي. که دا لانجه لا زیاته پراخه شي، نو خبره تر افغانستان پورې هم را رسېږي چې دواړه اړخونه به هڅه وکړي چې یو د بل پر ضد یې وکاروي. له نیکه مرغه تر اوسه د اسلامي امارت دریځ ښه دی چې د یوه لوري ملاتړ هم نه کوي او له دواړو لورو غواړي چې د خبرو له لارې ستونزه حل کړي. دا د اوس لپاره ښه او سم دریځ دی او د افغانستان په ګټه دی، خو که لانجه زیاتېږي، نو د افغانستان لپاره به بیا سم دریځ څه وي؟ دا ډېره مهمه او اساسي پوښتنه ده، ځکه چې له اسلامي امارت سره تعامل په د دغه دریځ پر اساس وي. له بشري او نورو مرستو نیولې د افغانستان تر رسمیت پېژندلو پورې ښايي ګڼ مسایل د اسلامي امارت له همدې دریځ سره غوټه شي. بله وېره دا هم ده چې ښايي ناټو او روسیه دواړه په افغانستان کې د استخباراتي او نیابتي ډلو پر مټ یو بل ته ستونزې جوړې کړي او ان له وړاندې دا شننه وه چې امریکا غواړي دلته د داعش په تقویې سره په منځنۍ اسیا کې روسیې ته سرخوږی جوړ کړي.
پر اوکراین برید او د روسیې او ناټو د ټکر پراختیا له شک پرته چې د افغانستان پر امنیت، ثبات او له نړۍ سره د اسلامي امارت پر اړیکو ژور اغېز پرې باسي. له همدې امله پکار ده چې سره له اوسه یو منظم ټیم وټاکل شي چې ددې ستونزې ټول اړخونه او نوي بدلونونه مطالعه کړي او وخت پر وخت چارواکو ته داسې مشورې ورکړي چې که د هغو پر اساس تصمیم ونیول شي، نو له دې کړکېچه به افغانستان خوندي پاتې شي او له نوو بدلونونو به د افغانستان په ګټه هم کار واخیستل شي.
