د ټکنالوژۍ او نورو پرمختګونو له امله ورځ تر بلې نړۍ بدلېږي. دا بدلونونه له یوې خوا د نویو کاري فرصتونو او اسانتیاوو سبب کېږي او له بلې خوا د ځینو کارونو د ختمېدو او نابودۍ زمینه هم برابروي.
دلته به د هغو دندو په اړه معلومات درکړو، چې ویل کېږي تر راتلونکو لسو کلونو پورې نابودېږي او دوام نه کوي.
باید یادونه وکړو چې د دغو دندو د کم ارزښته کېدو یا نابودۍ وړاندوېنه نړیوالې اقتصادي ټولنې کړې ده.
دلته به پر دغو کارونو یا دندو او د هغوی په بې ارزښته کېدو او لاملونو یې بحث وکړو:
کرنه
د ارقامو له مخې د کرنیز صنعت میکانېز کېدل او ماشیني کېدل په ټوله کې د دې سبب شوي، چې په دغه دنده کې د انساني ظرفیت د کارولو اړتیا او سلنه ورځ تر بلې راکمه شي.
په دې برخه کې د امریکا متحده ایالتونو مثال د یادونې وړ دی. دغه هېواد په وروستیو کلونو کې د خپل کرنیز صنعت د انساني مرستندویانو رول دوه سلنه کم کړی دی، خو په هند کې لا هم ۵۰ سلنه خلک پر کرنه بوخت دي.
په کرنه کې د انساني رول د کم رنګه کېدو لوی دلیل دا دی، چې د دغه صنعت د ماشیني کېدو لګښت د انساني رول په پرتله ډېر ارزانه دی.
د ماشینرۍ ترڅنګ د مصنوعي انسانانو یانې روباتونو رول هم هغه څه دي، چې په کرنیزو فعالیتونو کې انساني رول کمرنګوي او محدودوي یې.
په وروستیو کې جاپان داسې یو روبات نندارې ته وړاندې کړ، چې د غواګانو د غوجلې چارې مخته وړی شي.
د کارخونو کارګران
په جاپان کې وروستي ارقام ښيي چې کارخونې له هرو سلوزرو انساني کارګرانو سره ۱۵۰۰روبات یا مصنوعي انسانان هم پر دندو ګوماري.
مصنوعي انسانانو ته کارخونې په دغه اساس ډېرې لېواله دي، چې چټک، دقیق او بې جنجاله کار ورته کوي.
پر جاپان سربېره ډېر نور صنعتي هېوادونه هم له مصنوعي انسانانو سره کارکولو ته ډېره ترجېح ورکوي.
خبریالان
اسوشیټېډپرېس خبري اژانس د کال په هر موسم کې تر دریو زرو زیات اقتصادي راپورونه د خپلې ټکنالوژۍ په وسیله تولیدوي.
د دې ترڅنګ د ویکیپېډیا د ټولو تولیداتو ۸.۵ سلنه د روباتونو په وسیله تولیدیږي.
سربېره پردې د ټکنالوژۍ ودې ډېرو رسنیو ته د دې موقع برابره کړې، چې بېړني خبرونه د خپلو مخاطبینو یا خبري سرچینو په مستقیمه همکارۍ ترلاسه کړي.
په دې مانا چې اوس دا اړتیا کمه ده، چې رسنۍ په هره سیمه کې ځانګړي خبریالان ولري. دوی د دې پرځای کولای شي په خپلو مرکزي دفترونو کې د یوه یا څو همغږي کوونکو په مرسته د ډېرو سیمو خبرونه ترلاسه او خپاره کړي.
رسنۍ اوس د خبریالانو پرځای شنونکو ته ډېره اړتیا لري. دوی په راتلونکي کې هم زیات تمرکز د خبرټولوونکو خبریالانو پرځای پر هغو خبریالانو کوي، چې د شننو، تحقیق او نورو تخصصي وړتیاوو لرونکي وي.
په دې توګه د خبر ټولوونکو او په عامه اصطلاح عادي خبریالانو راتلونکی ښه نه دی.
معلمي
د ټکنالوژۍ ودې د زده کړو په برخه کې هم ډېرې اسانتیاوې برابرې کړي. اوس وخت ډېرې لنډمهاله زده کړې، چې پخوا ورته خلکو ښوونکي نیول، په انلاین ډول د یوټیوب له لارې زده کېدای شي. سربېره پردې، رسمي انلاین زده کړې هم اسانه شوې او پراخه شوې دي.
ډېر نړیوال پوهنتونونه اوسمهال په انلاین ډول خپل محصلین له چمتو شویو روزنیزو پکېجونو څخه برخمنوي او دا کار به په راتلونکي کې لا چټک شي. دغه وضعیت په چټک ډول په روزنیزه برخه کې انساني رول یانې د ښوونکو نقش کمرنګه کوي.
روغتیایي کارکوونکي
په طبابت کې هم ورځ تربلې د ټکنالوژۍ ونډه زیاتېږي. دغه ونډه د انساني نقش د کمرنګه کېدو سبب کېږي او په دغه ډګر کې د مرستندویو کارکوونکو شمېر کموي.
وکیلان او حقوقي کارپوهان
د ټکنالوژۍ وده د دې لامل کېږي، چې په عدلي او قضایي برخو کې هم سهولتونه زیات او د شخړو د حل او فصل او ثابتولو لپاره د مدافع وکیلانو او حقوقي کارپوهانو نقش کمرنګه شي. ټکنالوژي د دوی هغه هڅې، چې د اطلاع موندنې لپاره یې کوي، کم ارزښته کوي.
منشیان یا حسابداران
پخوا به زیاتو کاروباریانو منشیان یا حسابداران لرل. اوسمهال د حسابدارۍ ماشینونه او نور امکانات زیات شوي او لا نور به زیات شي. دغه وضعیت د منشیانو یا حسابدارانو په حیث، د انسانانو کاري فرصت کم کړی او لا نور به یې کم کړي.
ډرېوري
ډرېوري یا موټرچلونه تر ډېره د یوه کسب په توګه پېژندل کېده، خو اوس هر څوک تقریباً هڅه کوي چې خپله موټر چلول زده کړي. دغه وضعیت د یوه کسب یا کار په توګه د ډرېورۍ د نابودۍ سبب کېږي.
