بامیان د افغانستان یو له هغو ولایتونو څخه دی چې په دې وروستیو کې یې د نړیوالو سیلانیانو پام ځان ته را اړولی دی. دا ولایت، چې د خپلو تاریخي او فرهنګي میراثونو له امله شهرت لري، د نړۍ له ګوټ ګوټ څخه سیلانیان راجلبوي. په وروستیو کلونو کې، افغانستان نسبي امن ترلاسه کړی او اوس د نړۍ د سیلانیانو لپاره یو زړه راښکونکی ځای دی. دا وضعیت، چې په افغانستان کې یې یوه بې مخینې مرحله پیل کړې، د هیواد په تاریخ کې یو نوې فصل پرانیزي.
بامیان، په ځانګړي ډول د بودا مجسمو او بند امیر د طبیعي پارک له امله شهرت لري، چې دا ځایونه په خپل ځان کې د نړیوالو لپاره د حیرانتیا او راښکون لامل ګرځي. هر کال په زرګونو سیلانیان دې ځایونو ته راځي تر څو د بامیانو ښکلا او فرهنګي میراثونه وګوري. په دې توګه، بامیان کولای شي د افغانستان د سیاحت په برخه کې یو مهم رول ولوبوي.
خو ددې ټولو ښو خبرونو سره سره، بامیان جدي پاملرنې ته اړتیا لري ترڅو لا زیات سیلانیان دې سیمې ته راجلب شي. په بامیانو کې معیاري هوټلونه ډېر کم یا د ګوتو په شمار دي. دا هوټلونه د سیلانیانو د اړتیاوو پوره کولو لپاره کافي نه دي او د سیلانیانو د زیاتېدونکي شمېر سره سم، دې برخه کې باید پانګونه زیاته شي. معیاري هوټلونه کولای شي سیلانیانو ته د استوګنې اسانتیاوې برابرې کړي او سفر یې له خاطرو ډک کړي.
په بامیانو کې د هوټلونو او رستورانتونو د نشتوالي تر څنګ، د پاکۍ او خوندیتوب ستونزې هم موجودې دي. ډېری محلي رستورانتونه د پاکۍ او خوندیتوب معیارونه نه پوره کوي، چې دا مسئله د سیلانیانو لپاره یو جدي خنډ ګرځي. د حکومت او خصوصي سکتور لپاره اړینه ده چې په دې برخه کې پانګونه وکړي او معیاري رستورانتونه جوړ کړي. په دې رستورانتونو کې باید د محلي خوراکونو ترڅنګ، د نړیوالو خوراکونو اسانتیاوې هم برابرې شي ترڅو سیلانیان له خوراکونو هم خوند واخلي.
بامیان د خپلو سنتي بازارونو له امله هم مشهور دی، خو دې برخه کې هم پرمختګ ته اړتیا ده. سنتي بازارونه باید زیات شي او د سیلانیانو لپاره لا جذاب شي. دا بازارونه کولای شي سیلانیانو ته د محلي محصولات او لاسي صنایعو نندارتونونه وړاندې کړي، چې په نتیجه کې به د محلي اقتصاد وده وکړي.
د بامیانو سیمه یوازې د تاریخي او فرهنګي میراثونو له امله نه ده مشهوره، بلکې دا سیمه د ښکلي طبیعت او غرونو له امله هم ځانګړې ده. بامیان کولای شي د طبیعت مینهوالو لپاره یو مهم ځای وي، چې په دې ځای کې کولای شي د غرونو په لمنو کې وګرځي، د ځنګلونو او آبشارونو ننداره وکړي او د طبیعت ښکلا وویني.
په ټوله کې، د بامیانو د پرمختګ لپاره حکومت جدي اقداماتو ته اړتیا لري. حکومت باید په بامیانو کې د سیاحت د پراختیا لپاره ځانګړې تګلارې جوړې کړي او په دې برخه کې لازمې اسانتیاوې برابرې کړي. د حکومت ترڅنګ، خصوصي سکتور هم باید په سیاحتي برخه کې پانګونه وکړي او ټول هغه سهولتونه په بامیانو کې برابر کړي چې کورني او بهرني سیلانیان ورته اړتیا لري. دا اقدامات به نه یوازې د بامیانو سیمه پرمختللې کړي، بلکې د افغانستان د اقتصادي وده لپاره به هم مهم رول ولوبوي.
دا یو طلايي فرصت دی چې افغانستان د بامیانو په شان سیمو ته پاملرنه وکړي او د سیاحت په برخه کې نړیوال معیارونه پلي کړي. په دې توګه به افغانستان وکولای شي چې د نړۍ په سیاحتي نقشه کې یو مهم ځای ولري او د خپلو فرهنګي او تاریخي میراثونو په ساتنه کې بریالی وي. په پایله کې نه یوازې د هېواد اقتصاد ته ګټه ورسوي، بلکې د افغانستان د مثبت تصویر په وړاندې کولو کې هم مرسته وکړي.
په پای کې، باید وویل شي چې د بامیانو پرمختګ یوازې د حکومت او خصوصي سکتور په ګډو هڅو پورې تړلی دی. که موږ غواړو چې بامیان د سیاحت په برخه کې یو نړیوال ځای شي، نو باید ټولې اړوندې برخې په ګډه کار وکړي او د بامیانو پرمختګ لپاره جدي او دوامداره هڅې وکړي. د بامیانو پرمختګ به د افغانستان د راتلونکې لپاره یو مثبت ګام وي چې نه یوازې د سیمې خلکو ته به اقتصادي فرصتونه برابر کړي، بلکې د هیواد نړیوال حیثیت به هم لوړ کړي.
