د ننګرهار ولایت په امنه ولسوالۍ “کامه” کې د ولسي جرګې د کاندید ډاکتر ناصر موند په کمپایني غونډه کې ځانمرګی برید شوی چې پکې ۲۱ کسان وژل شوي او ګڼ نور ټپیان دي. تر دې وړاندې په کونړ کې هم د کاندیدانو پر پلویانو بریدونه شوي وو چې پکې څو کسانو ته مرګ ژوبله اوښتې وه. په ځینو نورو سیمو کې هم څو کاندیدان او د هغوی پلویان وژل شوي دي.
د را روانو ټاکنو پر وړاندې تر ګردو لویه ستونزه نا امني ده. وسله والو طالبانو له وړاندې له ټاکنو سره مخالفت کړی، له خلکو یې غوښتي چې پکې ګډون ونه کړي او دغه راز د بریدونو ګواښ یې کړی دی. له دې سره په نیم افغانستان کې ټاکنې ناشوني کېږي. په پاتې نیم افغانستان کې هم د نا امنۍ، وسله والو بریدونو، ځانمرګو او نورو ناامنیو وېره شته. یوازې وسله وال طالبان نه دي، بلکې داعش هم دې پروسې ته ګواښ دی. داعشي وسله وال چې چېرته را ټول شوي خلک وویني او د ډېرو وینو د تویېدلو موقع پیدا کړي، نو برید کوي او خپل وحشت خوروي.
د ناامنۍ دا وېره یوازې د خبرو په حد کې نه ده، بلکې عملي یې موږ وینو. د نوملیکنې پر مهال ګڼو بریدونه وشول، زموږ سلګونه هېوادوال پکې ووژل شول او سلګونه نور ټپیان شول. دا دی د ټاکنیز کمپاین پر مهال هم د څو خونړیو پېښو رپوټونه ورکړل شوي دي. لا د کمپاین ۱۷ ورځې پاتې دي، نو دا وېره جدي ده چې دا ډول پېښې به تکرار شي. ناامنۍ پر ټاکنیز کمپاین سیوری غوړولی دی. کاندیدان له وېرې لویې غونډې نه جوړي، په ځانګړي ډول په هغو سیمو کې چې د بریدونو وېره وي. کله چې د ټاکنیزو کمپاینونو او نوملیکنې پر وخت داسې ګواښونه وي، نو د ټاکنو پر ورځ به دا ګواښ زیات وي او په ډېرو سیمو کې به خلک په سختۍ حاضر شي چې رایه ورکړي.
حکومت د کاندیدانو، د هغوی د پلویانو او دغه راز د رایه ورکوونکو د امنیت د خوندي کولو ژمنې کوي. د کمېسیون چارواکي هم وايي چې امنیتي ادارو ورسره ژمنه کړې چې امنیت به ټینګوي، خو داسې ښکاري چې د ناامنۍ ګواښونه په لوړه کچه دي. د ننګرهار کامه ولسوالي تر کابل امنه سیمه ګڼل کېږي. هلته نه وسله وال طالبان شته او نه هم داعشیان. په کامه کې د ناامنۍ پېښې یا نشته او یا هم بېخي کمې دي چې په هېڅ ډول له نورو سیمو کې سره نه مقایسه کېږي. اوس چې کله په امنه کامه کې داسې پېښې کېږي، نو د ناامنه خوږیاڼو او یا نورو ولسوالیو به څه حال وي؟ له دې ښکاري چې د ټاکنو پر وړاندې د ناامنۍ ګواښ جدي دی.
حکومت او امنیتي ادارې دې د خبرو پر ځای عملي ګامونه واخلي. که د ټاکنو د امنیت په تړاو ګواښونه جدي وي او دوی یې په ځینو سیمو کې د مخنیوي توان نه لري، نو نورې لارې شته. دوی باید کاندیدانو ته له وړاندې د لویو غونډو د نه کولو ووايي او له کمېسیون سره په ګډه دې ځینې نور ګامونه هم واخلي. که دوی د امنیت ژمنه کوي، خو هلته بریدونه او چاودنې روانې وي، نو دا به ټاکنې لا خونړۍ کړي او ټوله پروسه به له جدي خنډونو سره مخ شي.
