د شينجيانګ په اړه د چين د کمونېست ګوند درېيمه کاري غونډه څو ورځې مخکې د چين په پلازمېنه بېجينګ کې تر سره شوه. د بې وزلۍ له منځه وړل او د خلکو د ژوند ښه والی په دغه غونډه کې عمده موضوعات وو. د چين د دولت ریيس شي جين پينګ د شينجيانګ په جنوبي برخه کې د خلکو د ژوند ښه والي ته ډېره پاملرنه کړې ده او کوي يې. د شينجيانګ جنوبي برخه يانې د شينجيانګ د تيان غره په جنوبي لمن کې پرته منطقه ده. پخوا د کاشغر، ختن او قزلسو قرغيز کورواکه سيمې په شمول، په ځینو سيمو کې په دريو کورنيو کې يوه بې وزله کورنۍ وه، نو ويل کېږي چې په دې سيمه کې د بې وزلۍ د له منځه وړلو کارونه له زياتو ستونزو سره مخ دي.
سږ کال مې د سپټمبر له اوومې تر پنځلسمې نېټې د بايغولن مغولي کورواکې سيمې، کاشغر سيمې او قزلسو قرغيز کورواکې سيمې په شمول، د شينجيانګ د جنوبي برخې له ډېرو ځايونو څخه ليدنې وکړې او هلته مې له استوګنيزو سيمو، علاقهداريو او کليو، فابريکو او په کرنيزو فارمونو کې مرکې وکړې. له نږدې مې ليدلي چې د شينجيانګ د جنوبي برخې په بېلابېلو ځايونو کې ځايي اوسيدونکي د مرکزي حکومت او ځايي حکومتي ادارې په لارښوونه د نويو استوګنځايونو د ابادۍ، د توليدي او کرنيزو چارو د ابادۍ په شمول، له بېلابېلو لارو چارو د بې وزلۍ له حالته وتلي او ژوند يې شتمن او ښه شوی دی چې د هر کس په مخ او شونډو موسکا ليدل کېږي.
ځوان اکرام ابليميت له خپل پلار، مور او دوو خويندو سره يو ځای د شينجيانګ د کورلا ښار د اوات علاقهدارۍ د اوشاکتراک په کلي کې ژوند کوي. د اکرام ابليميت کورنۍ د دوو هکټارو په پراخوالي فارم کې د کورلا ځانګړي ناک کرلي. تېر کال د ناکو د پلورلو او د سيلانيزو چارو د پرمختګ په رڼا کې د دوی د کورنۍ کلنۍ ګټه دوو لکو يوانو يانې دوو ميليونو افغانيو ته رسېدلې ده.
د معلوماتو له مخې، په اوات علاقهدارۍ کې د ناکو د کرلو مساحت کابو ۵۷۰۰ هکټارو ته او د ناکو کلنۍ توليدي اندازه ۱۰۵ زرو ټنو ته رسېدلې ده. په ۲۰۱۹ ز کال کې په دغه علاقهدارۍ کې د ناکو ارزښت ۳۳۰ ميليونو يوانو يانې ۳ ميلياردو او ۳۰۰ ميليونو افغانيو ته رسېدلی دی.
د خيرالله حسن کورنۍ چې ۵ غړي لري، په ۲۰۱۸ ز کال کې له اژملي کلي څخه د اتوش ښار د اغو علاقهدارۍ د نيکمرغه کور په نوم استوګنځای کې کور ته انتقال شوي. پخوا د دوی کورنۍ صفر اعشاريه دوه هکټاره کرونده درلوده. څرنګه چې د اقليم او خاورو شرايط سخت او مناسب نه وو، نو حاصلات او ګټې يې لږ وې، چې هر کال يوازې څو زره يوانه وو. نوي کور ته له انتقال وروسته ځايي حکومت د دوی د ژوند د ښه والي لپاره په وړيا توګه دوی ته دوې تودې خونې ورکړې او د کرنيزو چارو په اړه يې لارښوونې او معلومات هم ور زده کړي دي. اوس د خيرالله حسن کورنۍ په دوو تودو خونو کې د سرو بانجانو او مرچکو په روزلو سره هر کال څه باندې ۴۰ زره يوانه يانې ۴ لکه افغانۍ ګټه تر لاسه کولی شي. پر دې سربېره، هغه په فارغ وخت کې د نجارۍ کار له لارې څه باندې ۳۰ زره يوان يانې ۳ لکه افغانۍ هم ګټلی شي. ژوند يې له بې وزلۍ څخه وتلی او ورځ په ورځ ښه شوی دی.
