فجرستان د لوړو زده کړو موسسه چې په تخار ولایت کې موقعیت لري، په ۱۳۹۱ کال یې په دغه ولایت کې پر فعالت پیل کړی دی. د فجرستان د لوړو زده کو موسسې د علمي معاون ښاغلي سمیع رحماني په وینا، دوی په لومړیو کې دوه پوهنځي حقوق او سیاسي علوم او اقتصاد درلودل، خو څه موده وروسته یې له لوړو زده کړو وزارت څخه د انجنیرۍ پوهنځي جواز هم تر لاسه کړ، چې اوسمهال د دریو پوهنځیو په چوکاټ کې خپلې درسي چارې پر مخ وړي. د ښاغلي رحماني په وینا، دوی په حقوقو او سیاسي علومو پوهنځي کې د قضا او څارنوالۍ او ادارې او ډيپلوماسۍ ډېپارټمنټونه، په اقتصاد پوهنځي کې د ادارې او تجارت ډېپارټمنټ او په انجنیرۍ پوهنځي کې د سېول ډېپارټمنټ لري.
د ښاغلي سمیع رحماني په خبره، دوی د فجرستان د لوړو زده کړو موسسه کې ټول شاوخوا ۱۵۰۰ محصلین لري، چې له دې ډلې یې له ۳۰ تر ۴۰ سلنې پورې ښځینه محصلینې او پاتې نور یې نارینه محصلین تشکیلوي.
ښاغلي رحماني همدا راز وویل، دوی له پیله تر دې دمه په دریو دورو کې محصلین فارغ او ټولنې ته یې د خدمت په موخه وړاندې کړي دي، چې له دې ډلې ډېری فارغ محصلین یې په دولتي یا خصوصي ادارو کې پر دندو بوخت دي.
د فجرستان د لوړو زده کړو موسسې علمي معاون ښاغلي سمیع رحماني زیاته کړه، دا چې د هېواد او هېوادوالو وضعیت او حالت ورځ تر بلې د بدلون په حال کې دی، نو د دوی د نوو جذب کېدونکو محصلینو شمېر هم هر کال توپیر کوي، داسې چې هر کال په اوسط ډول له ۲۰۰ تر ۳۰۰ پورې نوي محصلین جذبوي او د لوړو زده کړو اسانتیاوې ورته برابروي.
ښاغلي رحماني وویل، دوی خپلو محصلینو ته په مختلفو کټهګوریو کې تخفیف وړاندې کوي، داسې چې خپلو هغو محصلینو ته چې د نظامي برخې کارکوونکي دي، په خپل سمیستروار فیس کې له ۴۰ تر ۵۰ سلنې تخفیف ورکوي. د نوموړي په وینا، د ډېرو نورو هغو ادارو کارکوونکو ته چې فجرستان د لوړو زده کړو موسسې تفاهم لیکونه ورسره لاسلیک کړي دي او همدا راز د ټولنې د مختلفو قشرونو او کمزوري اقتصادي او مالي وضعیت لرونکو محصلینو ته د لوړو زده کړو وزارت قوانینو او د موسسې مالي امکاناتو ته په کتو په مختلفه کچه تخفیف وړاندې کوي.
ښاغلي سمیع رحماني په خپلو خبرو کې وویل، دوی د ورځې په دریو درسي ټایمونو کې تدریسي چارې پر مخ وړي، چې یوه یې سهارنۍ دوره ده چې د سهار له شپږ نیمو پیل تر نهه بجو دوام کوي. دویمه دوره یې له نهو بجو پیل او د غرمې تر دوولسو بجو دوام کوي او درېیمه هغه یې هم ماښامنۍ دوره ده چې د ماسپښین له دریو بجو پیل او د ماښام تر شپږو بجو دوام کوي.
د فجرستان د لوړو زده کړو موسسې یاد مسوول زیاته کړه، دوی په موسسه کې د خپلو محصلینو لپاره مجهز کتابتون لري چې ډېری د تخصصي او د تحصیلي رشتو اړوند کتابونه پکې دي. د نوموړي په وینا، پر فزیکي کتابتون سربېره دوی الکترونیکي کتابتون هم لري، چې ډېر کتابونه پکې ځای پرځای شوي دي او محصلین کولای شي وخت ناوخت مراجعه ورته وکړي، مطالعه پکې وکړي او خپل د اړتیا وړ مالومات ترې تر لاسه کړي.
