هغه کارونه چې تر دېرش کلنۍ مخکې یې باید تر سره کړئ

د ځوانۍ دوران د سترګو په رپ کې تېرېږي. دا هغه طلایي وخت دی چې د راتلونکي ژوند لپاره مو د لویو بریالیتوبونو د بنسټ ډبره ږدي. خو که بوډا یاست او عمر مو خوړلی دی، ښايي نه پوهېدی چې د ځوانۍ له عمر څخه څه ډول ګټه واخلی او که د ځوانۍ په دوران کي یاست، نه به پوهېږی چې څه ډول خپل دغه طلایي وخت وکاروی. که د انسان له ژوند څخه په ټوله کې یو تحلیل ولرو، کولای شو تر ټولو ډېرې انرژۍ لرونکی دوران د ځوانۍ وخت او له تر ټولو ډېرې تجربې او پوهې ډک دوران د بوډاتوب وخت وبولو. خو د بوډاتوب پر مهال که څه هم عقل، تجربه او پوهه خپل وروستي حد ته رسېدلي وي، خو د فزیکي کړنو د تر سره کولو لپاره کافي اندازه انرژي نه وي. همدارنګه برعکس، ډېره کله د ځوانۍ پر مهال خپله ټوله انرژي د هغه کارونو په تر سره کولو لګوو، چې زموږ د راتلونکي لپاره هېڅ موخه او ګټه له ځان سره نه لري.

ښايي تاسو له دې مخکې همدا ډول وی، موږ  په دې مقاله کې درته هغه نهه کارونه په ګوته کړي، چې له دېرش کلنۍ مخکې یې باید تر سره کړئ:

۱- په یوه لوی ښار کې ژوند کول

په یوه لوی ښار کې ژوند کول، ستاسو د فکر کولو پر طرز او ډول باندې د پام وړ اغېزه کوي. ځکه، په یوه لوی ښار کې تاسو د مختلفو ځایونو له مختلفو خلکو سره اشنا کېږی، هغه خلک چې د ژوند کولو مختلفې طریقې، رواجونه او دودونه لري. په حقیقت کې کله چې تاسو په یوه لوی ښار کې ژوند کوی، له یوې حیرانوونکې پېښې سره مخ کېږی او هغه دا ده، چې پر دې پوهېږی چې داسې خلک هم شته چې ستاسو د ژوند کولو د طریقې خلاف، په بله طریقه او بل ډول ژوند کوي، خو د ژوند د طریقې په بدلون سره یې هېڅ هم له لاسه نه دي ورکړي. دا هر څه؛ یانې د لویو بدلونونو د رامنځته کېدو شونتیا.

۲- فزیکي فعالیتونه باید ولرئ

څو چې ځوان یاست او د بدن د انرژۍ او توان سطحه مو لوړه ده، هڅه وکړئ چې پر ورزشي فعالیتونو باندې ځان بوخت کړئ. له ورزشي فعالیت څخه مو موخه یوه رسمي یا غیر رسمي مبارزه نه ده؛ مهمه نه ده چې اصلاً دې سیالي یا مبارزه وي که نه، کولای شی له ځان سره پرېکړه وکړئ چې د دوو ښارونو تر منځ واټن په پلي تګ سره را لنډ کړی، له دې کار څخه مو موخه ستاسو فزیکي وړتیا تر وروستي حد پورې رسېدل او له یادې وړتیا څخه یو ګام مخکې تلل دي.

دغه ستونزې به په راتلونکي کې ستاسو د شخصي کار او ژوند د غوره خاطرو تر څنګ، تاسو ته لوړ پر ځان باور در په برخه کړي.

۳- هڅه وکړئ چې ژور ذهني تمرین یا ورزش وکړئ

د زړه او ذهن د ارامولو او د سټرس له منځه وړلو لپاره تر ټولو غوره، چټکه او ډاډمنه لار ذهني تمرین یا ورزش (meditation) دی. تاسو کولای شی د (meditation) یا ذهني تمرین په وسیله نه یوازې دا چې له خپل ژوند څخه د سټرس په نوم د بریالیتوب خنډ په حیرانوونکې بڼه له منځه یوسی، بلکې دغه چاره د دې لامل کېږي څو ستاسو تمرکز په پام وړ توګه زیاتوالی ومومي.

۴- په انټرنېټ سره د کار زده کړه

نن سبا له انټرنېټ څخه خلاصون او ځان غړول ناشوني دي. که وغواړی یا ونه غواړی، په نږدې راتلونکي کې به د ژوند هر څه د انټرنېټ پر بنسټ وي او ټولې کړنې به په انټرنېټي بڼه تر سره کېږي. د ځوانۍ دوران، په انټرنېټ سره د کار زده کړې لپاره تر ټولو غوره موکه ده. نن ورځ ډېری مسلکی وګړي خپلې کاري ژمنې او لاسته راوړنې د انټرنېټ او کمپیوټري سافټوېرونو په مرسته ثبتوي او د خپل کار جزیات تحلیلوي. نو که مو تر ننه پورې د انټرنېټ په وسیله د کار زده کړه له پامه غورځولې وي، له همدې نن څخه پیل وکړئ څو یې په ښه توګه زده کړئ.

