لس مهمې خبرې یا ټکي شته چې په ښه او پراخه ډول سره ستاسې د کاروبار د بریالیتوب او یا ناکامۍ لامل کېدای شي. که په واقعیت او صداقت سره دا لس ټکي عملي کړی، ښه تصمیمونه به ونیولی شی او ښې لاسته راوړنې به هم ولری:
۱– د پېرودونکو ډېرول
د یوه کاروبار یا بېزنېس هدف څه شی دی؟
ډېری خلک فکر کوي چې د کاروبار هدف د ګټې لاسته راوړل دي، خو دا غلطه خبره ده. ځکه د کاروبار اصلي او مهم هدف دا دی چې ډېر پېرېدونکي پیدا، خپل او له ځانه سره وساتی.
همدا راز د یو کاروباري پنځوس سلنه وخت، کوښښونه او لګښتونه باید په دې متمرکز وي چې په یوه نه یوه لاره مشتریان یا پېرودونکي پیدا، ډېر او له ځانه سره یې وهم ساتي.
۲– د پېرودونکي رضایت
د کاروبار د کامیابۍ یوه مهمه برخه د پېرودونکي رضایت او خوشحالي ده. تاسې باید د مشتریانو د رضا کولو دا وړتیا ولری چې هغوی د نورو پر ځای له تاسې سودا واخلي، بیا بیا یې وپېري، یعنې هر ځل تاسې ته راشي او دومره متاثره شي چې د خپل ځان ترڅنګ نور ملګري هم ستاسې خواته راولي چې همدا ستاسې د ډېرې ګټې او لویې بریا لامل کېږي.
۳– ارزښت لوړول
د پیاوړي او کامیاب کاروبار مهمه او کلیدي اړتیا دا ده چې له بېلابېلو لارو خپل ارزښت لوړ کړي. د شتمنۍ سرچینه د کیفیت په ښه والي او باارزښته کولو کې ده، ځکه هر کاروبار هغه وخت ګټه او پراختیا مومي چې کله ارزښتمن وي، یعنې هم یې کیفیت ښه وي او هم په ښه ډول سره کاروبار پرمخ وړي.
نو هره ورځ باید کوښښ وکړئ چې له بېلابېلو لارو مو کاروبار ارزښتمن کړی او د پېرودونکي تجربې ته مو نوي څه ور زیات کړئ.
۴– تل په پېرودونکي پام لرل
په کاروبار کې مهم شخص پېرودونکی دی، نو ځکه باید تل او هر وخت په مشتري ډېر پام او تمرکز وکړئ.
پېرودونکي بې ثباته، بې وفا، بدلېدونکي، بې صبره او د بېلابېلو تقاضاوو لرونکي وي، باید ورسره اړین تګ وشي او هېڅکله نا رضایته نه شي.
۵– مرستندویه اوسېدل
په ژوند، کار او بېزنېس کې د دې لپاره چې خوشحاله او بریالي و اوسی، نو باید له نورو سره مرسته وکړئ.
له نورو سره مرسته او همکاري ستاسې کمپنۍ، پېرودونکو او ټولنې ته یوه مهمه مرکزي اړتیا ده چې دا د دې لامل کېدای شي، څو ډېر خلک ستاسې خواته راجلب شي.
۶– څنګه؟
ډېر مهم سوال چې تاسې یې د ستونزې د حل، په خنډونو کې د بریالي کېدو او یا د کاروبار د هدف د ترلاسه کولو لپاره پوښتی، هغه د (څنګه) پوښتنه ده. ښه خلک تل د (څنګه) پوښتنه کوي او بیا یې د ځواب لپاره لازم ګام پورته کوي، څو یې حللاره پیدا کړي. نو تاسې هم باید په هره برخه کې له ځانه سره ووایئ چې څنګه ګټه او څنګه تاوان او بیا ورته د حللارې په لټه کې شئ.
۷– دوامداره پرمختګ
په دې چټکه بدلېدونکې نړۍ او تېزو رقابتونو کې باید په شخصي ژوند او د کاروبار په هره برخه کې پرمختګونه دوامداره وساتئ.
د باسکټبال یو روزونکی پټ رایلي وايي: «که چېرې د ښه والي لور ته لاړ نه شی، نو د بدوالي پر لور به ورځی.»
یعنې که موږ بې له پرمختګه پاتې شو یا ورته کار ونه کړو، دا د دې لامل کېږي چې د بدوالي په طرف لاړ شو.
۸– پلورنه
هغه څه چې ستاسې د بېزنېس زړه لړزوي، پلورنه یا خرڅول دي. ډن او براډسټرېټ دوو څېړونکو په زرګونو د هغو کمپنیو څېړنه کړې چې ماتې شوې دي. د ماتېدو د ډېرو نورو علتونو ترڅنګ یې یو هم دا و چې کمزورې یا کمه پلورنه یې درلوده. یعنې خرڅلاو یې ډېر نه و.
نو هغوی دې پایلې ته ورسېدل چې د یوه کاروبار کامیابي په لوړه کچه خرڅلاو کې ده.
۹– وده او پراختیا
هر کاروبار باید د ودې او پراختیا یو پلان ولري. د کاروبار پراختیا باید ستاسې د فعالیتونو اصلي هدف وي. تاسې باید په هر کال کې د ۱۰ سلنې، ۲۰ سلنې یا ۳۰ سلنې ودې او پراختیا هدف ولری.
داسې کمپنۍ شته چې په یوه کال کې یې تر ۵۰ سلنه او ان سل سلنه پرمختګ کړی او دا ممکن دی، کوم تصادف نه دی.
