په دې ورځو کې حکومتي پلوي سیاستوال، ځینې عام خلک او کله کله بهرنیان هم د ټاکنو د پایلو د ژر اعلان غوښتنه کوي. دوی وايي چې تاکنې شوې دي، خلکو رایه ورکړې ده او اوس پکار ده چې د خلکو د رایو پر اساس پایلې اعلان شي. دې چارې ورو ورو داسې یو تصور را پیدا کړی چې په دې اعلان سره ښايي، نه یوازې ټاکنیزه لانجه، بلکې د افغانستان نورې ستونزې هم حل شي.
خو د ټاکنو د پایلو په اعلان سره ټاکنیزه لانجه او نورې ستونزې حل کېږي او که دا به د یوې بلې ستونزې پیل وي؟
له ولسمشریزو ټاکنو ډېر وخت تېر شوی، خو د پایلې اعلان یې څه باندې دوې میاشتې ځنډېدلی دی. سره له دې چې ټاکنې له پراخ تحریم سره مخ وې او تر دوو میلیونو کمو خلکو پکې ګډون وکړ، لانجې، کمزوری مدیریت، سیاسي لوبې او بهرنۍ مداخلې د دې سبب شوې چې پایلې یې هم پر وخت اعلان نه شي. د ټاکنو د پایلو اعلان په ښکاره د ډاکټر عبدالله او نورو کاندیدانو د مخالفت پر اساس ځنډول شوی، خو په واقعیت کې یې تر شا بهرنیان دي چې د ځانګړو موخو لپاره د ټاکنو د پایلو اعلان ځنډوي.
اوس که د ټاکنو پایلې اعلان هم شي، په دوو دلایلو نه یوازې دا چې ستونزې نه حل کوي، بلکې زیاتوي یې. لومړی دا چې کاندیدان دغه پایلې نه مني او کمېسیون د حکومت پر پلوۍ او ناقانونۍ تورنوي. په دې سره نه یوازې ستونزه حل کېږي نه، بلکې سیاسي مخالفت او په ټوله کې سیاسي بې ثباتي زیاتېږي. دویم دا چې که د ټاکنو پایلې اعلان هم شي، ستونزې نه ختمیږي. د اوسنیو ټاکنو په پایله کې اعلانېدونکی ولسمشر به د شاوخوا اتو لکو خلکو رایې ولري، چې دا خپله یوه لویه ستونزه ده. د اتو لکو کسانو د رایو پر اساس، پر ۳۶ میلیونو خلکو حکومت کول او یا د دې ټولو ځان ولسمشر ګڼل، خپله ستونزه ده. د اتو لکو خلکو د رایو واکمني خپله د اساسي قانون، ولسواکۍ او جمهوریت نقض دی چې دوام یې ستونزمن دی. د اتو لکو کسانو د رایو پر اساس د یو ولسمشر او حکومت د کار دوام خپله د سیاسي بې ثباتۍ لامل کېږي، چې په طبیعي ډول به حکومت کمزوری، بې ریښې او بې ولسي ملاتړه وي. د دغسې یو حکومت راتګ چې ټول رایه ورکوونکي یې یو میلیون ته نه رسیږي، نه په کور دننه کوم مهم کار کولی شي او نه هم په نړیواله کچه د افغانستان لپاره کومه لاسته راوړنه لرلی شي، ځکه چې حکومت به کمزوری، بې ریښې او بې ولسي ملاتړه وي.
پر همدغو دلایلو د ټاکنو د پایلو اعلان نه یوازې دا چې ستونزې حل کوي نه، بلکې ډېروي یې. تر هغو چې زموږ حکومتي چارواکي د واک د غځېدو له هڅې را ونه ګرځي او پر لویو مسایلو تکیه ونه کړي او تر هغو چې زموږ سیاستوال د شخصي مسایلو پر ځای پر لویو او ملي مسایلو تمرکز ونه کړي، موږ به خپلې ستونزې ورځ تر بلې ډېروو. اوس باید حکومت د اتو لکو کسانو د رایو پر اساس ځان ته د مشروعیت اخیستو پر ځای هڅه وکړي چې ولس پر ځان را ټول کړي. باید ولسي مشروعیت پیدا کړي، سیاستوال را ټول کړي او په ټوله کې د افغانستان د اساسي ستونزو پر حل او د سولې لپاره پر کارنده لارو چارو فکر او کار وکړي.
