د کاري فشار په اړه مو څه اورېدلي دي؟ د ۲۰۱۹ زیږدیز کال د مې میاشتې په ۲۵مه، د روغتیا نړیوال سازمان، (کاري فشار) خلکو ته (د کاري فشار له اغېزې د انرژۍ مصرفېدو) په نوم د پېژندنې هڅه وکړه. کاري فشار هر وخت کېدای شي د انرژۍ د له منځ تګ یا مصرف باعث شي، چې بیا همدا مصرف او له منځه تګ یې خپله د خسته ګۍ او منفي ګرايۍ په بڼه ځان راڅرګندوي. په داسې وخت کې سفر کول هغه غوښتنه ده یا د دغه خسته ګۍ د رفعه کولو یو لاره ده چې د هرچا ذهن کې راتاوېږي. خو اوس ستونزه دا ده چې ډېر وخت سفر کول یا له کاري چاپېریال څخه لرېوالی هم د ذهني سټریس د پاک له منځه تګ لامل نه کېږي. نو څنګه کولای شو چې خپله رخصتي له ذهني او کاري فشار پرته په خوشالۍ سره تېره کړو؟
د امریکا د ارواپوهانو ټولنې APA په ۲۰۱۸ زیږدیز کال کې په دې اړه ځینې څېړنې وکړې. د هغو څېړنو پایلو وښوده چې ۲۱ سلنه امریکایان د رخصتۍ په ورځو کې تر کاري فشار لاندې وي او ۲۸ سله هغه یې بیا حتی له کاري چاپېریال پرته هم پر کار لګیا وي. همدې ټکو یا د څېړنو پایلو د دوی توجه جلب کړه.
په رخصتۍ کې کار کول، د هغه کس پر اړیکو او له خلکو سره پر ناسته پاسته ډېر بد اغېز کوي او دا څه یې د دې باعث کېږي چې نوموړی/نوموړې خپل اوس وخت چې د ښه ژوند کولو تر ټولو ښه چانس دی، همداسې پرته له ښې ګټې اخیستنې ضایع کړي. دا څه د علمي څېړنو پایلو ثابت کړي دي. د کاري ټایم او استراحت ترمنځ د مرز او حد نه ټاکل؛ د روغتیا او روان لپاره ډېر خطرناک دي.
د دې لپاره چې کاري ټیم له خپلو رخصتیو ښه خوند واخلي، ښه دا ده چې مدیر یا رییس هغوی خپلې طبعې ته پرېږدي. داسې نه چې د چکر او سفر لپاره هم هغه نقشه ورکړي. دا مهمه نه ده چې په کاري چاپېریال کې ستاسې کاري پوزیشن او موقعیت څنګه دی او څه کار کوی. لاندې به تاسې ته هغه لارې چارې روښانه کړو، چې له کاري فشار پرته، له رخصتیانو په ښه خوند اخیستلو کې له تاسې سره مرسته کوي.
۱ـ له رخصتۍ مخکې مو کارونه خلاص کړئ!
مخکې له دې چې په سفر لاړ شی یا د چکر لپاره خپل ځان برابر کړی، ښه ده چې ستاسې په نشتون کې مو د ټولو ستونزو وړاندوینه وکړی. د راتلونکې لپاره مو اړین ټکي په نظر کې ولری او هغه په کاري چاپېریال کې کنټرول کړئ، څو ستاسې په نشتون کې له هغه استفاده وشي او کارونو کې مو کومه ګډوډي رامنځ ته نه شي. له سفر او چکره مخکې مو هغه اصول او نقشه خپلو همکارانو ته وړاندې کړئ، چې د پېښېدونکو احتمالي ستونزو حل پرې وکړي او تاسې خپله رخصتي په خوښۍ سره تېره کړی.
د خپل ځان لپاره مو حد او حدود وټاکئ، څو مو نور ملګري او همکاران پوه شي چې تاسې ته د سفر او چکر پر مهال دوی کوم وخت لاسرسی لري. د بېلګې په ډول، اجازه مه ورکوئ چې رییس، مدیر او یا مو هم ملګري او همکاران په هر وخت کې تاسې ته زنګ ووهي او ستاسې مزاحمت وکړي.
۲- هر وخت د کاري پیغامونو په فکر کې مه اوسئ!
زموږ مغز د ټکنالوژۍ په نسبت عجیبې کړنې ترسره کوي. د بېلګې په ډول، هر وخت مو زړه غواړي چې خپل ټلیفون یا هم کمپیوټر روشن کړو او وګورو چې کوم نوی مسیج لرو او که نه. بېلابېلو څېړنو ښودلې چې هر وګړی په عادي ډول د اوسط له مخې ۲۶۱۷ ځلې خپل ټلیفون لمس کوي او په هغه کې فعالې برنامې له نظره تېروي.
