له نن څخه نږدې اوولس کاله مخکې، کله چې له ښوونځیو څخه د فارغېدونکو زده کوونکو شمېره لوړه شوه، نو لوړو زده کړو وزارت نه شوی کولای چې د دوولسمو ټولګیو ټول فارغین دې د لوړو زده کړو او یا هم نیمه لوړو زده کړو لپاره په دولتي پوهنتونونو او یا موسسو کې جذب کړي. نو په دې برخه کې خصوصي سکټور ته هم د فعالیت اجازه ورکړل شوه، څو د لوړو زده کړو وزارت له معیارونو سره سم خدامات پیل کړي او په خصوصي پوهنتونونو او موسسو کې محصلین لوړې زده کړې وکړای شي. دغه هڅه ان له ۲۰۰۳ ز کال را په دېخوا کېدله، خو په ۲۰۰۶ ز کال کې یې په عملي ډول د لوړو زده کړو موسسو ته اجازه ورکړه، څو په دې برخه کې پانګونه وکړي او محصلین جذب کړي. له دې ډلې یوه هم شفاء د لوړو زده کړو موسسه ده. شفاء د لوړو زده کړو موسسې خپلې رسمي چارې د ۱۳۹۳ لمریز کال د کب میاشتې په ۲۰مه پیل کړې دي. دغه موسسه اوسمهال څلور پوهنځي(معالجوي طب، ستوماتولوژي، عالي فارمسي او حقوقو او سیاسي علوم) لري. دغه راز شفاء د لوړو زده کړو موسسې د خپلو محصلینو د لا ښه چوپړ او عملي زده کړو په موخه روغتون، درملتون، کتابتون، کمپیوټر لب او نور هغه امکانات برابر کړي، چې د محصلینو د پرمختګ او تجربو د زیاتوالي لامل کېږي.
لکه څنګه مو چې مخکې وویل، شفاء د لوړو زده کړو موسسې خپلې رسمي چارې د افغانستان د اساسي قانون د ۴۶ مادې له حکم سره سم، د لوړو زده کړو وزارت په منظورۍ، په ۱۳۹۳ لمریز کال کې پیل کړې. دې موسسې هغه وخت دوه پوهنځي، حقوق او سیاسي علوم او ستوماتولوژي درلودل. په ۱۳۹۵ لمریز کال کې د دې موسسې په چوکاټ کې د فارمسي پوهنځي هم پر فعالیت پیل وکړ. شفاء د لوړو زده کړو موسسې علمي مرستیال عبدالباري خپلواک وایي، دوی وکړای شوی چې سږ کال (۱۳۹۷) کې د طب پوهنځي منظوري هم واخلي، چې اوس عملاً په دې پوهنځي کې هم محصلین زده کړې کوي. اوسمهال دغه موسسه څلور پوهنځي (معالجوي طب، ستوماتولوژي، عالي فارمسي او حقوق او سیاسي علوم) لري، چې هر پوهنځی بیا په خپل چوکاټ کې بېلابېل ډېپارټمنټونه لري.
د ښاغلي خپلواک په خبره، شفاء د لوړو زده کړو موسسه د څلورو زرو په شاوخوا کې محصلین لري، چې له دې ډلې یې ۱۸ سلنه ښځینه او پاتې نور یې نارینه محصلین دي. شفاء د لوړو زده کړو په موسسه کې د تدریس چارې د لږ تر لږه ۱۲۸ استادانو لخوا پر مخ وړل کېږي، چې په دې ډله کې ښځینه استادانې هم شته. شفاء د لوړو زده کړو موسسې علمي مرستیال وایي، ۹۵ سلنه استادان یې د دوکتورا او ماسټرۍ او پاتې پنځه سلنه یې بیا د لېسانس تر کچې پورې لوړې زده کړې لري. ښاغلی خپلواک وایي، ځینې استادان یې اوسمهال په بهر کې د ماسټرۍ پر اخیستو بوخت دي، چې د ماسټرۍ پروګرام تر بشپړولو وروسته به بېرته خپلې دندې ته راګرځي. د خپلواک په خبره، موخه یې دا ده چې تر ۲۰۲۰ ز کال پورې یې باید ټول استادان لږ تر لږه د ماسټرۍ تر کچې پورې لوړې زده کړې ولري.
شفاء د لوړو زده کړو موسسه د خپلو محصلینو او استادانو لپاره مجهز کتابتون لري، چې په زرګونه ټوکه سافټ او هارډ کتابونه پکې شته. د دې موسسې محصلین کولی شي، وخت ناوخت له دغه کتابتون څخه ګټه واخلي، خپله مطالعه او څېړنه پکې وکړي. دغه راز شفاء د لوړو زده کړو موسسه چې تر ډېره پکې په داسې پوهنځیو کې تدریس کېږي، چې عملي کار ته اړتیا لري، نو د خپلو محصلینو لپاره یې، د ۲۴ ساعته روغتون، درملتون او څلورو لابراتوارونو امکانات هم برابر کړي، څو یې محصلین هر څه په عملي ډول وګوري او زده یې کړي.