د اغو علاقهدارۍ د نيکمرغه کور په نوم د استوګنې په سيمه کې د خيرالله حسن د کورنۍ په شان ۱۰۷ کورنۍ اوسېږي. ځايي حکومت د دوی لپاره ۳۴۵ تودې خونې جوړې کړې او ځايي بزګرانو ته يې د سبزيو او ميوو د کرلو طريقې هم ښوولې دي.
د کاشغر سيمې د کومکسار په علاقهدارۍ کې کابو ۳۰۰ بزګران د انځورګرۍ په برخه کې لوی مهارت لري. دوی هر کال څه باندې ۵۰۰۰ انځورونه جوړولی شي. ځايي بزګرانو له ۱۹مې پيړۍ څخه د انځورګرۍ هنر ته مخه کړې او د تيرې پيړۍ له منځنۍ دورې څخه دغه چارې ګام په ګام غوړېدلې دي. په تېرو څو کلونو کې ځايي حکومت د بزګرانو د انځورونو پر اساس سيلاني چارې نورې پياوړې کړې، لا زيات سيلانيان د دې سيمې سيل کوي او په دې اساس ځايي بزګران ښه عايدات تر لاسه کولی شي او ژوند يې ورځ په ورځ ښه شوی دی.
د شمېرنې له مخې، له ۲۰۱۴ ز کال څخه تر ۲۰۱۹ ز کال پورې په شينجيانګ کې د کورنيو توليداتو عمومي اندازې د منځني کلني زياتوالي انډول په سلو کې اووه اعشاريه دوه و، چې دغه انډول د چين له منځني انډول څخه لوړ و. په شینجيانګ کې د بې وزلۍ د رامنځ ته کېدو انډول له نولس اعشاريه څلور سلنې څخه يو اعشاريه څلورويشت سلنې ته ټيټ شوی دی. د اټکل له مخې به د ۲۰۲۰ ز کال تر پايه پورې په شينجيانګ کې ټول اوسيدونکي له بې وزلۍ څخه ووځي. دغه راز په تېرو شپږو کلونو کې د چين د ماليې مرکزي څانګې د شينجيانګ د پرمختګ لپاره څه باندې ۲۰۰۰ ميليارده يوانه پانګونه کړې ده.
د سږ کال د اکټوبر لومړۍ نېټه به د شینجيانګ د اويغور کورواکې سيمې د جوړېدو له ۶۵مې کاليزې سره برابره وي. په تېرو ۶۵ کلونو کې شينجيانګ د ټولنې، اقتصاد او ښوونې په شمول، په بېلابېلو ساحو کې د ليدو وړ برياليتوبونه تر لاسه کړي دي. ما له شينجيانګ څخه د خپلې ليدنې په ترڅ کې احساس کړې، چې د شينجيانګ د بېلابېلو قومونو خلک له ټولو چينايانو سره يو ځای د خپلو کوښښونو له لارې د ټولنې ثبات، د اقتصاد سمسورتيا او د ژوند ښه والی تجربه کړی دی. د هر کس په څېره کې او د هغوی په مخونو باندې لا د روښانه راتلونکې خوږه موسکا له ورايه ليدل کېږي. دا د شينجيانګ د پرمختګ ډېرې ښې نښې نښانې او شواهد دي.
