د افغان سفارتونو د راخپلولو بریالۍ هڅې

د افغانستان د بهرنیو چارو سرپرست وزیر په لومړي ځل له هېواده بهر یو سفارت ته ورغلی دی. امیرخان متقي چې د اطلاعاتو او فرهنګ وزارت سرپرست خیرالله خیرخوا هم ورسره و، په انقره کې افغان سفارت ته ورغلی و او هلته یې له افغان دیپلوماتانو، افغان محصلینو او ځینو نورو افغانانو سره وکتل. له متقي سره په دې غونډو کې د سفیر په ګډون ځیني دیپلوماتان وو، خو ځینو یې غونډې ته له ورتګه ډډه کړې ده. په غونډه کې ویل شوي چې له دې وروسته به د سفارت چارې د اسلامي امارت له اوامرو سره سمې مخ ته ځي او دیپلوماتان دې د پخوا په څېر خپلو دندو ته دوام ورکړي. تر دې وړاندې په پاکستان، قطر، چین او ایران کې د افغانستان سفارتونه هم د اسلامي امارت تر کنټرول لاندې راغلي وو او آن دریو سفارتونو ته یې خپل سرپرستان هم ورلېږلي دي.
په نورو هېوادونو کې د افغانستان سفارتونه د اسلامي امارت لپاره لا هم یوه لویه لانجه ده، ځکه چې دا سفارتونه نه یوازې دا چې د اسلامي امارت د غوښتنو او هدایاتو پر اساس عمل نه کوي، بلکې ډېری سفارتونه یې برعکس عمل کوي. دا سفارتونه چې تر ډېره د جمعیت اسلامي کسان پکې واکمن دي، په بهرنیو هېوادونو کې د اسلامي امارت د تخریب په مرکزونو کې بدل شوي دي. هلته شته ډېری دیپلوماتان هره ورځ په کوربه هېواد کې د اسلامي امارت پر ضد سیاسي فعالیتونه کوي او ددې تر څنګ هغو کسانو ته لابي کوي چې ځان د اسلامي امارت سیاسي او نظامي مخالفین ګڼي. له بله اړخه په دغو سفارتونو کې پراخې خپلمنځي ستونزې هم شته چې ډېری وخت آن تر فزیکې شخړې پورې رسېږي چې دا بیا د ټول افغانستان او افغانانو لوی تصویر ته زیان اړوي. له بله اړخه په دغو سفارتونو کې یوه برخه داسې کسان شته چې غواړي د افغانستان استازیتوب وکړي او له اسلامي امارت سره هم کار وکړي، خو له دې کبله چې ډېری سفیران د اسلامي امارت مخالفین دي، نو ځکه دوی ته ددې چانس نه برابرېږي. یوه بله ستونزه دا ده چې په ځینو سفارتونو او قونسلګریو کې مالي فساد هم روان دی او هغه عواید چې قونسلګرۍ او سفارتونه یې لري، دوی یې شخصي جیبونو ته اچوي. له همدې سره هممهاله بیا ګڼو دیپلوماتانو له دې امله چې سفارت یې د اسلامي امارت هدایات نه مني، څو میاشتې معاش نه دی اخیستی او له سختو اقتصادي ستونزو سره لاس او ګریوان دي.
تر هغو چې اسلامي امارت د بهرنیو هېوادونو له خوا په رسمیت پېژندل کېږي، دا ښه هڅه ده چې په ځینو هېوادونو کې سفارتونه اسلامي امارت ته وسپارل ش‍ي او یا هم لږ تر لږه شته سفیران او دیپلوماتان د اسلامي امارت د غوښتنو او هدایاتو پر اساس عمل وکړي.‌ دا چاره به ددې سبب شي چې دا سفارتونه د نظام د تخریب له هڅو را وګرځول شي، مالي فساد به پکې کم او یا ختم شي او ددې تر څنګ به د دیپلوماتانو د معاش او نورو ستونزو په حل کې هم پرمختګ شوی وي.‌ پر دې اساس پکار ده چې دا هڅې نورو هېوادونو هم وغځول شي او سفارتونه د افغانستان د حکومت استازي شي.