ښاغلي سمیع رحماني همدا راز وویل، دوی په هېواد کې دننه او له هېواده د باندې له ځینو خصوصي او دولتي پوهنتونونو سره نېکې علمي او اکاډمیکې اړیکې لري. له هغې ډلې په تخار ولایت کې له څلورو خصوصي پوهنتونونو او همدارنګه د تخار ولایت له دولتي پوهنتون سره د متقابلو علمي اړیکو یادونه کولی شي، چې پر بنسټ یې یو له بل سره علمي تجربې او لاسته راوړنې شریکوي او له هغوی سره د شوو تفاهم لیکونو پر اساس ډېر علمي سمینارونه او ورکشاپونه دایروي او همدارنګه له هېواده د باندې د ایران هېواد له خوارزمي پوهنتون سره د متقابلو اړیکو تفاهم لیک لري، چې پر اساس یې خپل محصلین د لوړو زده کړو او ظرفیت د ارتقاع په موخه هلته استوي او هغوی ورته د لوړو زده کړو اسانتیاوې برابروي.
ښاغلي رحماني زیاته کړه، دا چې خصوصي پوهنتونونو او د لوړو زده کړو موسسو ته د ډيپلومونو د ورکړې په برخه کې یو څه ځنډ موجود دی، نو دوی هم تر دې دمه خپلو فارغو محصلینو ته په لوړو زده کړو وزارت کې ثبت او راجستر شوي سرټېفیکټونه او ترانسکرېپټونه ورکړي دي څو یې له حقوقو او امتیازاتو ګټه واخلي.
د نوموړي په وینا، دوی د خپلو محصلینو د علمي سویې د لا بډاینې په موخه پر یادو شوو اسانتیاوو او خدمتونو سربېره ډېر علمي سمینارونه، ورکشاپونه او د عملي زده کړو پروګرامونه دایروي. د دې تر څنګ یې ډېر ټينګار پر څېړنیز مرکز هم کړی دی، چې په چوکاټ کې به یې محصلین د نظري زده کړو تر څنګ عملي زده کړې، کار او بازار ته لاسرسی ولري او د هغوی د درسي او کاري مهارتونو په برخه کې به لا ډېره وده او پرمختګ وکړي.
د فجرستان د لوړو زده کړو موسسې علمي معاون ښاغلي سمیع رحماني همدا راز وویل، دوی د موسسې د لا بډاینې او پرمختګ لپاره خپل پنځه کلن ستراتېژیک پلان لري، چې په ۱۳۹۹ کال کې چمتو شوی او تر ۱۴۰۳ لمریز کال پورې به دوام وکړي. د نوموړي په وینا، د یاد پلان مهم ټکي یې د موسسې لپاره د خصوصي ودانۍ رغول او همدا راز ډېرې هغه کړنې چې د موسسې، محصلینو او په ټوله کې د ټولنې د پرمختګ او لاسته راوړنو لامل کېږي، یادونه کولی شي.
ښاغلي رحماني زیاته کړه چې دوی له دولت او په ځانګړې توګه له لوړو زده کړو وزارت څخه غواړي څو د لوړو زده کړو د خصوصي موسسو په برخه کې لا ډېره پاملرنه وکړي. د نوموړي په وینا، د لوړو زده کړو د خصوصي موسساتو لویې ستونزې د وضع شوو قوانینو، مقرراتو او اصولو په برخه کې دي چې ډېر کله یادو موسساتو ته سخت قوانین او مقررات وضع کېږي، تر ډېره پورې ورته پوره پاملرنه نه کېږي او هغه اداري چارې چې باید پر وخت تر سره شي لکه د اسنادو وېش، د پوهنځیو د زیاتولو جواز او داسې نور، له خنډ او ځنډ سره مخ کېږي چې پر بنسټ یې یادې موسسې له ستونزو سره مخ وي او نه شي کولای چې خپلو چارو ته پر وخت رسیدګي وکړي.