۵- مینه وکړئ

د ځوانۍ د دوران یوه په زړه پورې تجربه، مَینېدل دي. مینه هغه په زړه پورې او جالب احساس دی چې له تاسو پرته یې هېڅوک ستاسو په وجود کې نه شي رامنځته کولای او که چېرې مو دغه احساس تجربه کړ، هېڅکله به حاضر نه شی چې ځای یې بل احساس ته پرېږدی. ښايي په خپله مینه کې ماتې وخوری، ښايي پر سم کس باندې مَین نه شی، ښايي د خپل ژوند لومړنۍ او وروستۍ مینه هم پیدا کړی؛ خو دا هرڅه دومره مهم نه دي! بلکې تر ټولو مهم څه د ځوانۍ په دوران کې د مینې د احساس تجربه کول دي.

۶- ماتې تجربه کړئ

له دېرش کلنۍ مخکې د ژوند تر ټولو لوی او مهم درس دا دی چې زده کړئ څو څه ډول ماتې وخوری او تجربه یې کړی، څه ډول له خپلې ماتې درس واخلی، څه ډول یو ځل بیا پر خپلو پښو ودرېږی او خپلو هڅو ته یو ځل بیا دوام ورکړی. تاسو په ماتې خوړلو سره زده کوی چې یو ځل بیا باید په لا ډېر توان او وړتیا سره د بریا د تر لاسه کولو لپاره هڅه وکړئ؛ دا هر څه یانې بریالیتوب.

۷- یوازې سفر وکړئ

خپل بار او بستره ټوله کړئ او که مو تر اوسه کوم ځای ته په یوازې ځان سفر نه وي کړی، یو ځای وټاکئ او په یوازې توګه هلته سفر وکړئ. ډاډه اوسئ چې دغه په زړه پورې تجربه به په راتلونکي کې ستاسو د پرمختګ او ودې لپاره یوه د ارزښت وړ وسیله وي؛ په دې سره به د ستونزو او لوړو ژورو پر مهال وکولای شی خپل ذهن له منفي فکرونو پاک کړی، یو ځل بیا تصمیم ونیسئ، د خپل راتلونکي مسیر پیدا کړئ او یو ځل بیا یې پر لور ګام واخلئ.

۸- یو کسب او کار پیل کړئ

دغه چاره زموږ او ستاسو د دغه لېست تر ټولو مهمه برخه ده. هرو مرو له دېرش کلنۍ مخکې د ځان لپاره یو کاروبار جوړ کړئ، پوره هڅه وکړئ، بریالي شئ او وروسته ماتې وخورئ! ځکه، څېړنو ښودلې ده هغه لومړنی او دویم کسب و کار چې ښایي د ځوانۍ په دوران کې یې پیل کړی، له ماتې سره مخ کېږي؛ خو ماتې مهمه نه  ده، بلکې مهمه هغه تجربه ده چې د دغې ماتې خوړلو پر مهال یې لاسته راوړی. مهم د لېوالتیا هغه حس دی چې د خپلو تولیداتو، خدمتونو او کسب و کار پر وړاندې یې لری او تر هر څه مهم، د پېرودونکي زړه لاسته راوړل او د خرڅلاو د مهارتونو زده کول دي.

۹- وېب لاګ یا وېب سایټ جوړ کړئ

مهمه نه ده چې د یاد کار لپاره څه ډول موضوع ټاکی، باید یو شخصي وېب لاګ یا وېب سایټ ولرئ. په هغه کې د خپل ژوند تجربې او لارښوونې له کتونکو او لوستونکو سره شریکې کړئ. کولای شی خپلې خاطرې پکې ولیکئ، ان کولای شی هغه کتابونه پکې یاداښت کړئ چې تر دې دمه مو لوستي دي. د یوه وېب لاګ یا وېب سایټ په درلودلو سره تاسو زده کوی چې یوه رسنۍ یاست. رسنۍ اوسېدل یانې مخاطب ته د یوه ارزښتمن پیغام لېږدول.

دېرش کلني د ځینو کسانو لپاره یو حیرانوونکی عمر دی چې ډېر کله ترې د وېرې احساس کوي؛ خو په حقیقت کې ډېر هم ځانګړی او وېروونکی عمر نه دی. زما په نظر د عاقل کېدو لړۍ پیل همدغه عمر دی. که د سن یا عمر موضوع یوې خوا ته پرېږدو، ستاسو په نظر؛ په ژوند کې مو باید کوم داسې کار تر سره کړی وای چې تر اوسه یې پر تر سره کولو نه یاست بریالي شوي؟ ایا داسې کوم کار و چې د نه تر سره کولو له امله یې پښېمانه شوي وی؟ په ځواب مو فکر وکړئ او د داسې کړنو لپاره لاس پکار شئ، چې د راتلونکي عمر لپاره مو د ارامۍ، سوکالۍ او بریالیتوب بنسټ کېږدی، نه د خواشینۍ او پښېمانۍ.