شفاء د لوړو زده کړو موسسه د ورځې په دریو ټایمونو کې محصلین د زده کړو لپاره ورغواړي، د سهار له اتو د غرمې تر دوولسو، د ماسپښین له یوې تر څلورو او درېیم هم د شپې لخوا. ډېری کسان په دې اند دي، چې له خصوصي پوهنتونونو او د لوړو زده کړو له موسسو څخه فارغېدونکو کسانو لپاره په ډېرې سختۍ دنده پیدا کېږي او لامل یې هم په خصوصي پوهنتونونو کې د زده کړو ټیټ کیفیت بولي، خو د شفاء د لوړو زده کړو موسسې علمي مرستیال وایي، دا چې دوی د خپلو محصلینو لپاره د نظري زده کړو ترڅنګ، د عملي هغو امکانات هم برابر کړي، نو محصلین یې تر فراغت وروسته ډېر ژر په دولتي او خصوصي ادارو کې چېرته چې ورته اړتیا لیدل کېږي، په دنده ګومارل کېږي. ښاغلی خپلواک وایي، دوی له ډېرو بنسټونو سره په دې برخه کې هوکړه لیکونه لري، چې له فراغت وروسته ورته خپل محصلین ور معرفي کوي. د عبدالباري خپلواک په خبره، دوی د موسسې لپاره پنځه کلن پلان لري، چې له مخې به یې د درملو جوړولو فابریکه، حلقوي درملتونونه او کلینیکونه ولري او لږ تر لږه ۲۰۰۰ فارغ شوي محصلین به یې په دنده په کې وګومارل شي. ښاغلی خپلواک وایي، سږ کال یې له حقوقو او سیاسي علومو پوهنځي څخه خپله لومړۍ دوره محصلین فارغ کړي، چې له نیکه مرغه ډېری اوس عملاً په بېلابېلو ادارو کې پر دندو ګومارل شوي دي.
ډېری هغه کسان چې له خصوصي پوهنتونونو او یا هم د لوړو زده کړو له موسسې فارغېږي، یوه اندېښنه ور سره د خپلو تحصیلي اسنادونو د تر لاسه کولو وي. شفاء د لوړو زده کړو موسسې علمي مرستیال وایي، دوی د لوړو زده کړو وزارت له قوانینو سره سم فعالیت کوي او د محصلینو د تحصیلي اسنادو هغه برخه چې په پوهنتون پورې اړه لري، دوی یې په اړه پر وخت اقدام کوي او ټول اړین توکي ورته برابروي، څو محصل وکړای شي له خپلو اسنادو څخه د دندې پیدا کولو او نورو برخو کې ګټه واخلي. خو هغه کارونه چې پر لوړو زده کړو وزارت پورې اړه لري، لږ ځنډېږي. ښاغلی خپلواک وایي، له نیکه مرغه اوس تازه د لوړو زده کړو وزارت د خصوصي پوهنتونونو لپاره هم ځانګړی ډېټابېس جوړ کړی، چې له مخې به یې له خصوصي پوهنتونونو او موسسو فارغېدونکو کسانو ته ډېر ژر خپل تحصیلي اسناد رسېږي، چې د دولتي پوهنتونونو له اسنادو سره به یې ارزښت یو شان وي.
دغه موسسه له خصوصي او دولتي پوهنتونونو سره علمي اړیکې لري، چې له مخې یې د تجربو تبادله هم کوي. ښاغلی خپلواک وایي، په ټوله کې په کور دننه له پوهنتونونو سره ښې او نیکې اړیکې لري او له دې سره په څنګ کې د خصوصي پوهنتونونو او د لوړو زده کړو د موسسو د اتحادیې غړیتوب هم لري.
د شفاء د لوړو زده کړو موسسې علمي مرستیال وایي، موسسه یې یوازینۍ هغه ده چې خپلو محصلینو ته په ټیټه بیه، خو لوړ کیفیت زده کړې ورکوي. د ښاغلي خپلواک په خبره، دوی د ممتازو محصلینو لپاره، ۵۰ او ۲۵ سلنه تخفیف ورکوي. دی وایي، د همدې برخې لپاره یوه ځانګړې کمېټه لري، چې د سمیسټر په سر کې د شهیدانو وارثینو او هغو کسانو ته چې کورنی اقتصاد یې کمزوری وي، ځانګړی تخفیف په پام کې نیسي. د ده په خبره، په محصلینو کې یې داسې کسان هم شته، چې د وړیا زده کړو زمینه یې هم ورته برابره کړې ده.
شفاء د لوړو زده کړو موسسې اداره په پام کې لري، چې په راتلونکو کلونو کې لومړی له موسسې څخه پوهنتون ته ارتقا وکړي، د ماسټرۍ پروګرام پیل کړي او په څنګ کې ورسره د اقتصاد او ښوونې او روزنې پوهنځي هم جوړ کړي. ښاغلی خپلواک وایي، په ټوله کې له لوړو زده کړو وزارت څخه راضي دي، خو کله کله یې هغه کارونه چې په لوړو زده کړو وزارت پورې اړوندېږي، ځنډ پکې راځي چې دغه کار د دوی د پرمختګ په مخ کې خنډ ګرځي. نوموړی له لوړو زده کړو وزارت څخه غواړي، هغه خصوصي پوهنتونونه یا د لوړو زده کړو موسسې چې د کار کیفیت یې ښه نه دی، یا یې باید مخ ونیول شي او یا هم پرې کنټرول زیات شي، څو د خصوصي سکټور لپاره پر مخ تور خال نه وي.