د ډیجیټالي نړۍ ډېر مینه وال، په سلو کې ۱۱ هغه یې په ۲۴ ساعتونو کې ۵۴۲۷ ځلې خپل ټلیفونونه چک کوي او ګوري چې کوم نوی پیغام لري او که نه. دا څېړنې ښيي چې په سفر او چکر تلل مو هم له دغه عادته ډېر نه شي راګرځولای. داسې فکر کول چې ممکن هره شېبه له کاري چاپېریال څخه کوم پيغام را ورسېږي، له هغه پيغامه په څو څو وارې ځورونکی دی. خو هغه څه چې په رښتیا دوی ته د چکر او سفر پر مهال ازار ورکوي، هغه د کاري چاپېریال له لوري د پيغام لېږل نه دي؛ بلکې هغه فکر دی چې دوی یې کوي، چې ممکن دوی ته هره شېبه له کاري دفتره کوم پیغام راشي او هماغه وي چې هره لحظه خپل ټلیفون چک کوي او ګوري چې داسې څه نه وي پېښ شوي. د سفر او چکر پر مهال داسې فکر کول، له رښتینو پيغامونو په څو څو وارې ازار رسوونکي دي.
هغه پیغامونه چې ستاسې ټلیفون ته هره شېبه راځي، تاسې د چکر او سفر پر مهال ارام ته نه پرېږدي او له کاري چاپېریاله ستاسې د لرېوالي مانع کېږي. داسې هم نه ده چې تاسې د سفر او چکر پر مهال ټلیفون په کور کې پرېږدی، دا بیا تر هغه ډېر درته ازار رسوونکی دی. د دې لپاره چې ښه استراحت وکړی، باید له کاري چاپېریاله لرې او د هغه په اړه هېڅ فکر هم ونه کړئ. خو که تاسې برعکس خپل ذهن په کاري چاپېریال کې پرېږدی او هره لحظه له خپلو همکارانو احوال واخلی، ممکنه نه ده چې تاسې کې دې د چکر وهلو نوره شیمه پاتې شي او یا دې تاسې له هغه خوند واخلی.
هرڅوک د سفر او چکر پر مهال له کاري چاپېریاله د لرېوالي لپاره خپله لار لري. د بېلګې په ډول، ځینې کسان ټلیفون کور پرېږدي او نه غواړي چې د سفر مهال یې مزاحمت وکړي. یوازې داسې یو ټلیفون ورسره اخلي، چې د اړتیا پر مهال پرې اړیکه ټينګه کړي. ځینې نور بیا ټلیفون له ځان سره اخلي، خو په ورځ کې یو ځل خپل اکونټونه چک کوي او نور د ورځې او شپې په اوږدو کې له ټلیفون او د اکونټونو له چک کولو سره اړیکه پرې کوي.
۳- تر ممکنه حده یو طبیعي او پراخ ځای ته لاړ شئ!
طبیعت د سټریس او خسته ګۍ په لرې کولو کې یو خاص اغېز لري. د بېلګې په ډول، که د ورځې په اوږدو کې ناچاره وی، چې تاسې دې له مېز او کمپیوټر څخه لرې شی، د رخصتۍ پر مهال طبیعي ځای ته تلل تر ممکنه حده ستاسې سټریس له منځه وړي. هغه مقاله چې د ۲۰۱۴ زیږدیز کال په frontiers in psycology مجله کې خپره شوې ده، ښيي چې د خوشاله ژوند، مثبت ذهن او طبیعت ته تللو ترمنځ محکمه اړیکه شته. نو طبیعت ته تلل مو پر روان او ورځنیو کارونو پوره پوره ښه اغېز کوي، که مو له وسه کېږي، د ورځې په پای او یا هم په اونۍ کې حتماً یو طبیعي ځای ته لاړ شئ. د امریکا د ارواپوهانو ټولنه طبیعت ته پر تلو تر هرڅه ډېر ټینګار کوي، دوی وايي، تاسې د خپلې ارامۍ او سټریس د لرې کولو لپاره طبیعي ځایونو ته لاړ شئ، له طبیعي ګلانو، اوبو، ونو، بوټو او اسمان څخه خوند واخلئ. له ډیجيټلي نړۍ او کاري چاپېریال سره مو اړیکه پرې کړئ، هلته کېنئ، وګرځئ او ان د ځینو شیانو لکه، بوټو، ګلانو، ډبرو او د سیند اوبو له لمس کولو څخه هم خوند واخلئ.
